အာဏာသိမ်း စစ်အုပ်စုဟာ အရပ်သားတွေကို အဓိကပစ်မှတ်ထားတိုက်ခိုက် တဲ့ လေကြောင်းတိုက်ခိုက်မှုတွေကို နေ့စဉ် လုပ်ဆောင်လျက်ရှိပြီး  အဆိုပါအကြမ်းဖက် စစ်ဆင်ရေးကို လုပ်ဆောင်နေနိုင်ခြင်းမှာ  စစ်အုပ်စုက တိုက်ခိုက်ရေးလေယာဉ်များနှင့် ဆက်စပ် ထိန်းသိမ်းပြုပြင် မွမ်းမံရေးဆိုင်ရာ နည်းပညာအကူအညီများ အပါအဝင် စစ်လက်နက်များကို ဆက်လက်ရရှိနေခြင်း ကြောင့်သာ ဖြစ်တယ်လို့ သွေးစွန်းငွေ ဖြတ်တောက်ရေး လှုပ်ရှားမှု အစီအစဉ်က ထုတ်ပြန်ပါတယ်။

AVIC ကုမ္ပဏီမှ စစ်အုပ်စုအား ကူညီထောက်ပံ့မှုများကိုရပ်တန့်ရန်အတွက် ၎င်းကုမ္ပဏီ၏ ဒုတိယအကြီးဆုံးရှယ်ယာရှင်ဖြစ်ပြီး  နည်းပညာအရ အပြန်အလှန်မှီခိုနေသော ပြင်သစ်နိုင်ငံအခြေစိုက် Airbus ကုမ္ပဏီအားပစ်မှတ်ထားကာ ဖိအားပေးသည့်လှုပ်ရှားမှုများကို သွေးစွန်းငွေဖြတ်တောက်ရေးအဖွဲ့နှင့်အတူ ပြည်တွင်း ပြည်ပ မဟာမိတ်အဖွဲ့များပူးပေါင်း၍ လုပ်ဆောင်လျက်ရှိပါတယ်။

Airbus ကုမ္ပဏီ အနေဖြင့် ကုလသမဂ္ဂမှချမှတ်ထားသော စီးပွားရေးနှင့် လူ့အခွင့်အရေးဆိုင်ရာ လမ်းညွှန်ချက်များကိုလိုက်နာပြီး   AVIC ကုမ္ပဏီမှ စစ်အုပ်စုလေတပ်အတွက် ကူညီထောက်ပံ့နေသမျှကို ရပ်တန့်ရန်တောင်းဆိုသော အိတ်ဖွင့်ပေးစာ တစ်စောင်ကို Airbus ကုမ္ပဏီ၏ စီအီးအို  ဂီရွန်ဖောဟိ ထံ သွေးစွန်းငွေဖြတ်တောက်ရေးနှင့်အတူ ပြည်တွင်း ပြည်ပမဟာမိတ်အဖွဲ့  (၃၁၁)ဖွဲ့ မှ ပူးပေါင်းပြီး  ဒီဇင်ဘာ (၁၀) ရက် အပြည်ပြည်ဆိုင်ရာ လူ့အခွင့်အရေးနေ့မှာ ပေးပို့ခဲ့တာလို့ ဆိုပါတယ်။

အဆိုပါ တောင်းဆိုချက်တွေထဲမှာ မြန်မာစစ်အုပ်စုထံ လေယာဉ်များ စစ်လက်နက်များ နှင့် ဆက်စပ်ပစ္စည်းများ ရောင်းချမှုနှင့် ရောင်းချရန် စီစဉ်မှုအားလုံးကို ရပ်တန့်စေရန် ၊ မြန်မာလေတပ်၏ လေယာဉ်ပြုပြင်ထိန်းသိမ်း ရေး လေ့ကျင့်သင်ကြားရေးနှင့် နည်းပညာ အကူအညီအားလုံးကို ရပ်ဆိုင်းရန်အတွက် 
AVIC နှင့် ကုမ္ပဏီခွဲများအပေါ် ဩဇာလွှမ်းမိုးမှု အသုံးပြုရန်၊  

AVIC သည် မြန်မာစစ်အုပ်စုနှင့် စီးပွားရေးလုပ်ငန်းများလုပ်ဆောင်မှုရပ်ဆိုင်းရန် ငြင်းဆန်ပါက AviChina မှ ရင်းနှီးမြုပ်နှံမှုများကို တာဝန်ယူမှုရှိစွာရုတ်သိမ်းပေးပြီး ဆက်ဆံရေးကို အဆုံးသတ်ရန် စတဲ့အချက်တွေ ပါဝင်ပါတယ်။

တရုတ်နိုင်ငံပိုင် Aviation Industry Corporation of China (AVIC) ဟာ  စစ်အုပ်စုအတွက် စစ်လေယာဉ်တွေ အဓိကရောင်းချခြင်းနဲ့  ပြုပြင်ထိန်းသိမ်းရေးများပြုလုပ်ပေးတဲ့ ကုမ္ပဏီဖြစ်ပါတယ်။

#MyanmarLabourNews