ပြီးခဲ့သည့် အင်္ဂါနေ့ (အောက်တိုဘာ ၂၁) တွင် ဂျပန်နိုင်ငံ၏ ပထမဆုံး အမျိုးသမီးဝန်ကြီးချုပ်အဖြစ် ရွေးကောက်တင်မြှောက်ခံခဲ့ရသူမှာ အသက် ၆၄ နှစ်အရွယ် အမျိုးသားရေးဝါဒီ ဆနေး တာကအိချိ (Sanae Takaichi) ဖြစ်သည်။ 

သူမသည် "ဂျပန်နိုင်ငံသားများသာ ပထမဦးစားပေး" (Japan-First) ဟူသော ခိုင်မာသည့် သဘောထားကို လက်ကိုင်ထားသည့် နိုင်ငံရေးသမားဖြစ်သည်။

ဝန်ကြီးချုပ် တာကအိချိသည် ၎င်း၏ မဲဆွယ်စည်းရုံးမှုများအတွင်း ဂျပန်လူ့အဖွဲ့အစည်းအတွင်း နိုင်ငံခြားသားများအပေါ် တင်းမာသော သဘောထားအမြင် ကို ပြတ်သားစွာ ချပြခဲ့သူဖြစ်သည်။ 

သူမ၏ အဓိက ကြွေးကြော်ချက်မှာ ဂျပန်၏ ဥပဒေ၊ စည်းမျဉ်းစည်းကမ်းများ လေးစားလိုက်နာခြင်းမရှိသော နိုင်ငံခြားသားများ နှင့် တရားမဝင်နေထိုင်သူများ ကို ပြင်းပြင်းထန်ထန် နှိမ်နင်းသွားမည် ဟူ၍ ဖြစ်သည်။ 

ထိုသို့ နိုင်ငံခြားသားများအပေါ် သဘောထားတင်းမာမှုရှိသူ ဝန်ကြီးချုပ်အသစ်ဖြစ်လာခြင်းသည် ဂျပန်နိုင်ငံသို့ အလုံးအရင်းဖြင့် ရောက်ရှိနေသည့် မြန်မာနိုင်ငံသားများအပေါ် မည်သို့မည်ပုံ သက်ရောက်မှုများ ရှိလာမည်ကို စိုးရိမ်ပူပန်မှုများ မြင့်တက်လာစေခဲ့သည်။

မြန်မာနိုင်ငံသည် ၂၀၂၁ ခုနှစ် စစ်တပ်အာဏာသိမ်းမှု နောက်ပိုင်းတွင် ကြုံတွေ့နေရသော ပြင်းထန်သည့် စစ်ပွဲနှင့် ပဋိပက္ခများ၊ စီးပွားရေးပြိုလဲမှု၊ အလုပ်အကိုင်ရှားပါးမှု၊ အတင်းအဓမ္မ လူသစ်စုဆောင်းသည့် စစ်မှုထမ်းဥပဒေ နှင့် တရားဥပဒေစိုးမိုးမှု မရှိလာခြင်းတို့ကြောင့် လုံခြုံမှုကင်းမဲ့လာနေသော အခြေအနေသို့ ရောက်ရှိနေသည်။ 

ထိုအခြေအနေများ၏ တွန်းအားများကြောင့် မြန်မာ့လူငယ်လူရွယ်များသည် ပြည်ပနိုင်ငံများသို့ နည်း လမ်းပေါင်းစုံ ဖြင့် ထွက်ခွာနေကြသည်။

ဒေသတွင်း၌ စီးပွားရေးအင်အား အတောင့်တင်းဆုံး ဖြစ်ပြီး ပညာရေးနှင့် အလုပ်အကိုင် အခွင့်အလမ်း ပေါများသော ဂျပန်နိုင်ငံသည် မြန်မာနိုင်ငံသားများအတွက် ဦးစားပေး ရွေးချယ်စရာနိုင်ငံတစ်ခု ဖြစ်လာနေသည်။ 

ဂျပန် အာဏာပိုင်များ၏ ၂၀၂၅ ခုနှစ် အချက်အလက်များအရ ဂျပန်နိုင်ငံသို့ ရောက်ရှိနေသည့် မြန်မာ နိုင်ငံသား စုစုပေါင်းအရေအတွက်သည် ၁ သိန်း ၃ သောင်းကျော်အထိ ရှိနေပြီး  နိုင်ငံခြားသားနေထိုင်သူ စာရင်းတွင် အဆင့် (၈) နေရာ၌ ရှိသည်။ 

ထိုအရေအတွက်သည် ၂၀၂၀ ခုနှစ် ကိုဗစ် ၁၉ ကပ်ရောဂါ မတိုင်မီကာလနှင့် နှိုင်းယှဉ်ပါက ဂျပန်နိုင်ငံသို့ မြန်မာနိုင်ငံသားများ ရွှေ့ပြောင်းနေထိုင်မှုသည် ၃ ဆခန့် မြင့်တက်လာခြင်းဖြစ်သည်။ 

နိုင်ငံခြားသား နှိမ်နင်းရေး ပစ်မှတ်နှင့် မြန်မာတို့၏ အခြေအနေ

ဂျပန်ဝန်ကြီးချုပ်အသစ် တာကအိချိ၏ ဂျပန်အစိုးရအသစ်သည် လတ်တလောတွင် နိုင်ငံခြားသားများ အပေါ် တင်းကျင်မည့် ဥပဒေ နှင့် ညွှန်ကြားချက်အသစ်များကို ဆွေးနွေးထုတ်ပြန်ခြင်းရှိသေးသည့်တိုင် ဂျပန်နိုင်ငံ၏ ဥပဒေစည်းမျဉ်းစည်းကမ်းများကို လေးစားလိုက်နာခြင်းမရှိသော နိုင်ငံခြားသားများကို တင်းကျပ်လာမည်က အသေအချာဖြစ်သည်။ 

သူမ ဝန်ကြီးချုပ်ဖြစ်လာပြီး ရက်ပိုင်းအကြာမှာပင် ရန်ကုန်မြို့ရှိ ဂျပန်သံရုံးက မြန်မာနိုင်ငံသားများ၏ အလည်အပတ်ဗီဇာလျှောက်ထားမှုများကို စတင်တင်းကျပ်လာသည်ဟု ဂျပန်နိုင်ငံ၊ တိုကျိုမြို့ တွင်နေထိုင်သော ဦးမြင့်ဆွေ က Myanmar Labour News သို့ ပြောသည်။ 

ဦးမြင့်ဆွေ သည် ဂျပန်နိုင်ငံတွင် တရားဝင်ဖွဲ့စည်းထားသော မြန်မာနိုင်ငံသားစုဖွဲ့ထားသော အလုပ်သမား သမဂ္ဂ (Federation of Workers Union of The Burmese Citizen)၏ ဥက္ကဋ္ဌ ဖြစ်သည်။ ဂျပန်ရောက် မြန်မာရွှေ့ပြောင်းလုပ်သားအရေးများကို ကူညီဆောင်ရွက်ပေးနေသူလည်းဖြစ်သည်။ 

တာကအိချိအစိုးရသစ်သည် စီးပွားရေးလုပ်ငန်းများကို လက်တလုံးကြားလုပ်ကာ အခွန်တိမ်းရှောင်သော တရုတ်နိုင်ငံသားများ နှင့် ဗီယက်နမ်နိုင်ငံသားများကို ပစ်မှတ်ထားတင်းကျပ်မည်ဟု ယူဆရသော်လည်း မြန်မာနိုင်ငံသားများအနေဖြင့်လည်း သတိထားနေထိုင်ရမည်ဖြစ်ကြောင်း သူက ဆိုသည်။ 

“ဂျပန်မှာက အခြားနိုင်ငံခြားသားတွေက ဥပဒေချိုးဖောက်တာတို့ မလိုက်နာတို့က အရင်ကတည်းက မျိုးစုံပေါ့ လေ၊ အရင်ဂျပန်အစိုးရတွေကလည်း ဒါတွေကိုင်တွယ်ခဲ့တာတွေရှိပါတယ်။ အခုက ပိုပြီးတော့ တင်းတင်းကျပ်ကျပ်ကိုင်တွယ်မယ်ထင်တယ် ” ဟု သူက ပြောသည်။

ထိုနှစ်နိုင်ငံမှ ရွှေ့ပြောင်းလုပ်သားများသည် ဂျပန်နိုင်ငံတွင် အများဆုံးဖြစ်ပြီး တရုတ်နိုင်ငံသားများသည် ၈ သိန်း ၇ သောင်း ကျော် နှင့် ဗီယက်နမ်နိုင်ငံသားများသည် ၆ သိန်း ၃ သောင်းကျော်အထိ ရှိကြောင်း ဂျပန်အစိုးရ၏ စာရင်းများအရ သိရသည်။ 

ဗီဇာသက်တမ်းကျော်လွန်နေထိုင်သူများ နှင့် ဂျပန်ရောက် မြန်မာနိုင်ငံသားများကို ပေးနေသော ခိုလှုံခွင့်ဗီဇာ(ဒုက္ခသည်လျှောက်လွှာတင်ထားသူများ)အတွက်လည်း ဖိအားပိုများလာနိုင်သည်ဟု ဂျပန်ရောက် မြန်မာနိုင်ငံသားတချို့က ပြောကြသည်။ 

လက်ရှိအချိန်တွင် မြန်မာနိုင်ငံသားများသည် ဂျပန်နိုင်ငံသို့ အလုပ်သင်ဗီဇာ (Training Visa) ၊ Work Permit (ကျွမ်းကျင် အလုပ်လုပ်ခွင့်ဗီဇာ)၊ ကျောင်းသားဗီဇာ (language School Visa)၊ အလည်အပတ်ဗီ ဇာ အစရှိသော ဗီဇာအမျိုးအစားများဖြင့် အများဆုံးသွားရောက်လျက်ရှိသည်။ 

၂၀၂၁ ခုနှစ်၊ စစ်အာဏာ သိမ်းပြီး နောက်ပိုင်းတွင် ဗီဇာအမျိုးမျိုးဖြင့် ဂျပန်နိုင်ငံသို့ ရောက်ရှိသူအများစုသည် ဗီဇာသက်တမ်း ကုန်ဆုံးပါက အထူးဗီဇာ (ခေါ်) ခိုလှုံခွင့်ဗီဇာ ပြောင်းလဲလျှောက်ထားကာ နေထိုင်လျက်ရှိကြသည်။ 

ယခုနောက်ပိုင်းတွင် အလုပ်သင်ဗီဇာ (Training Visa) နှင့် ကျောင်းသားဗီဇာ (language School Visa) ဖြင့် လာရောက်ကြသော မြန်မာနိုင်ငံသားတချို့သည် ဗီဇာသက်တမ်းမပြည့်မီ လုပ်ငန်းခွင်မှ ထွက်ပြေး ခြင်း၊ သတ်မှတ်ထားသော အလုပ်ချိန်ထက် ပိုမိုလုပ်ဆောင်ခြင်း၊ တရားမဝင်အလုပ် ခိုးလုပ်ခြင်း တို့ကြောင့် ခိုလှုံခွင့်ဗီဇာများကို ထုတ်ပေးနေသောလည်း အချိန်ကာလ နှင့် အလုပ်လုပ်ခွင့်များ ကို ကန့်သတ်လျက် ရှိသည်ဟု ဦးမြင့်ဆွေက ပြောသည်။ 

“ အာဏာသိမ်းပြီးနောက်ပိုင်း ၃ နှစ်မြောက်လောက်မှာ ဒီအထူးဗီဇာ(ခိုလှုံခွင့်ဗီဇာ) လျှောက်တဲ့သူ အရမ်း များလာတယ်။ ပြီးတော့ Training နဲ့လာတယ် ထွက်ပြေးတယ်၊ တချို့ဆိုရင် ကျောင်းနဲ့ လာတယ် မပြီးကြ ဘဲ ထွက်ပြေးကြတယ်၊ အလည်ဗီဇာနဲ့ လာပြီး ဒီဗီဇာကို လျှောက်ကြတယ်၊ ဒီလိုမျိုးစုံတွေ ဖြစ်လာတော့ ဗီဇာစည်းကမ်းဖောက်ဖျက်ပြီး ပြစ်မှုတစ်ခုခုရှိတဲ့ သူဆို ၆ လပဲ ပေးတော့တယ်” ဟု သူက ဆိုသည်။ 

သို့သော်လည်း ဗီဇာ သတ်မှတ်စည်းမျဉ်းစည်းကမ်းများကို လိုက်နာပြီး ဗီဇာသက်တမ်းကုန်ချိန်တွင် ခိုလှုံ ခွင့်ဗီဇာ လျှောက်ထားသော မြန်မာနိုင်ငံသားများကိုမူ ၁ နှစ်သက်တမ်း နှင့် အလုပ်လုပ်ခွင့်ကိုလည်း အပြည့်အ၀ပေးသည်ဟု သူက ရှင်းပြသည်။ 

ထို့အပြင် ဂျပန်နိုင်ငံသို့ ကျောင်းသားဗီဇာ သို့မဟုတ် အလည်အပတ်ဗီဇာဖြင့် လာရောက်ကြမည့် နိုင်ငံခြားသားများအပေါ် ဗီဇာထုတ်ပေးရေး စိစစ်မှုများကိုလည်း ပိုမိုတင်းကျပ်လာဖွယ်ရှိပြီး တရားမဝင် အလုပ်လုပ်ကိုင်မည့် ရည်ရွယ်ချက်ရှိသည်ဟု သံသယရှိသူများကို ပယ်ချမှု များပြားလာနိုင်ဟု ခန့်မှန်း ပြောဆိုနေကြသည်။   

ဂျပန်ဝန်ကြီးချုပ်အသစ်တက်လာပြီးနောက် မြန်မာ့လူငယ်များအတွက် ငွေကြေးကုန်ကျမှုများပြားသော် လည်း ဂျပန်နိုင်ငံသို့သွားရောက်ရန် လွယ်ကူသည်ဟု ဆိုရမည့် ကျောင်းသားဗီဇာ (language School Visa) များအပေါ် တင်းကျပ်လာမည်ကို စိုးရိမ်သည်ဟု ဂျပန်ဘာသာစကားလေ့လာနေသော မအေးမြတ် သူက ပြောသည်။ 

“ အခြေအနေတွေ အရမ်းမဆိုးဖို့ပဲ စောင့်ကြည့်ပြီး မျှော်လင့်နေရတယ်။ ဘာတွေဖြစ်လာဦးမလဲ မသိဘူး ” ဟု သူက ဆိုသည်။ 

တစ်ဖက်တွင်လည်း အာဏာသိမ်းစစ်ကော်မရှင်သည် ပြည်ပအလုပ်အကိုင် အေဂျင်စီများမှ တစ်ဆင့် ပြည်ပနိုင်ငံများသို့ စေလွှတ်သော အလုပ်သမားအရေအတွက်ကို ယခုနှစ်စပိုင်းက တင်းကျပ်ထားသည်။

ပြီးခဲ့သည့် မတ်လ ၂၃ ရက်နေ့မှ စတင်ကာ ဂျပန်နိုင်ငံသို့ အလုပ်သမားစေလွှတ်မည့် အေဂျင်စီများ အနေ ဖြင့် စစ်ကော်မရှင်၏ အလုပ်သမားဝန်ကြီးဌာနသို့ အလုပ်ခေါ်စာ  (Demand Letter) တင်ပြရာတွင် လူ ၁၅ ဦးထက်မပိုရန် နှင့် အေဂျင်စီတစ်ခုသည် တစ်လလျှင် တစ်ကြိမ်သာ တင်ပြရမည်ဟု ကန့်သတ်ထား သည်။ 

ဂျပန်ရောက် မြန်မာများ ဘာတွေသတိထားနေထိုင်သင့်လဲ။ 

၂၀၂၁ ခုနှစ် စစ်အာဏာသိမ်းပြီးနောက်ပိုင်း ဂျပန်နိုင်ငံသို့ မြန်မာနိုင်ငံသားများ အကြောင်းအမျိုးမျိုး ကြောင့် ရွှေ့ပြောင်းနေထိုင်မှုသည် ပြီးခဲ့သည့် ဆယ်စုနှစ်တစ်ခုစာတွင် အမြင့်ဆုံးအခြေအနေရှိသည်။ 

ထို့သို့ ရွှေ့ပြောင်းနေထိုင်သူများပြားလာခြင်း နှင့်အတူ ယဉ်ကျေးမှု၊ ဓလေ့ထုံးစံ၊ လူနေမှုအဆင့်အတန်း မတူသော ဒေသခံ ဂျပန်လူမျိုးအသိုင်းအ၀ိုင်းများနှင့် မြန်မာနိုင်ငံသားတို့ကြားတွင်လည်း အဆင်မပြေမှု နှင့် အငြင်းပွားမှုတို့ ပိုများလာနေသည်။ 

မြန်မာနိုင်ငံသားတွေအနေနဲ့လည်း  ကွမ်းစားခြင်း နှင့် စည်း ကမ်းမဲ့ ကွမ်းတံထွေး ထွေးခြင်း၊ ပတ်ဝန်းကျင်ကို ဆူညံ့သံများဖြင့် အနှောင့်ယှက်ဖြစ်စေခြင်း၊ အရက် သေစာ သောက်စားပြီးနောက် အချင်းချင်းရန်ဖြစ်ခြင်း အပါအဝင် ဂျပန်နိုင်ငံသားများ၏ ရိုးရာ ဓလေ့ထုံး စံများ အပေါ် ဂါ၀ရတရားနည်းပါးခြင်း အစရှိသော အပြုအမှုများနှင့် ပြဿနာဖြစ်ပွားမှု ပိုများလာ ကြောင်း ဂျပန်ရောက် မြန်မာနိုင်ငံသားများက ပြောကြသည်။ 

မြန်မာနိုင်ငံသားအများစုသည် အလုပ်ကြိုးစားပြီး စည်းကမ်းလိုက်နာသူများဖြစ်၍ ဂျပန်လူမျိုးများ၏ မုန်းတီးပြီး သဘောမကျသော နိုင်ငံခြားသားထဲတွင် မပါဝင်သော်လည်း ယခုထက်ပိုပြီး ဒေသခံ ဂျပန်လူမျိုးများနှင့် အတူယှဉ်တွဲနေထိုင်ရေး အဆင်ပြေစေရန် သတ်မှတ်ထားသော စည်းကမ်း လိုက်နာခြင်း နှင့် အစိုးရသို့ အခွန်အပြည့်အ၀ ပေးဆောင်ရန်ကြရန် ဦးမြင့်ဆွေက Myanmar Labour News သို့ အကြံပြုပြောသည်။ 
 
“ အခုလောလောဆယ် အနေအထားအရတော့ ကျနော်တို့ မြန်မာနိုင်ငံသားတွေက ဒေသခံ ဂျပန်လူမျိုး တွေနဲ့  ပွတ်တိုက်ပြီး ပြဿနာဖြစ်လောက်တဲ့ အနေအထားတော့ မရှိသေးပါဘူး။ သို့သော်လည်း တချို့သော ရပ်ကွက်တွေမှာ ကွမ်းစားတယ်၊ ကွမ်းတံထွေးတယ်။ အိမ်သာရှိရဲ့သားနဲ့ ပန်းခြံထဲမှာ အပေ့ါပါးသွားတယ်၊ လူမြင်ကွင်းသူမြင်ကွင်းတွေမှာ မူးပြီးလဲနေတယ်၊ အိပ်နေတာမျိုး ဖြစ်နေတယ်” ဟု သူက ပြောသည်။ 

လတ်တလောတွင် ယင်းအပြုအမှုများသည် ဂျပန်နိုင်ငံသားများ နှင့် မြန်မာနိုင်ငံသားများကြား ပြဿနာ များသည် ကြီးကြီးမားမားမဖြစ်လာသေးသော်လည်း တစ်ချိန်မဟုတ် တစ်ချိန်တွင် ပြဿနာ ကြီးမားလာ နိုင်သည်ကို စိုးရိမ်ရသည်ဟု ဦးမြင့်ဆွေက ပြောဆိုသည်။ 

လက်ရှိအချိန်တွင် မြန်မာနိုင်ငံသားများသည် ဂျပန်နိုင်ငံ၏ မြို့တော် တိုကျို အပါအဝင် နာဂိုရာ၊ အိုဆာ ကာ ၊ အိုကီနာဝါ၊ ဟိုကိုင်းဒိုး အစရှိသော မြို့ နှင့် ဒေသများတွင် အများဆုံးနေထိုင် အလုပ်လုပ်ကိုင် လျက်ရှိကြသည်။ 

ဂျပန်နိုင်ငံသို့ အကြောင်းအမျိုးမျိုးဖြင့် လာရောက်ကြမည့် မြန်မာနိုင်ငံသားများအနေဖြင့် ဂျပန်ဘာသာ စကားကို အသေချာတတ်မြောက်အောင် သင်ယူလေ့လာပြီးမှ လာစေခြင်းကြောင်း၊ တချို့သော အငြင်း ပွားမှုများသည် ဘာသာစကား ကျွမ်းကျင်စွာ မတတ်မြောက်ထားခြင်းကြောင့် ဖြေရှင်းရာတွင် နားလည်မှု လွဲမှားကာ ပြဿနာပိုကြီးစေသည်ဟု ဂျပန်နိုင်ငံရောက် မြန်မာနိုင်ငံသားတစ်ဦးဖြစ်သူ ဦးမျိုးမင်းဆွေက ပြောသည်။ 

“ ဂျပန်ဘာသာစကားကို ဂျပန်ရောက်လာတော့မယ် ထပ်သင်မယ်ဆိုတာမျိုး မလုပ်စေချင်ဘူး။ မဟုတ်လို့ ရှိရင် ယဉ်ကျေးမှုမတူ၊ စဉ်းစားတွေးခေါ်မှုမတူတာတွေ များတော့​ အခြေခံကျတဲ့ ဂျပန်လူမျိုးတွေရဲ့ တွေးခေါ်မှု၊ ဓလေ့တွေကိုလည်း သင်ယူပြီးမှ လာသင့်တယ် ” ဟု သူက ဆိုသည်။  

ထို့အပြင် ဂျပန်နိုင်ငံတွင် အလုပ်အကိုင်ပေါများပြီး လစာကောင်းမွန်သော်လည်း လုပ်ငန်းခွင် အခြေ အနေများ နှင့် အလုပ်လုပ်ကိုင်ရမှုများသည် လုပ်ငန်းအမျိုးအစားပေါ်မူတည်ပြီး ခက်ခဲပင်ပန်းခြင်း ကြောင့် မိမိအလုပ်အကိုင်အမျိုးအစား နှင့် လုပ်ငန်းခွင်များအကြောင်းကို လေ့လာစုံစမ်းသင့်ကြောင်း သူက အကြံပြုသည်။ 

မြန်မာနိုင်ငံသားများသည် ဂျပန်နိုင်ငံတွင် ဆောက်လုပ်ရေး၊ ကုန်ထုတ်လုပ်မှုစက်ရုံများ၊ စိုက်ပျိုးနှင့် မွေးမြူရေး၊ သက်ကြီးရွယ်အို စောင့်ရှောက်ရေး နှင့် စားသောက်ဆိုင်လုပ်ငန်းကဏ္ဍများတွင် အများဆုံး အလုပ်လုပ်လျက်ရှိကြသည်။  

မြန်မာနိုင်ငံသားများအနေဖြင့်လည်း လုပ်ငန်းခွင်အငြင်းပွားမှုများ၊ အခွင့်အရေးချိုးဖောက်ခံရခြင်းများ နှင့် ဥပဒေကြောင်းအရ အကူအညီများလိုအပ်ပါကလည်း ဂျပန်ရောက် မြန်မာနိုင်ငံသားစုဖွဲ့ထားသော အလုပ်သမားသမဂ္ဂ (Federation of Workers Union of The Burmese Citizen)ထံသို့ ဆက်သွယ် အကူအညီတောင်းနိုင်သည်။

သို့သော် ထိုအကူအညီတောင်းခံမှုများအတွက် အခွင့်အရေးချိုးဖောက်ခံမှုများ နှင့် နစ်နာမှုများအတွက် သက်သေအထောက်အထား အပြည့်အစုံတင်ပြနိုင်ရန် လိုအပ်မည်ဖြစ်သည်။  

ဂျပန်အစိုးရသစ်သည် တရားမဝင်နိုင်ငံခြားသားများ နှင့် ဥပဒေစည်းကမ်းများ လိုက်နာခြင်းမရှိသော နိုင်ငံခြားသားများကို ပိုမိုတင်းကျပ်စွာ ကိုင်တွယ်မည်ဖြစ်သော်လည်း တခြားတစ်ဖက်တွင်လည်း လုပ် သားလိုအပ်ချက်မြင့်မားနေခြင်းက မြန်မာနိုင်ငံသားများအတွက် အခွင့်အလမ်းကောင်းများ ရှိနေပြန် သည်။ 

ထိုသို့ အခွင့်အလမ်းများရှိနေသော်လည်း မြန်မာနိုင်ငံသားများအနေဖြင့် “ကြိုးစားချင်စိတ်၊ စည်းကမ်း လိုက်နာစိတ်၊ ဥပဒေလိုက်နာစိတ်၊ သတ်မှတ်အခွန်တွေကို မှန်မှန် ကန်ကန်ဆောင်ဖို့နဲ့ ဘာသာစကားကို တကယ်တတ်အောင်လာဖို့က အရေးကြီးဆုံးပါပဲ” ဟု ဦးမြင့်ဆွေက တိုက်တွန်းပြောဆိုသည်။