စစ်ကောင်စီကထားဝယ်တက္ကသိုလ်ကျောင်းသားများသမဂ္ဂရဲ့ ခေါင်းဆောင်တစ်ဦးဖြစ်သူ မသီရိမိုးကို ဖမ်းမမိတဲ့အတွက် မိခင်ဖြစ်သူကို ဓားစာခံအဖြစ် ဖမ်းသွားပြီး ယခုလ ၂၇ ရက်နေ့မှာပဲ ထောင်ဒဏ် ၂ နှစ်ချလိုက်တယ်လို့သိရပါတယ်။
မသီရိမိုးရဲ့မိခင်နဲ့ညီမငယ်ဖြစ်သူကို စစ်ကောင်စီတပ်ဖွဲ့ဝင်တွေဟာ နိုဝင်ဘာ ၈ ရက်ကညပိုင်း၁၁နာရီလောက် နေအိမ်မှာဖမ်းသွားတာဖြစ်ပြီး နိုင်ငံတော်ဆူပူအောင်လှုံ့ဆော်မှု ရာဇသတ်ကြီးပုဒ်မ ၅၀၅ (က) နဲ့တရားစွဲကာ ဒီဇင်ဘာလ ၂၇ ရက်မှာတော့ ထောင်ဒဏ် ၂ နှစ်ချလိုက်တယ်လို့ မသီရိမိုးက MLN ကိုပြောပါတယ်။
"၈.၁၁.၂၀၂၁ ည( ၈) နာရီလောက်မှာ အရပ်ဝတ်နဲ့စစ်ကောင်စီတပ်သားတွေ အင်အားအလုံးအရင်းနဲ့
ထားဝယ်မြို့ ကနိုင်းဒါရွာက နေအိမ်ကို အကြမ်းဖက်ဝင်ရောက်ရှာဖွေပြီးနောက် ညီမကိုရှာမတွေ့လို့အိမ်မှာရှိတဲ့ အမေနဲ့ညီမလေးကို ညီမနဲ့ပတ်သက်ပြီးစစ်မေးစရာရှိလို့ဆိုပြီးမတရားဖမ်းဆီးခေါ်ဆောင်သွားတယ် ဖမ်းပြီးနောက် ထားဝယ်မြို့မရဲစခန်းမှတဆင့် စစ်ကြောရေးကိုရောက်ခဲ့တယ်လို့သိရပြီး ( ၁၁ ) ရက်နေ့ညနေပိုင်းမှာ ညီမလေးပြန်လွတ်လာခဲ့တယ် အမေ့ ကိုတော့ထားဝယ်အကျဥ်းမှာအချုပ်ချထားပြီး ၅၀၅(က)ပုဒ်မနဲ့ အမှုဖွင့်တရားစွဲဆိုပြီးနောက် မနေ့က ၂၇.၁၂.၂၀၂၁မှာ ထောင်ဒဏ် (၂)နှစ်ချမှတ်ခဲ့တယ်လို့သိရတယ် စပြီးဖမ်းတဲ့အချိန်မှာရော အမိန့်မချခင်အချိန်ထိရော ညီမကိုလာအဖမ်းခံရင်အမေကိုပြန်လွတ်ပေးမယ်လို့ပြောခဲ့တယ်လို့သိရတယ်"လို့ MLN ကိုပြောပါတယ်။
မသီရိမိုးဟာ ထားဝယ်တက္ကသိုလ် ကျောင်းသားများသမဂ္ဂရဲ့ ဒုတိယ ဥက္ကဋ္ဌ လည်းဖြစ်ပါတယ်။
ဒီလိုမိခင်ဖြစ်သူဖမ်းဆီးခံရတာနဲ့ပတ်သက်ပြီးတော့" ဘာမဟုတ်တဲ့ မိန်းကလေးသေးသေးလေးတစ်ယောက်ကိုတောင်မိအောင်မဖမ်းနိုင်လို့ အမေကိုဖမ်းပြီး လာအဖမ်းခံရင်ပြန်လွှတ်ပေးမယ်ဆိုကတည်းက ဒီကောင်တွေရဲ့သတ္တိကိုစဉ်းစားသာကြည့်ပေတော့" လို့ မသီရိမိုးက ပြောပါတယ်။
စစ်အာဏာသိမ်းတဲ့အပေါ် ဆန့်ကျင်သူတွေကို စစ်ကောင်စီဟာ ဖမ်းဆီးရာမှာ သူတို့အလိုရှိသူကိုမတွေ့တဲ့အခါ မိသားစုဝင်တွေ ၊ဆွေမျိုးသားချင်းတွေကိုပါ ဖမ်းတာတွေကိုပါလုပ်နေပြီးတော့မသီရိမိုးကိုစစ်ကောင်စီကသြဂုတ်လထဲက ၅၀၅-ကနဲ့တရားစွဲပြီး ဖမ်းဝရမ်းထုတ်ထားတာလို့သိရပါတယ်။
