ထိုင်း-မြန်မာ နှစ်နိုင်ငံသဘောတူညီမှုစာချွန်လွှာ (MoU) နဲ့ ထိုင်းနိုင်ငံကို အလုပ်သွားရောက် လုပ်ကိုင်ချင်သူများအတွက် ထုတ်ပြန်ထားသော ဝန်ဆောင်ခများထက် သုံးဆခန့် ပိုမိုကုန်ကျနေကြောင်း သတင်းရရှိပါတယ်။
MoU စနစ်နဲ့ ထိုင်းနိုင်ငံသို့ အလုပ်သမားစေလွှတ်မှုကို ၂နှစ်ကြာ ရပ်ဆိုင်းထားရာမှ ယခုလတွင် စတင်ဖွင့်လှစ်ခဲ့ပြီးနောက် MoU စနစ်နဲ့ ထိုင်းနိုင်ငံကို အလုပ်သမား (၆၀၀) ခန့် စေလွှတ်ခဲ့ပါတယ်။ ထိုသို့ စေလွှတ်ရာတွင် ဝန်ဆောင်ခအဖြစ် မြန်မာနိုင်ငံဘက်တွင် (၃)သိန်းနဲ့ ထိုင်းနိုင်ငံဘက်ခြမ်းအတွက် အလုပ်သမားခွင့်ပြုကြေး ဘတ် ၂၀၀၀၊ ဆေးစစ်ခ ဘတ် ၅၀၀၊ (၄)လစာ အာမခံကြေးနဲ့ ကိုဗက်ကျန်းမာရေးအာမခံကြေး ဘတ် ၉၉၀ နဲ့ နောက်ထပ်ခွင့်ပြုကြေးတစ်ခုအဖြစ် ဘတ် ၁၉၀၀ နဲ့ စုစုပေါင်း ဘတ် (၅၀၀၀) ကျော် သတ်မှတ်ထားတာဖြစ်ပါတယ်။
သို့သော် လက်ရှိတွင် မြန်မာနိုင်ငံမှ အလုပ်သမားများ ထိုင်းနိုင်ငံသို့ MoU စနစ်နဲ့ သွားရောက်ချင်ပါက သိန်း (၂၀) ခန့် ကုန်ကျနေတယ်လို့ အလုပ်သမားအရေး ဆောင်ရွက်နေသူတွေက ပြောပါတယ်။
အရင်တုန်းက ဆိုရင် မြန်မာငွေက တစ်သိန်းခွဲ၊ ဘတ်က (၃၆၀၀) က သတ်မှတ်ထားတဲ့ နှုန်းထားပေါ့။ ဒါပေမယ့် သတ်မှတ်ထားတဲ့ နှုန်းထားအတိုင်းသွားရတာက ရှားပါးတယ်။ အခုဆိုရင်တော့ အခြေအနေက ပိုဆိုးပါတယ်။ အခုဆိုရင် မြန်မာဘက်က သတ်မှတ်တာက (၃)သိန်းအထိ တိုးသွားတယ်။ ဘတ်နဲ့က ၅၄၀၀ ကနေ ၇၆၀၀ အထိ ကုန်ကျနေတယ်။ ဒါက သတ်မှတ်နှုန်းထားပါ။ အခုသွားတဲ့ သူက အဲထက် ပိုပေးပြီး သွားနေရတာပါ။ အခုဆိုရင် သိန်း(၂၀) လောက် ကုန်ကျပြီးတော့ သွားနေရတယ်။ ဘတ် နှစ်သောင်းလောက်က ပွဲစားခ ပေးရတယ်” လို့ ပြည်ပရွှေ့ပြောင်းအလုပ်သမားအရေး ဆောင်ရွက်နေသူတစ်ဦးက ပြောပါတယ်။
မြန်မာနိုင်ငံတွင် ထိုင်းနိုင်ငံကို MoU စနစ်နဲ့ အလုပ်သမားပို့ဆောင်ခွင့် ရရှိသော အေဂျင်စီ (၁၀၀) ကျော်ရှိပါတယ်။
မြန်မာနိုင်ငံတွင် စစ်တပ်က အာဏာသိမ်းပြီးနောက် အလုပ်အကိုင်အခွင့်အလမ်းများ သန်းချီ ဆုံးရှုံးခြင်းနဲ့ ကိုဗက်-၁၉ ကမ္ဘာ့ကပ်ရောဂါတို့ကြောင့် ဖြစ်ပေါ်လာတဲ့ အထွေထွေအကြပ်အတည်းနဲ့အတူ မြန်မာနိုင်ငံမှ အလုပ် လုပ်ကိုင်လိုသော လူထုဟာ ထိုင်းနိုင်ငံကို အထောက်အထားမဲ့ တရားမဝင် သွားရောက်လုပ်ကိုင်မှုကြောင့် ထိုင်း-မြန်မာ နယ်စပ်တွင် နေ့စဉ်နီးပါး မြန်မာနိုင်ငံသားတွေ ဖမ်းဆီးခံနေရပါတယ်။
MoU နဲ့ ထိုင်းနိုင်ငံကို သွားရောက်လုပ်ကိုင်လိုသော မြန်မာအလုပ်သမားတွေဟာ သိန်းချီ ရှိနေပြီး သွားရောက်လုပ်ကိုင်ခွင့် ရရန် တချို့က ပြင်ဆင်နေပြီး တချို့မှာ သွားရောက်ခွင့် ရရန် စောင့်နေကြပါတယ်။
