စစ်ကိုင်းတိုင်း ကလေးမြို့နယ် တောင်ပိုင်းဒေသမှာ ဒေသခံကာကွယ်ရေး အဖွဲ့တွေနဲ့ စစ်ကောင်စီတပ်အကြား မေလအစပိုင်းက တိုက်ပွဲပြင်းထန်ဖြစ်ရာမှာ အရှေ့စည်းရွာ အိမ်ခြေ (၅၀၀) ကျော် မီးရှို့ခံရတယ်လို့ ဒေသခံတွေကပြောပါတယ်။
စုစုပေါင်း အိမ်ခြေ ၈၀၀ နီးပါးရှိ ရွာကြီးဖြစ်ပြီး အိမ်ခြေ ၅၀၀ ကျော်မီးလောင် ပျက်စီးခဲ့ရတယ်လို့ ဒေသခံတွေက ပြောပါတယ်။လက်ရှိမှာ စစ်ဘေးရှောင်နေရတဲ့ အိမ်ထောင်စုပေါင်း ၅၀၀ ကျော်ရှိပြီး စားနပ်ရိက္ခာ ဆေးဝါးနဲ့ မိုးရာသီဆိုင်ရာ အသုံးအဆောင်တွေအကူအညီလိုအပ်နေတယ်လို့ ဆိုပါတယ်။
"လက်ရှိကျတော်တို့ လူဦးရေ ၃၄၀၀ ကျော်ကို အစားအသောက်နဲ့ ရိက္ခာတွေ ပံ့ပိုးပေးနေပါတယ်။အဆင်ပြေလားဆိုတော့ မပြေဘူးပြောရမှာပဲ စားရေးသောက်ရေးက ထိုက်သလောက်တော့ အလှူရှင်တွေက လှူကြပါတယ်။ အဝတ်အထည်တွေ ဆန်အဓိကပေါနော်လှူကြတာ စစ်ဘေးဒုက္ခသည်တွေအတွက် အခုလိုအပ်နေတာက ခြုံစောင် တို့ ခြင်ထောင်တို့ပေါ့နော် မိုးကာတို့ အဲ့တာလေးတွေ လိုနေတာပေါ့နော်။ မိုးရာသီဖြစ်တော့ ခြင်ကလည်းတော်တော်လေး ပေါတော့ ခြင်ထောင်တွေ ဘာတွေ ဆေးဝါးတို့ လိုအပ်တယ် လို့ အရှေ့စည်းဒေသခံတစ်ဉီးက ပြောပါတယ်။
အဆိုပါ ဒေသမှာ အင်တာနက်နဲ့ ဖုန်းလိုင်းတွေဖြတ်တောက်ထားတာ လနဲ့ချီရှိနေပြီး ရွာမီးရှို့ခံရစဉ်က စပါးကျီတွေပါ မီးရှို့ခံရပြီး အစားအသောက် အဝတ်အထည်စတာတွေယူဆောင်နိုင်ခဲ့ခြင်းမရှိဘူးလို့ ဆိုပါတယ်။
"မြောက်စည်းဆိုရင် ရဲစခန်းနဲ့နီးတော့ မြောက်စည်းနဲ့ အရှေ့စည်းဆိုတာက ချောင်းလေးပဲခြားတာ အဲ့ဒီမှာ ကြားနေရတဲ့သတင်းတွေဆိုရင် ဘေးရွာတွေကနေ သွားရင် အရှေ့စည်းဆိုဘာမှမပို့နဲ့ လုံးဝလက်မခံဘူးဆိုတာမျိုးတွေ စားနပ်ရိက္ခာပိုင်းတွေ ဖြတ်တောက်ထားတာရှိတယ် အဲ့လိုလုပ်ထားတော့ ကျနော်တို့က အလှူရှင်တွေပေးပို့တဲ့ဟာကို ရောက်ရင်ရောက်သလို လူတွေလက်ထဲရောက်အောင် ပရဟိတအနေနဲ့ လုပ်ပေးနေတယ်ပေါ့ မီးလောင်တုန်းက ပစ္စည်းတွေက ဘာမှ မယူလိုက်ရဘူးလေ လူလွတ်အောင်ပဲ ထွက်ပြေးခဲ့ရတာဆိုတော့ ဘာမှမကျန်တော့ဘူးလို့ အဆိုပါ ဒေသခံဖြစ်သူက ပြောပါတယ်။
အရှေ့စည်းရွာသည် စစ်ကိုင်းတိုင်းဒေသကြီး အစွန်ဆုံးဒေသရှိ ကျေးရွာ တစ်ရွာဖြစ်ပြီး ကလေးမြို့တောင်ပိုင်းမှာ တိုက်ပွဲများဖြစ်ပွားပြီးနောက် ရှားဖို၊ တင်သား၊ ရှေရှင်၊ လည်ခြား၊ ကုက္ကိုလ်၊ ရှားတောစတဲ့ ရွာတွေမှာလည်း မီးရှို့ခံခဲ့ရပြီး ရွာလုံးကျွတ်အိုးမဲ့အိမ်မဲ့ ဖြစ်တာနဲ့ အိမ်ထောင်စုပေါင်း ထောင်နဲ့ ချီ ထွက်ပြေးတိမ်းရှောင်နေရတယ်လို့ သိရပါတယ်။
