မလေးရှားနဲ့ ထိုင်းနိုင်ငံတွေကို သွားရောက်လုပ်ကိုင်မယ့်သူတွေအနေနဲ့ နှစ်နိုင်ငံအသိအမှတ်ပြု ဆေးရုံ၊ ဆေးခန်းတွေမှာဘဲ ကျန်းမာရေးစစ်ဆေးတာတွေ လုပ်ဆောင်သင့်တယ်လို့ မြန်မာနိုင်ငံပြည်ပအလုပ်အကိုင်ဝန်ဆောင်မှု လုပ်ငန်းရှင်များ အဖွဲ့ချုပ် (MOEAF)ရဲ့ တာဝန်ရှိသူတစ်ယောက်က ပြောပါတယ်။
လက်ရှိမှာတော့ ပွဲစားတွေက မလေးရှားနဲ့ ထိုင်းနိုင်ငံမှာ သွားရောက်လုပ်ကိုင်လိုသူတွေကို နီးစပ်ရာ ဆေးရုံ၊ ဆေးခန်းတွေမှာဘဲ ကျန်းမာရေးစစ်ဆေးတာတွေ ကြိုတင်လုပ်ဆောင်ခိုင်းပြီး ကျပ်ငွေသုံးသိန်းကနေ ငါးသိန်းအထိ တောင်းခံနေကြတယ်လို့ သိရပါတယ်။
အဲဒီလိုလုပ်ဆောင်နေကြတာကြောင့် ပြည်ပကိုသွားမယ့်သူတွေအနေနဲ့ မလိုအပ်ဘဲ ငွေကြေးအပိုကုန်ကျတာတွေ ဖြစ်ပေါ်နေတယ်လို့ ဆိုပါတယ်။
“အမှန်က မလေးရှားနိုင်ငံ FWCMS နဲ့ ထိုင်းနိုင်ငံ DOE က အသိအမှတ်ပြုထားတဲ့ ဆေးခန်းရုံ၊ ဆေးခန်းတွေမှာပဲ ဆေးစစ်ရမှာပါ။ အခုက ပွဲစားတွေက ကြုံရာအေဂျင်စီနာမည်သုံးပြီး ဆေးကြိုစစ်ခိုင်းတယ်။ တကယ်အလုပ်အပ် တဲ့ အေဂျင်စီနဲ့ ဆေးစစ်ထားတဲ့ အေဂျင်စီမတူရင် မလေးရှားနိုင်ငံ FWCMS က ခွင့်မပြုဘူး။ အဲဒီတော့ ကလေးတွေ ဆေးထပ်စစ်ရတော့ နှစ်ခါကုန်တယ်”လို့ သူက ပြောပါတယ်။
မြန်မာနိုင်ငံပြည်ပအလုပ်အကိုင်ဝန်ဆောင်မှု လုပ်ငန်းရှင်များအဖွဲ့ချုပ်အနေနဲ့ ကျန်းမာရေးစစ်ဆေးတာတွေ လုပ်ဆောင်နိုင်ဖို့ ဧရာ Medical Centre၊ Elotus Medical Laboratory & Diagnastics၊ ထက်မာန် ရောဂါရှာဖွေရေးနှင့် အထူးကုဆေးခန်း၊ ကုန်းဘောင် Health Centre၊ လမင်း Medical Clinics၊ မိုးသီး အထွေထွေရောဂါကုဆေးခန်းနှင့် ဆေးရုံ၊ Sabaidee Special Clinic နဲ့ ရွှေဘုံစံ Medical Centre စတဲ့ ဆေးရုံ၊ ဆေးခန်း (၈) ခုစာရင်းကို ထုတ်ပြန်ထားပါတယ်။
ချိတ်ဆက်ထားတဲ့ဆေးရုံ၊ဆေးခန်းတွေအနေနဲ့လည်း နှစ်နိုင်ငံ ကျန်းမာရေးဝန်ကြီးဌာနတွေကချမှတ်ထားတဲ့ စည်းမျဉ်း၊ စည်းကမ်း စံသတ်မှတ်ချက်တွေနဲ့အညီ လုပ်သားတွေကို ကျန်းမာရေးဆေးစစ်ပေးတာ၊ ဆေးအောင်လက်မှတ်အမြန်ဆုံးထုတ်ပေးတာ၊ သတ်မှတ်ထားတဲ့စျေးနှုန်းအတိုင်းသာ ငွေကြေးကောက်ခံတာနဲ့ အေဂျင်စီကမသိရှိဘဲ လာရောက်ဆေးစစ်တဲ့ ပွဲစားတွေကို လက်ခံတာတွေ မလုပ်ဆောင်ဖို့ သဘောတူညီထားတယ်လို့လည်း သိရပါတယ်။
“စထွက်မယ်ပြောကတည်းက ဆေးစစ်တာတွေ လုပ်ထားတယ်။ ပိုက်ဆံလည်း ပေးထားတာပဲ။ ဘယ်တော့ ထွက်ရမလဲသာ မသိရတာ။ ဆေးစစ်တာကလည်း သူတို့ခေါ်တဲ့နေရာ လိုက်ရတာပါပဲ။ ကျွန်တော်တို့လည်း ဘာမှမသိတော့ သူတို့ပြောတဲ့အတိုင်း လုပ်နေရတာပဲ” လို့ မလေးရှားနိုင်ငံကို သွားရောက်လုပ်ကိုင်လိုသူတစ်ဦးက ပြောပါတယ်။
လက်ရှိအချိန်မှာတော့ မလေးရှားနဲ့ ထိုင်းနိုင်ငံကို သွားရောက်လုပ်ကိုင်လိုသူတွေ များပြားနေပြီး ငွေကြေးလိမ်လည်ခံရတာတွေ၊ သတ်မှတ်ဝန်ဆောင်ခထက် ပိုမိုကုန်ကျတာတွေရှိနေတယ်လို့ ပြည်ပအလုပ်အကိုင်ရှာဖွေရေးအေဂျင်စီတွေဆီက သိရပါတယ်။
#MyanmarLabourNews