ဒူဘိုင်းမှာအခက်အခဲဖြစ်နေတဲ့ မြန်မာအိမ်ကူအမျိုးသမီး ၁၁ဦးကိုပြန်လည်ခေါ်ယူနိူင်ခဲ့ပြီလို့ သွေးစည်းညီညွတ်သောသမဂ္ဂများအဖွဲ့ချုပ်(STUM)မှတာဝန်ရှိသူတစ်ဦးကပြောပါတယ်။
" ဒူဘိုင်းက ကလေးတွေပြန်ရောက်လာတယ်။ သူတို့ကို ရဲကနေစခန်းမှာအမှုဖွင့်ခေါ်ထား။ တရားခံကိုလိုက်ဖမ်း။ သူတို့ကိုပြန်ပို့နဲ့။ အန်တီတို့ကူညီထားတဲ့၂၉ယောက်အဖွဲ့ကပြန်ရောက်တာ။ ရှေ့ပိုင်းမှာပြန်ရောက်ထားပြီးပြီ ခုက၁၁ယောက်ထပ်ရောက်တာ။ ဟိုမှာသုံးယောက်ကျန်နေသေးတယ်။ အားလုံး၂၉ယောက်ပေါ့" လို့ STUM မှတာဝန်ရှိသူကပြောပါတယ်။
ယူအေအီးနိုင်ငံ၌ အိမ်အကူလုပ်ကိုင်ရန်ရောက်ရှိနေပြီး အလုပ်မရဘဲ အခက်အခဲဖြစ်ကာ ပိတ်မိနေတဲ့ အလုပ်သမားများထဲမှအကူညီတောင်းခံလာသူအလုပ်သမားများကို STUM အနေဖြင့် ပြန်လည်ခေါ်ယူနိူင်ရန် ပြီးခဲ့တဲ့စက်တင်ဘာလကတည်းက နှစ်လကြာအထိ ကြိုးစားခေါ်ယူခဲ့ရာမှ နှစ်လကြာပြီးနိုဝင်ဘာလကုန်မှသာ ပြန်လည်ခေါ်ယူနိုင်ခဲ့တာလို့ သိရပါတယ် ။
'' စက်တင်ဘာကတည်းကကူညီပေးနေတာ။ သူတို့ကိုကူညီပေးဖို့အေးဂျင့်တွေလိုက်ရှာရ ချိတ်ရနဲ့ နှစ်လလောက်ကြာသွားတယ်။ သူတို့ကိုကူညီဖို့ အခက်အခဲတွေအများကြီးလည်းကြုံရတယ်'' လို့ ဆိုပါတယ်။
ယင်းအဖွဲ့က ပြီးခဲ့သည့် လက အရှေ့အလယ်ပိုင်းဒေသရောက်အခက်အခဲဖြစ်နေသည့် မြန်မာအမျိုးသမီး ၁၄ဦးကို ခေါ်ဆောင်ပေးခဲ့ပြီး ယခုထပ်မံခေါ်ဆောင်နိုင်ခဲ့ခြင်းဖြစ်တယ်လို့သိရပါတယ်။
ယခုပြန်လာကြသည့် အမျိုးသမီးများမှာ
အရှေ့အလယ်ပိုင်းဒေသနိုင်ငံများတွင်အိမ်အကူလုပ်ရမည်ဆိုကာ ယခုနှစ်ဆန်းကစ၍ ပွဲစားမှတဆင့်အလုံးအရင်းဖြင့်သွားရောက်ခဲ့ကြခြင်းဖြစ်ပြီး အခုလိုပြန်လာချိန်မှာလည်း ချိတ်ဆက်စေလွှတ်ပေးကြသူများထံလျော်ကြေး ကျပ်သိန်း ၃၀မှ ကျပ်သိန်းရာချီအထိလျော်ကြေးပြန်ပေးကြရတယ်လို့လည်း သိရပါတယ်။
ယင်းနိုင်ငံများသို့ သွားရောက်ကြသူတွေဟာ ရောက်ရှိပြီးနောက်အလုပ်မရခြင်း၊ ပိတ်လှောင်ခံရခြင်း၊ မူလသဘောတူထားသည့်နေရာမဟုတ်သည့်နိုင်ငံသို့ထပ်မံစေလွှတ်ခံရခြင်းအပြင် နှိပ်စက်ခံရခြင်းတွေစတဲ့ပြဿ
နာများဖြစ်ပေါ်နေတာတွေကြောင့် နေရပ်ပြန်ရန်အကူညီတောင်းခံမှုများစွာရှိနေတာဖြစ်တယ်လို့လည်း အလုပ်သမားအရေးလှုပ်ရှားသူများက ဆိုပါတယ်။
#MyanmarLabourNews