ရွှေပြည်သာမြို့နယ်တရားရုံးမှာ တရားစွဲဆိုခြင်းခံထားရတဲ့ YFA စက်ရုံပိုင်ရှင်ဟာ တရားရုံးက ဆင့်ခေါ်ထားတဲ့ ရုံးချိန်း လေးချိန်းလုံးပျက်ကွက်ခဲ့တာဖြစ်ပြီး လာမဲ့ရုံးချိန်းမှာတော့ ကြားဖြတ်အမိန့်ချမှတ်တော့မှာဖြစ်တယ်လို့ အလုပ်သမားဘက်က ကူညီဆောင်ရွက်ပေးနေတဲ့ သွေးစည်းညီညွတ်သောသမဂ္ဂများအဖွဲ့ချုပ်(STUM)ထံက သိရပါတယ်။
" အလုပ်သမားက တဖက်သက် စစ်ဆေးရန် တရားရုံးကိုလျှောက်လဲချက်တင်ခဲ့တယ်။ နောက်ရုံးချိန်း ၁၇-၃-၂၃ နေ့ တွင် တရားသူကြီးမှ ကြားဖြတ်အမိန့် တခု ချမှတ်ပေးပါမယ် မိုးအဆုံး၊ မြေအဆုံး ပြေးချင်သလောက်သာပြေးတော့" လို့ ယင်းကဆိုပါတယ်။
YFA စက်ရုံအလုပ်သမားဖြစ်တဲ့ မအိပိုပိုလှိုင်က တရုတ်နိုင်ငံသား စက်ရုံပိုင်ရှင်ကို အလုပ်ခန့်ထားမှုဆိုင်ရာသဘောတူစာချုပ်ချိုးဖောက်မှုအတွက် မြို့နယ်အလုပ်သမားရုံးရဲ့ခွင့်ပြုချက်နဲ့ အလုပ်ရှင်ကို ရွှေပြည်သာမြို့နယ်တရားရုံးမှာ ဇန်နဝါရီလ ၃၁ ရက်က တရားစွဲဆိုခဲ့တာကြောင့် ရုံးချိန်းချိန်းဆိုခဲ့ပေမဲ့ ရုံးချိန်းတိုင်းရောက်ရှိလာခြင်းမရှိဘဲ YFA အထည်ချုပ်ပိုင်ရှင်က မတ်လ ၈ ရက်နေ့ရဲ့ စတုတ္ထ မြောက်ရုံးချိန်း သို့ လာရန်လည်းထပ်မံပျက်ကွက်ခဲ့တာဖြစ်တယ်လို့ သိရပါတယ်။
အဲ့ဒီလိုပျက်ကွက်ခဲ့တာကြောင့် ရုံးချိန်းတက်ရောက်ခဲ့တဲ့အလုပ်သမားက တဖက်သက်စစ်ဆေးပေးဖို့ မတ်လ၈ရက်နေ့ကချိန်းဆိုခဲ့တဲ့ လေးချိန်းမြောက်ရုံးချိန်းမှာ တရားရုံးသို့လျှောက်တင်ခဲ့တာဖြစ်ပြီး လာမဲ့မတ်၁၇ရက်နေ့မှာတော့ အဲ့ဒီလျှောက်တင်မှုကို ကြားဖြတ်အမိန့်ချမှတ်ပေးမှာဖြစ်တယ်လို့ သိရပါတယ်။
YFAစက်ရုံဟာ အလုပ်သမားတွေကိုအကြောင်းမဲ့အလုပ်ထုတ်ပယ်မှုအတွက်လည်း အငြင်းပွားမှုတွေရှိနေတဲ့စက်ရုံဖြစ်သလို အလုပ်သမား ၁၅၀ ခန့်နဲ့လည်ပတ်နေတာဖြစ်ပြီး အထည်အော်ဒါနည်းတဲ့အကြောင်းပြချက်နဲ့ အလုပ်သမားဥပဒေအရ စက်ရုံပိတ်ရန်ကြိုတင်အသိမပေးဘဲ အလုပ်သမားတွေကို နို့တစ်ကြေးမပေးဘဲ ပြီးခဲ့တဲ့ ၂၀၂၂ နိုဝင်ဘာလကုန်က အလုပ်သမား ၁၅၀ နီးပါးကို အလုပ်ကရပ်စဲလိုက်တာပါ။
