ထိုင်းနိုင်ငံ ချွန်ပူလီမြို့ရှိ ဂျက်လစင်ဟွေ့ပါကွန်ဒိုအနီး အလုပ်သွားရန်စောင့်နေတဲ့ မြန်မာလုပ်သား ၄ ဦးကို လာကြိုတဲ့ စက်ရုံဖယ်ရီယာဥ် အရှိန်လွန်ပြီး ဝင်တိုက်ခဲ့ခြင်းဖြစ်ပြီးအလုပ်သမား ၁ ဦးသေဆုံးကာ ၃ ဦးဒဏ်ရာရခဲ့တဲ့ အမှုအတွက် နစ်နာကြေးရရှိရန်ကူညီဆောင်ရွက်ပေးနေကြောင်း WAG အလုပ်သမားမဟာမိတ်အဖွဲ့မှသိရပါတယ်။
ပြီးခဲ့တဲ့ အောက်တိုဘာ ၁၄ ရက် နံနက်၆နာရီခွဲခန့်မှာဘန်ဝ၊ ဒယ်အိုးရုံမှာအလုပ်လုပ်နေတဲ့ မြန်မာအလုပ်သမား(၄ )ဦးမှာ အလုပ်သွားရန်ကားစောင့်နေစဥ်မှာ အလုပ်သမားလာကြိုသည့်မှန်လုံကားအကြီးမှ စက်ချို့ယွင်းကာ အရှိန်မထိန်းနိုင်းဘဲဝင်တိုက်ခဲ့တာဖြစ်ပြီး အလုပ်သမားတစ်ဦးသေဆုံးကာ ၃ ဦးမှာဒဏ်ရာအပြင်းအထန်ရရှိသွားခြင်းဖြစ်ပါတယ်။
အဆိုပါယာဥ်တိုက်မှုမှာနစ်နာသူလေးဦးအနက် ကိုစိုးလင်းဦးမှာ (PHYATHAI)ဆေးရုံကြီးသို့ ရောက်ရှိချိန်သေဆုံးသွားခဲ့ခြင်းဖြစ်ပြီး ဒဏ်ရာရသူ၃ဦးထဲမှ ကိုနွေးထွန်းသည် ခါးရိုးကျိုးသွားခဲ့ပြီး(MEMORIAL HOSPITAL)ဆေးရုံသို့ ဆေးကုသမှုခံယူနေကာကိုချစ်လင်းထိုက် သည် ခါးရိုးထိသွားခဲ့ပြီး (LAEN CHABANG HOSPITAL)ဆေးရုံတွင်ဆေးကုသမှုခံယူနေဆဲဖြစ်ပြီး ကိုညိမ်းထွန်းမှာ လက်ကျိုးသွားခဲ့သည့်အတွက် ချွန်ပူလီဆေးရုံမှာဆေးကုသမှူခံယူပြီး သက်သာလာသည့်အတွက် ဆေးရုံမှဆင်းလာပြီဖြစ်ကြောင်းသိရပါတယ်။
"သေဆုံးသွားတဲ့လူက ကားထော်လဘော်၊ ပကန်၊အသက်အာမခံကြေးသုံးခုရပါတယ်။ကျန်တဲ့ထိခိုက်မိတဲ့လူတွေကတော့ဆေးကုသမှုခံယူနေရပြီးဘတ်ဆယ်သိန်းနဲ့ညီတဲ့ မပိုတဲ့ဆေးဝါးကုသမှုရတယ်ပေါ့။ပြီးတော့ပျောက်ဆုံးသွားမှသူ့ရဲ့ထိုက်သင့်တဲ့နစ်နာကြေးလျော်ကြေးအပိုင်းကိုတစ်ကန့်ပြန်သွားရမှာပေါ့”လို့လို့ WAG အလုပ်သမားမဟာမိတ်အဖွဲ့ခေါင်းဆောင်ကိုမုန်တိုင်းက Myanmar Labour News ကိုပြောပါတယ်။
အဆိုပါယာဥ်တိုက်မှုအတွင်းသေဆုံးသွားသော ကိုစိုးလင်းဦးရဲ့ နာရေးကို အောက်တိုဘာ ၁၆ ရက်ညနေမှာ WAG အဖွဲ့မှကူညီဆောင်ရွက်ပေးခဲ့ပြီး နစ်နာကြေးများရရှိရေးအတွက် မိခင်ဖြစ်သူကိုမြန်မာပြည်မှခေါ်ယူထားကြောင်း WAG အဖွဲ့မှသိရပါတယ်။
