မြန်မာနိုင်ငံ အတွင်းသို့ ၂၀၂၃ ခုနှစ်အောက်တိုဘာလမှစ၍ ၂၀၂၅ ခုနှစ်၊ နိုဝင်ဘာလအထိ ၂ နှစ်ကျော်အတွင်း တရားမဝင် ဝင်ရောက်လာတဲ့ နိုင်ငံခြားသား ဦးရေ ၇၀၀၀၀ ခန့် ရှိတယ်လို့ စစ်ကော်မရှင်ရဲ့ နိုင်ငံခြားရေးဝန်ကြီးဌာန၊ ပြည်ထောင်စုဝန်ကြီးဦးသန်းဆွေကပြောကြားပါတယ်။
နိုင်ငံပေါင်း ၅၂ နိုင်ငံ က နိုင်ငံခြား သား (၆၇,၉၈၂)ဦး ဟာ ပြည်တွင်း ကို တရားမဝင် ဝင်ရောက် လာတဲ့ အတွက် ဖမ်းဆီးခဲ့ကာ ၎င်းတိုကို သက်ဆိုင်ရာ နိုင်ငံ များသို့ ပြန်လည်လွှဲပြောင်းခဲ့တယ်လို့ ဆိုပါတယ်။
၎င်းတို့ဟာ အိမ်နီးချင်းနယ်စပ်လမ်းကြောင်းများကနေ တရားမဝင် ဝင်ရောက်လာပြီး ကရင်ပြည်နယ်၊ မြဝတီမြို့၊ မဲ့ထော်သလေး KK Park နယ်မြေများ မှာ အခိုင်အမာအခြေချ၍ အွန်လိုင်းလိမ်လည်မှုများကျူးလွန်နေသည့်ဂိုဏ်းတွေမှာ အလုပ်လုပ်ကိုင်ကျသူတွေ ဖြစ်တယ်လို့ ဆိုပါတယ်။
မြန်မာနိုင်ငံ ကို တရားမဝင် ဝင်ရောက်သူများရဲ့ (၉၉ ဒသမ၅)ရာခိုင်နှုန်းဟာ အိမ်နီးချင်းနိုင်ငံများက တစ်ဆင့် ကုန်းလမ်းမှဝင်ရောက်လာခြင်းဖြစ်တယ်လို့ စစ်ကော်မရှင်ရဲ့နိုင်ငံခြားရေးဝန်ကြီးဌာန၊ ပြည်ထောင်စုဝန်ကြီးဦးသန်းဆွေကပြောပါတယ်။
ယခုနှစ်ဇန်နဝါရီ၃၀ရက်မှ နိုဝင်ဘာ၁၁ရက်အထိ မြန်မာနိုင်ငံအတွင်းသို့ တရားမဝင် ဝင်ရောက်လာတဲ့ နိုင်ငံခြားသား ၁၀၈၁၅ ကို စစ်ဆေးဖေါ်ထုတ်ခဲ့ပြီး ၉၅၃၆ဦး ကို ထိုင်းနိုင်ငံကနေတစ်ဆင့် သက်ဆိုင်ရာနိုင်ငံ တွေအလိုက် ပြည်နှင်ဒဏ်ပေး လွှဲပြောင်းပေးခဲ့ကာ ကျန်ရှိတဲ့ ၁၂၇၉ဦးကိုလည်း သက်ဆိုင်ရာ နိုင်ငံ အလိုက် လွှဲပြောင်းပေးဖို့ အသင့်ဖြစ်နေပြီလို့ စစ်ကော်မရှင်က ထုတ်ပြန်ထားပါတယ်။
