ထိုင်းနိုင်ငံ၊ ချွန်ပူလီခရိုင်၊ လယောင်မြို့ က ItaIian Thai DeveIopment Public Co.,Ltd ရဲ့ ရေနက်ဆိပ်ကမ်း ဆောက်လုပ်ရေးလုပ်ငန်းမှာ အလုပ် လုပ်လုပ်နေတဲ့ မြန်မာအလုပ်သမားတွေ လုပ်ခလစာမရလို့ ဆန္ဒပြတောင်း ဆိုခဲ့ကြတယ်လို့ အလုပ်သမားတဦးက ပြောပါတယ်။
“လုပ်ခလစာမရတော့၊ စားစရာမရှိဘူး ။ ခက်ခဲလာတယ်။ ဒါကြောင့် လုပ်ခလစာရရှိဖို့ ဆန္ဒပြတောင်းဆိုတာပါ။ ငြိမ်ငြိမ်လေးတောင်းတာ မရလို့ ဆန္ဒပြတောင်းဆိုတာပါ”လို့ ဆန္ဒပြ အလုပ်သမားတဦးက ပြောပါတယ်။
လုပ်ခလစာရရှိရေးအတွက် မတ်လ၆ရက်နေ့ကတည်းက အလုပ်သမားတွေ တောင်းဆိုနေကြတာဖြစ်ပေမဲ့ ဖြေရှင်းပေးတာမရှိလို့ မတ်လ ၇ရက်မှာတော့ လုပ်ခလစာရရှိရေး ဆန္ဒပြ တောင်းဆိုခဲ့တာဖြစ်ပါတယ်။ တောင်းဆိုမှု ပြုလုပ်နေစဉ် ကုမ္ပဏီဘက်က ထိုင်းအာဏာပိုင် ရဲတပ်ဖွဲ့ကိုခေါ်ယူခဲ့တာကြောင့် အာဏာပိုင်တွေ လာရောက်ညှိနှိုင်းပြီး ညနေပိုင်းမှာ လုပ်ခလစာတွေရရှိခဲ့တယ်လို အလုပ်သမားတွေက ပြောပါတယ်။
“ဖလန်စမ်းမှာ ဖြစ်သွားတာပါ။ ဆောက်လုပ်ရေးအလုပ်သမားတွေပါ။ ခုညနေ အကုန်ရ သွားကြပြီ”လို့ ထိုင်း ရောက် မြန်မာအလုပ်သမားများအရေး ကူညီဆောင်ရွက်သူတဦးက ပြောဆိုပါတယ်။
ItaIian Thai DeveIopment Public Co.,Ltdကနေ လုပ်ခလစာ ရရှိရေးဆန္ဒပြတောင်းဆိုကြတဲ့ အလုပ်သမား တွေဟာ MOU အလုပ်သမား ၃၀၀ကျော်နဲ့ CI အလုပ်သမား၁၀၀ကျော် အလုပ်သမား စုစုပေါင်း ၅၀၀ ဝန်းကျင် ဖြစ်တယ်လို့ သိရပါတယ်။
လုပ်ခလစာ စုစုပေါင်း ဘတ်သိန်း ၆၀ ကျော်ရရှိဖို့ ကူညီပေးနိုင်ရေးအတွက် မတ် ၇ ရက် မနက်ပိုင်းမှာ ထိုင်းအခြေစိုက် မြန်မာအလုပ်သမားများ ကူညီ စောင့်ရှောက်ရေး အဖွဲ့ WAG ဆီ အဲဒီ အလုပ်သမားတွေက အကူညီတောင်းခံခဲ့တယ်လို့လည်း သိရပါတယ်။
#MyanmarLabourNews