အင်တာနက်ပေါ်မှတစ်ဆင့်  ဒေါ်လာအရောင်းအဝယ်လုပ်ကိုင်နေသူများက စျေးတက်ရန် ဒေါ်လာဈေးကစားနေတယ်လို့ စွပ်စွဲကာ အွန်လိုင်းမှဒေါ်လာရောင်းဝယ်သူများကို ဖမ်းဆီးအရေးယူမယ်လို့ စစ်ကောင်စီက ခြိမ်းခြောက်လိုက်ပါတယ်။

''သူတို့ဘယ်လိုပဲခြိမ်းခြောက်နေနေ ရောင်းနေကြမှာပဲ။ သူတို့ကလည်း သူတို့သတ်မှတ်စျေးနဲ့ထုတ်ရောင်းမပေးဘူး။ ဒေါ်လာအရမ်းရှားနေမှတော့ စျေးတက်မှာပဲ။ မှောင်ခိုစျေးကွက်ကရှိနေမှာပဲ မပျောက်သွားဘူး''လို့ ဒေါ်လာဖြင့်လုပ်ငန်းလည်ပတ်နေသူလုပ်ငန်းရှင်တစ်ဦးက ဆိုပါတယ်။

ကျပ်ငွေတန်ဖိုးကျဆင်းရခြင်းနဲ့ပတ်သက်ပြီးဒါဟာ အမေရိကန် ဗဟိုဘဏ် အတိုးနှုန်းဆက်တိုက်မြှင့်တင်နေခြင်း၊ သတင်းမီဒီယာများက ဒေါ်လာဈေးတက်အောင် ရေးသားခြင်းတွေနဲ့ အွန်လိုင်းကနေအရောင်းအဝယ်ပြုလုပ်ခြင်းတွေကြောင့် အခုလို မြန်မာကျပ်ငွေတန်ဖိုးကျနေခြင်းဖြစ်တယ်လို့ စစ်ကောင်စီ၏ဗဟိုဘဏ်က ထုတ်ပြန်ကြေငြာလိုက်တာပါ။

လက်ရှိမှာရွှေဈေး၊ ဒေါ်လာနှင့် စက်သုံးဆီဈေး နေ့စဉ်မြင့်တက်နေပြီး ဩဂုတ်၂၈ရက်ညအထိ တစ်ဒေါ်လာကို ၃၂၀၀ကျော်အထိ မြင့်တက်နေကာ ပြင်ပစျေးကွက်မှာ အရောင်းဝယ်ဖြစ်နေတယ်လို့ သိရပါတယ်။

ထို့အပြင် ထိုင်းဘတ်ငွေလဲနှုန်းမှာလည်း ၁ ဘတ်လျှင် ကျပ် ၁၀၀ နီးပါးအထိကျပ်တန်ဖိုးကျဆင်းသွားပြီး အလာတူတရုတ်ငွေ တစ်ယွမ်ကို မြန်မာကျပ်ငွေ ၄၅၀အထိ မြင့်တက်နေတာပဲဖြစ်ပါတယ်။

အခုလိုကျပ်ငွေတန်ဖိုးကျဆင်းနေမှုကို ဖြေရှင်းရန် စစ်ကောင်စီဗဟိုဘဏ်ကလုပ်ငန်းရှင်များကိုခေါ်ယူဆွေးနွေးမှုတွေ စစ်ဆေးကြပ်မတ်မှုတွေလုပ်နေတယ်လို့လည်း သိရပါတယ်။

MyanmarLabourNews