၀င်ငွေရရှိမှု ကွာဟချက်ကြောင့် ပြည်ပထွက်ခွာသူများပြား၊ ပြည်တွင်းလုပ်ငန်းအချို့လုပ်သားရှာ

လုပ်သားတစ်ဦး ရရှိတဲ့ ဝင်ငွေ ကွာဟမှုကြောင့် ပြည်ပ ကို သွားရောက် လုပ်ကိုင်သူများ လာတဲ့ အတွက် ပြည်တွင်း လုပ်ငန်း အချို့မှာ လုပ်သားရှားပါး လာတဲ့ အခက်ခဲ ကြုံတွေ့လာရတယ်လို့ ပြည်တွင်း လုပ်ငန်းရှင်တွေထံ က သိရပါတယ်။

စစ်အာဏာ သိမ်းပြီး နောက်ပိုင်း မြန်မာ့ငွေတန်ဖိုး ကျလာတာနှင့် အမျှ လုပ်ခလစာ ရရှိ မှု နဲ့ ပြည် တွင်း ကုန်ဈေးနှုန်း တက်လာတဲ့ ပမာဏ တွေကြောင့် ပြည်ပ ကိုသွားရောက် အလုပ်လုပ်သူဟာ ယခင် ထက် ထက်ဝက်ကျော် များလာတယ်လို့ ဆိုပါတယ်။

 ''ကျွန်မတို့ ရွာမှာ ဆိုရင် ထန်းတက် လုပ်သား မရှိတော့ဘူး အခု ထန်းတတ်နေတဲ့ သူတွေက အသက် ၄၀ကျော် ၅၀ နီးပါးတွေ အခုမျိုးဆက်သာ ပြီးရင်တော့ထန်းတတ်တဲ့သူရှိမှာမဟုတ်တော့ဘူး ရွာမှာ ရှိတဲ့ လူငယ်တွေက ပြည်ပ ကို အလုပ်သွား လုပ်ကျတာများတယ် ဒီမှာ ရတဲ့ ဝင်ငွေနဲ့ ကုန်ဈေးနှုန်းနဲ့ က မကာ မိဘူး စုဖို့ မပြောနဲ့ စားဖို့တောင် အနိုင် နိုင်လေ အဲ့တော့ ပြည်ပ ကို ထွက်ပြီး အလုပ်လုပ်ကျတာပေါ့ ''ဟု ညောင်ဦးမြို့နယ်မှ ထန်းတောပိုင်ရှင် တစ်ဦးကပြောပါတယ်။

လုပ်သားရှားပါးမှု မှာ စိုက်ပျိုးရေး၊မွေးမြူရေးလုပ်ငန်းတွေမှာသာမက စက်မှုလုပ်ငန်းတွေမှာလဲ လုပ်သားရှားပါးမှု နှင့်ကြုံတွေ့နေရတယ်လို့ သိရပါတယ်။

 '' အရင်က အထည်ချုပ် မိန်းကလေး လုပ်သား အရမ်းများတယ်၊အခုဆိုရင် အထည်ချုပ်ကျွမ်းကျင် လုပ်သားဆို အတော်ကိုရှားတယ်၊ထိုင်းမှာ အထည်ချုပ်နဲ့ ပဲ သွား လုပ်ကျတာ အလုပ်ချင်းတူပေမယ့် ဟိုမှာက တစ်ရက် ကို မြန်မာငွေနဲ့တွက်ရင် အိုတီမပါ ဘဲတောင် သုံးသောင်းကျော်လောက်ရတယ်၊ဒီမှာက အခြေခံလစာ ၄၈၀၀ ကျပ် နဲ့ ဘာကြေး ညာကြေးပေါင်းမှ တစ်သောင်းလောက်ရတာ ၊အဲ့တော့ လူငယ်တွေအနေနဲ့ ထွက်ကျပြီပေါ့''ဟု လှိုင်သာယာအထည်ချုပ်စက်ရုံတစ်ခုတွင် စူပါ လုပ်နေသူ အလုပ်သမားတစ်ဦးကပြောပါတယ်။

လက်ရှိတွင် တစ်လ လျှင် ပျမ်းမျှအနေဖြင့် ထိုင်းနိုင်ငံ ကို တစ်ထောင်ကျော်၊ မလေးရှား နိုင်ငံ ကို ၂၀၀ ကျော်၊ဂျပန် နိုင်ငံ ကို ၅၀၀ကျော် ၊ကိုရီယား နိုင်ငံ ကို ၅၀၀ကျော် နှင့် အခြား နိုင်ငံ တွေကို လည်း သွားရောက်ပြီး၊တရားမဝင် သွားရောက်သူများလဲနေ့စဉ် ရှိနေကြောင်း သိရပါတယ်။

#MyanmarLabourNews