ပြဌာန်းထားတဲ့ ဥပဒေပါ ခွင့်ရက်တွေအတိုင်း အလုပ်သမားတွေရရှိဖို့ လုပ်ဆောင်ပေးနေတယ်လို့ အလုပ်သမား ဝန်ကြီးဌာန၊ ဒုတိယဝန်ကြီး ဦးဝင်းရှိန်က ပြောဆိုခဲ့ပေမယ့် လက်ရှိမှာတော့ စက်ရုံအများစုမှာ ဥပဒေပါခွင့်ရက် တွေ ရယူဖို့တောင်ခက်ခဲနေတယ်လို့ အလုပ်သမားတွေက ပြောပါတယ်။
အလုပ်သမားဝန်ကြီးဌာန၊ ဒုတိယဝန်ကြီးက ဇွန်လ(၂၄)ရက်က ရန်ကုန်တိုင်းဒေသကြီး၊ ကျွမ်းကျင်မှုလေ့ကျင့်ရေး သင်တန်းကျောင်း (ရန်ကင်း) မှာ ပြုလုပ်ခဲ့တဲ့ လူငယ် လူရွယ်များ အလုပ်အကိုင်အခွင့်အလမ်း ရရှိရေးအတွက် လေအေးပေးစက်ပြုပြင်တပ်ဆင်ခြင်းသင်တန်းနှင့် စားသောက်ဆိုင်ဝန်ဆောင်မှုသင်တန်းဖွင့်ပွဲ အခမ်းအနားမှာ အခုလိုပြောဆိုခဲ့တယ်လို့ သတင်းထုတ်ပြန်ထားပါတယ်။
ဒုဝန်ကြီးက ပြောဆိုရာမှာတော့ လုပ်သက်ခွင့်၊ ရှောင်တခင်ခွင့်၊ ဆေးလက်မှတ်ခွင့်နဲ့ မီးဖွားခွင့်တို့ကို ဥပဒေနဲ့အညီ ခံစားရရှိစေဖို့ လုပ်ဆောင်ပေးနေတယ်လို့ ဆိုပါတယ်။
ဒါပေမယ့် စစ်တပ် အာဏာသိမ်းပြီးနောက်ပိုင်းမှာတော့ စက်ရုံ အလုပ်ရုံတွေက အလုပ်သမားတွေပါ ဥပဒေပါခွင့်ရက်တွေကို ရယူဖို့ ခက်ခဲလာတာပဲ ဖြစ်ပါတယ်။
ဒီအခြေအနေဟာ စက်ရုံအများစုမှာ ဖြစ်ပေါ်နေတာဖြစ်ပြီး အလုပ်သမားဝန်ကြီးဌာနကလည်း ဥပဒေပါ အခွင့်အရေးတွေ ချိုးဖောက်ခံနေရတာကိုလည်း အရေးယူဖြေရှင်းပေးမှုလည်း အားနည်းနေပါတယ်။
“ခွင့်ခံစားခွင့်တွေက ဘာမှမရပါဘူး။ ရှောင်တခင်ခွင့်လည်း မရဘူး။ လူမှုဖူလုံရေးဆေးခွင့်ယူရင် (၄၈၀၀) အဖြတ်ခံရပါတယ်။ ပြောမယ်ဆို ဘယ်လိုခွင့်ပဲယူယူ ဒေးကြေးဖြတ်တောက်ခံရပါတယ်”လို့ LITA MYANMAR အထည်ချုပ်စက်ရုံက အလုပ်သမားတစ်ဦးက ပြောပါတယ်။
စစ်အာဏာသိမ်းပြီးနောက်ပိုင်းမှာ အလုပ်သမားဝန်ကြီးဌာနဟာ ဥပဒေပါ ခံစားခွင့်တွေကို အလုပ်သမားတွေ ချိုးဖောက်ခံရတာ၊ အဓမ္မခိုင်းစေခံရတာ စတာတွေကိုလည်း အရေးယူဖြေရှင်းပေးမှု မရှိတော့ဘူးလို့ အလုပ်သမားအရေးဆောင်ရွက်သူတွေက ဝေဖန်ပြောဆိုနေကြပါတယ်။
