ထိုင်းနိုင်ငံအတွင်းမှာ  ခြံပိုင်ရှင်ထိုင်းမိသားစု၅ယောက်အသတ်ခံရမှု ဖြစ်ပွားပြီးနောက်  ထိုင်းနိုင်ငံအတွင်းမှာရှိတဲ့  မြန်မာနိုင်ငံသားတွေ ဆက်တိုက်ဆိုသလို ပိုက်စိပ်တိုက် ဖမ်းဆီးခံနေရတယ်လို့  ထိုင်းရောက်မြန်မာလုပ်သားများထံမှ  သိရပါတယ်။

“ဒီမိသားစုလိုက်အသတ်ခံရတဲ့အမှုကြောင့်  ခုနေ့တိုင်းလိုလိုဖမ်းဆီးခံနေရတယ်။ ကုန်းပေါ်ရောရေပြင်စက် လှေတွေရော အဖမ်းဆီးခံရတာတွေ ဆက်တိုက်ပဲဖြစ်နေတယ်။  အလုပ်သမားတွေအသွားအလာဆင်ခြင် ကြဖို့ပြောထားပေမဲ့လည်း  ပြည်တွင်းကနေတရားမ၀င် ၀င်လာတာတွေကို တားမရဘူးဖြစ်နေတယ်။ ဘယ်လိုပဲ၀င်လာ၀င်လာအကုန်လုံးကပိုက်စိပ်တိုက်ပြီးရှာဖွေနေတာဆိုတော့  ဖမ်းမိမှာပဲ”လို့  ထိုင်းရောက်မြန်မာအလုပ်သမားတစ်ဦး ကဆိုပါတယ်။  

ဖေဖော်ဝါရီလ ၁၂ရက်ကထိုင်းနိုင်ငံ ပလွှတ်ဒန်င်၊ မဟာချိုင်နဲ့ တာ့ခရိုင်အတွင်းက  စက်ရုံအလုပ်ရုံတွေထဲက  လုပ်ကိုင်နေကြတဲ့မြန်မာအလုပ်သမားတွေကို ၀င်ရောက်စစ်ဆေးမှုတွေပြုလုပ်ခဲ့ပြီး  အလုပ်သမားများစွာဖမ်းဆီးခံခဲ့ရသလို  နေအိမ်တွေအထိ၀င်ရောက်ရှာဖွေဖမ်းဆီးတာတွေကိုပါပြုလုပ်ခဲ့တာလို့ သိရပါတယ်။  

၂၀၂၃ ဖေဖော်ဝါရီလ ၁၄ ရက်ညနေပိုင်းက ထိုင်းနိုင်ငံရနောင်းခရိုင်မှာ ကော့သောင်းဘက်ကနေစက်လှေဖြင့်၀င်ရောက်လာတဲ့ မြန်မာအလုပ်သမား၂၅ဦးကို မသင်္ကာ၍စစ်ဆေးရာမှဖမ်းဆီးခဲ့သလို  တာ့ခ်ခရိုင်နဲ့ ရနောင်းခရိုင်တွေမှာ တရားမဝင်နယ်စပ်ဖြတ်ကျော်သူ ၂၇ ဉီးကို ဖမ်းဆီးမိခဲ့ပြီး အဲ့ဒီနေ့မှာပဲထိုင်းနိုင်ငံအတွင်းကို မြ၀တီကနေ  နယ်စပ်ဖြတ်ကျော်ပြီး၀င်ရောက်လာတဲ့ မြန်မာနိုင်ငံသား၁၉ဦးကိုလည်း အမှတ်(၃၅၀၁)ထိုင်းနိုင်ငံခြေမြန်တပ်ရင်းက ဖမ်းဆီးခဲ့တယ်လို့ သိရပါတယ်။ 

ဒါ့အပြင် ထိုင်းန်ုင်ငံစမွတ်ပရာကန်ခရိုင်မှာ ဖေဖော်ဝါရီ၁၂ရက်က မြန်မာပွဲစားတစ်ဦးသတ်ခံရမှုဖြစ်စဉ် ကြောင့်  သံသယရှိမြန်မာအလုပ်သမား၄ဦးကိုလည်း ဖေဖော်ဝါရီ၁၅ရက်နေ့လည်က ဖမ်းဆီးခဲ့တယ်လို့လည်း ထိုင်းသတင်းတွေရဲ့ဖော်ပြချက်အရ သိရပါတယ်။

လက်ရှိအချိန်မှာတော့ မြန်မာရွှေ့ပြောင်းလုပ်သားတွေက အဆိုပါထိုင်းနိုင်ငံသားမိသားစု တစ်ခုလုံး သတ်ဖြတ်ထွက်ပြေးမှုကျူးလွန်တယ်လို့ သံသယရှိတာကြောင့် ရှာဖွေမှုတွေပြုလုပ်ကာ  စစ်ဆေးဖမ်းဆီးတာတွေကို ပိုမိုတင်းကြပ်ဆောင်ရွက်နေသလို  မြန်မာနိုင်ငံတွင်းမှာလည်း နိုင်ငံရေးအခြေအနေတွေနဲ့ အလုပ်အကိုင်ရှားပါးမှုတွေကြောင့် ပြည်ပထွက်ဖို့ကြိုးစားနေကြသူတွေ များပြားလာပြီး  တရားဝင် သွားလာနိုင်ဖို့အတွက်လိုအပ်တဲ့ ပတ်စ်ပို့ပြုလုပ်ဖို့ ပိတ်ထားတာကြောင့် တရားမဝင် ဝင်ရောက်ရာမှ  ယခုလိုအလွယ်တကူဖမ်းဆီးခံရမှုတွေ ယခင်ကထက်ပိုမိုရှိနေရတာဖြစ် တယ်လို့ သိရပါတယ်။

အဆိုပါမိသားစု ၅ ဦးသေဆုံးသူများမှာ အသက် ၁၀၊ ၇ နှစ်နှင့် ၃ လသားအရွယ် ကလေးငယ် ၃ ဦးအပါအဝင် အသက် ၄၆ နှစ် အရွယ် ရှောင်းမန်ပါတနာခမ်ဆိုသူနဲ့  ၎င်းရဲ့ဇနီး အသက် ၃၄ နှစ်အရွယ် ဂျားဆမ်ဆိုးဝမ်း တို့ဖြစ်ကြပြီး ၎င်းတို့တောင်ယာသို့သွားပြီး အိမ်ပြန်မရောက်ဘဲ ပျောက်ဆုံးနေတာကြောင့်  မိဘဆွေမျိုးများမှ လိုက်လံရှာဖွေရာ ဖေဖော်ဝါရီလ ၈ ရက်က  ၎င်းတို့၏ယာခင်းနှင့် မီတာ ၃၀၀ ခန့်အကွာ လျှိုတခုအတွင်းမှာ  အလောင်း များကို တွေ့ရှိခဲ့တာဖြစ်တယ်လို့  ထိုင်းသတင်းဌာနတွေရဲ့  ဖော်ပြချက်အရ သိရပါတယ်။

အသတ်ခံရသည့် မိသားစုမှာ ဂျင်းစိုက်ပျိုးရေးလုပ်ကိုင်ကြပြီး မြန်မာရွှေ့ပြောင်းအလုပ်သမားများကို ငှားရမ်းထားတာကြောင့့်  ကျူးလွန်သူများဟာ ဂျင်းစိုက်ပျိုးခင်းများ၌ အလုပ်လုပ်ကိုင်နေတဲ့ မြန်မာအလုပ်သမားများ ဖြစ်နိုင်တယ်လို့  သံသယရှိသလို အဆိုပါ မြန်မာအလုပ်သမားတွေဟာလည်း  ထွက်ပြေးတိမ်းရှောင်နေတယ်လို့ သိရပါတယ်။

#MyanmarLabourNews