အိုမန် နိုင်ငံ မှာ အိမ်အကူလုပ်နေတဲ့ မြန်မာလုပ်သားတွေရဲ့ လစာငွေ သိန်းထောင်ချီ ကို အိုမန်-မြန်မာ ငွေလွှဲ ဝန်ဆောင်မှု လုပ်နေသူ မြန်မာအမျိုးသမီး တစ်ဦးက လိမ်လည်သွားတယ်လို့ နစ်နာသူ မြန်မာအလုပ်သမားတွေ ထံ မှ သိရပါတယ်။
ငွေလွှဲဝန်ဆောင်မှု လုပ်ကိုင်တဲ့ မြန်မာအမျိုးသမီးနဲ့မိသားစု တွေဟာအိုမန်ရောက် မြန်မာလုပ်သားတွေရဲ့ လစာငွေ တွေ ကို လုပ်သားတွေရဲ့မိသားစုထံ မလွှဲပေးဘဲ လိမ်လည်ခိုးယူသွားတာ မှာ စုစုပေါင်း ကျပ်သိန်း ၅၀၀၀ ဝန်းကျင်ခန့်ရှိတယ်လို့ အလိမ်ခံရသူ မြန်မာလုပ်သားတွေကပြောပါတယ်။
"ကျွန်မက ၁၀ သိန်းကျော်ပါသွားတာ တချို့ ဆို သိန်း ၅၀လောက်ပါသွားတဲ့ သူတွေရှိတယ် အခုလိမ်သွားတဲ့သူက ငွေလွှဲ လုပ်နေတာကြာပြီ သူက ငွေလွှဲ အပြင် ပစ္စည်း KG ပို့ပေးတာပါလုပ်တယ် မြန်မာဘက်မှာက သူ့အဖေ နေပြီး အိုမန်မှာ က သူနေတယ် အခု သူကိုရော သူ့အဖေကိုရော ဆက်သွယ်လို့ မရတော့ဘူး ဖုန်းတွေဆက်ပိတ်ပြီးရန်ကုန် ၁၀မိုင်ကုန်း မှာလည်း သူ့အဖေနဲ့မိသားစု တွေလည်းမရှိတော့ဘူးလ်ို့ သိရတယ်""လို့ နစ်နာသူ မြန်မာလုပ်သားကပြောပါတယ်။
ယခု အလိမ်ခံရမှု တွင် အိမ်အကူလုပ်သားတွေရဲ့ လစာငွေတွေ၊ တစ်ဆင့် ခံ ငွေလွှဲ လုပ်သူတွေရဲ့ ငွေကြေးတွေအပါအဝင်လုပ်သားတွေနဲ့ မိသားစုဝင်တွေက ပို့ဆောင်ခိုင်းသည့် ပစ္စည်းတွေပါ ယူဆောင်သွားတယ်လို့ သိရပါတယ်။
""အခုအိမ်အကူလေးတွေရဲ့ လစာပိုက်ဆံတွေ သူရဲ့လက်ခွဲ ပိုက်ဆံကောက်ပေးတဲ့သူတွေဆီက ငွေတွေ နဲ့ ပို့ခိုင်းတဲ့ပစ္စည်းတွေပါသွားကျတာ ကျွန်မတို့ အိုမန်မှာ ချွေးဒီးဒီးကျ ပင်ပန်းဆင်းရဲစွာနဲ့ ရှာထားရတဲ့ လစာငွေ တွေကို သူတို့မို့ လုပ်ရက်တယ် ဒီငွေတွေဟာ ကျွန်မတို မျက်ရည်တွေပါ ငွေပါသွားတဲ့ အိမ်အကူ လုပ်သားတချို့ဆို မစားနိုင်မအိပ်နိုင်တွေဖြစ်ပြီး စိတ်ဆင်းရဲနေကျရတယ် တချို့ဆို အိမ်က မိဘ တွေ ဆေးကုဖို့ လှမ်းလွှဲပေးတဲ့ငွေတွေ ပါသွားတာ ဆေးလည်းမကုနိုင် နဲ့ အတော်လေးသောကရောက်နေရတယ်""လို့ ငွေကြေးအလိမ်ခံရသူမြန်မာအိမ်အကူလုပ်သားတစ်ဦးကပြောပါတယ်။
လက်ရှိမှာ လုပ်ခလစာငွေတွေ အလိမ်ခံရသူတွေ က ငွေကြေးလိမ်လည် သွားသူတွေ ကို ဓါတ်ပုံနဲ့အတူ လူမှုကွန်ယက်ကနေ အများပြည်သူသိရှိစေဖို့ လုပ်ဆောင်တာတွေရှိနေပေမယ့် အမှုဖွင့် တိုင်ကြားတာမျိုး ပြုလုပ်တာ မတွေ့ရှိရသေးပါဘူး။
စစ်တပ်အာဏာသိမ်းပြီးနောက်ပိုင်း အခုလို ငွေလွှဲ လုပ်ငန်း လုပ်ကိုင်နေသူတွေက ပြည်ပနိုင်ငံရောက် မြန်မာလုပ်သားတွေရဲ့ လုပ်ခလစာငွေ တွေ ကို မိသားစု တွေထံ မလွှဲ ပေးဘဲ လိမ်လည် ထွက်ပြေးတာတွေ မကြာခဏဆိုသလို ဖြစ်ပေါ်နေပေမယ့် ကျူးလွန်သူတွေ ကို ဖမ်းဆီးအရေးယူ တာမျိုး အလွန်နည်းပါးကြောင်း တွေ့ရှိရပါတယ်။
