ထိုင်းနိုင်ငံသို့ MOU ဖြင့်သွားရောက်လုပ်ကိုင်ရတဲ့ မြန်မာအလုပ်သမားများအနက် စာချုပ်ပါအလုပ်မဟုတ်တဲ့ အလုပ်တွေကိုသာလုပ်ကိုင်ရမှုတွေ များပြားလာတာကြောင့် အလုပ်သမားအခွင့်အရေးချိုးဖောက်မှုတွေကြုံလာရတယ်လို့ သိရပါတယ်။
MoU စာချုပ်အရ ရော်ဘာနှင့်ပတ်သက်တဲ့ကုန်ချောလုပ်ငန်းလုပ်ရမယ်လို့ စာချုပ်ထားပေမဲ့ စက်ရုံကိုရောက်ရှိလုပ်ကိုင်ရချိန်မှာတော့ တောရှင်းရတဲ့အလုပ်၊ ဆောက်လုပ်ရေးနဲ့ပတ်သက်တဲ့ ပန်းရံအလုပ်တွေအပြင် အလုပ်ရှင်ကခိုင်းသမျှအလုပ်တွေကိုလုပ်ရခြင်းတွေဟာ စာချုပ်ပါအချက် အလက်တွေနဲ့ဆန့်ကျင်နေတာဖြစ်တယ်လို့ထိုင်းရောက်အလုပ်သမားတွေထံမှ သိရပါတယ်။
"ဒီလိုကိစ္စတွေက ခဏခဏဖြစ်တယ်။ ခုနောက်ပိုင်းဆိုပိုများလာတယ်။ အချို့ဆိုရင် အလုပ်မတူတာတင်မကဘူး။ အလုပ်မရသေးဘဲ ထိုင်စောင့်နေရတာတွေပါဖြစ်တယ်။ အလုပ်သမားတွေနစ်နာတယ်။ စာချုပ်ပါအချက်အလက်တွေနဲ့ ကွဲလွဲမှုတွေ အလုပ်ခေါ်စာကွဲလွဲမှုတွေအပေါ် မြန်မာဘက်က၀န်ကြီးဌာနက သေချာစစ်ဆေးမှုတွေပြုလုပ်တာ အားနည်းခဲ့လို့ဖြစ်ရတာ"လို့ ထိုင်းရောက်မြန်မာအလုပ်သမားအရေးဆောင်ရွက်သူ တစ်ဦးက ပြောပါတယ်။
အလားတူယခုလတ်တလောအတွင်း ရာဘာခြံ၌လုပ်ကိုင်ရန်စာချုပ်ခဲ့တဲ့ မြန်မာအလုပ်သမား၁၅ဦးဟာလည်း စာချုပ်ပါအလုပ်မဟုတ်ဘဲ ဓာတုပစ္စည်းများနှင့်ထိတွေ့ရတဲ့ ကျန်းမာရေး ထိခိုက်စေတဲ့ လုပ်ငန်းတွေကိုသာ လုပ်ကိုင်ရတာကြောင့် ဆက်လက်မလုပ်ကိုင်နိုင်တော့ဘဲ အလုပ်သမားတစ်ဦးလျှင် ဘတ်လေးထောင်နှုန်းဖြင့် အလုပ်သမား၁၅ဦးစာ ဘတ်ခြောက်သောင်းတိတိကို အလုပ်ရှင်ထံလျော်ကြေးပေးကာ ပြန်လည်ထွက်ခဲ့ရတယ်လို့လည်း သိရပါတယ်။
အဆိုပါဖြစ်စဉ်များကြောင့်ပင် မြန်မာအလုပ်သမားတွေဟာ အလုပ်ရှင်မတူခြင်းနဲ့ လုပ်ငန်းမတူခြင်းတွေကြောင့် ရသင့်ရထိုက်တဲ့လစာမရရှိခြင်း အလုပ်သမားအခွင့်အရေးချိုးဖောက်ခံရခြင်းတွေအပြင် တရားမ၀င်အလုပ်သမားအဖြစ်ရောက်ရှိခြင်းတွေအထိပါ ဖြစ်နိုင်တာကြောင့် MoU လုပ်သားတွေအပေါ် စေလွှတ်ပေးတဲ့အေဂျင်စီတွေအနေနဲ့အထူးတလည် ကရုစိုက်ပေးဖို့အပြင် တာ၀န်ယူမှုတာ၀န်ခံမှုအပြည့်အ၀ လုပ်ဆောင်ပေးရန်လိုအပ်တယ်လို့ ထိုင်းရောက်မြန်မာအလုပ်သမားတစ်ဦးက ဆိုပါတယ်။
MyanmarLabourNews