ဧရာဝတီတိုင်း ၊ ပုသိမ်မြို့ အမှတ် ၁၃ရပ်ကွက်မှာရှိတဲ့ Chai Moon Sports (Myanmar) အထည်ချုပ်စက်ရုံမှာ အလုပ်ပိတ်ရက် အချိန်ပို OT မဆင်းပါက ဝမ်တိန်ထိုးရပြီး အလုပ်သမားအချို့အလုပ်ကနေ ထုတ်ပယ်ခံရတယ်လို့ သိရပါတယ်။
"အလုပ်ပိတ်ရက် OTမဆင်းရင် ဝမ်တိန် ထိုးရတယ်၊ အထည်အရမ်းအရေးကြီးတဲ့ရက်တွေဆို အောလင်းခေါ်တယ် အနားမပေးဘူး မနက်ဆက်ဆင်းရတယ် ၊ အထည်အရမ်းတောင်းတယ် အပေါ့အပါးသွားချိန်တောင်မရှိဘူး အထည် ချုပ်ရတယ် ၊ Ot တွေလည်းဆက်တိုက်ခေါ်တယ် OT ခေါ်မယ်ဆို လက်မှတ်ကောက်တယ် လက်မှတ်မထိုးရင် အပြောဆိုခံရတယ်"လို့ အလုပ်သမားကပြောပါတယ်။
လုပ်ငန်းခွင်မှာ ခွဲခြားဆက်ဆံမှုတွေရှိပြီး လွယ်လွယ်ကူကူအလုပ်ထုတ်ပစ်တာတွေကြောင့်လည်း အလုပ်အကိုင်အာမခံချက် ပျောက်ဆုံးနေရတယ်လို့ အလုပ်သမားတွေကပြောထားပါတယ်။
"လိုင်းချိန်းစူပါ ဒေါ် ---- က အလုပ်သမားတွေပေါ် ခွဲခြားဆက်ဆံတယ် အမြင်မကြည်တဲ့သူတွေကို အလုပ်ထုတ်ပြစ်တယ် တစ်ရက်နှစ်ရက်ကြာရင် လူသစ်တွေ ပြန်ခေါ်တယ် ၊အလုပ်သမားတွေပေါ်ကိုလည်း ရိုင်းစိုင်းစွာ ပြောဆိုဆက်ဆံတယ်လို့ " အဆိုပါစက်ရုံမှ အလုပ်သမားတစ်ဦးက ပြောဆိုပါတယ်။
ChaiMoon Sport(Myanmar) အထည်ချုပ်စက်ရုံဟာ လူဦးရေ ၇၀၀ ဝန်းကျင်နဲ့ KARRIMOR , CAMPRI Brands တွေကိုချုပ်လုပ်နေပြီး Haker ရုံခွဲလို့သိရပါတယ်။
စက်ရုံတာဝန်ရှိသူတွေအနေနဲ့လည်း ဒီလိုလုပ်ဆောင်နေတာတွေကို တာဝန်ယူဖြေရှင်းပေးဖို့ အလုပ်သမားတွေက လိုလားနေပါတယ်။
