မြန်မာပေါင်ချိန်ဖိနပ်စက်ရုံက အလုပ်ထုတ်ခံထားရတဲ့အလုပ်သမားတွေကို ပြန်ခန့်ဖို့ အော်ဒါအပ်တဲ့ adidas က ပြောထားပေမယ့် စက်ရုံဘက်ကတော့ လက်ရှိအချိန်ထိ တုံ့ပြန်မှုမရှိသေးဘူးလို့ အဲဒီစက်ရုံအလုပ်သမားတွေထံကသိရပါတယ်။
" ခုထိဘာမှမတုံ့ပြန်သေးဘူး။ ထူးခြားမှုမရှိသေးဘူး။ ခုအလညမှာညှိနေတာက အလစကိုပြန်လွှဲထားပါတယ်။ လာမဲ့တနလာနေ့ အလစမှာရုံးချိန်းရှိပါတယ်" လို့ အလုပ်ထုတ်ခံရသူများထဲမှ အလုပ်သမားတစ်ဦးက ဆိုပါတယ်။
မြန်မာပေါင်ချိန်စက်ရုံမှ အလုပ်သမားတွေဟာ အနည်းဆုံးအခကြေးငွေတိုးမြှင့်ပေးဖို့တောင်းဆိုရာမှ အလုပ်သမား၂၆ဦး အလုပ်ထုတ်ခံခဲ့ရတာကြောင့် လုပ်ငန်းခွင်အတွင်းပြန်လည်၀င်ရောက်နိုင်ရန် အလစမှာ ရုံးအချိန်းသုံးချိန်းပြီးတဲ့အထိ စက်ရုံဘက် ကတိကျတဲ့ညှိနှိုင်းပြောဆိုမှုမရှိသေးဘဲ အလညကိုပြန်လည်လွှဲပြောင်းလိုက်တာလို့သိရပါတယ်။
ဒါ့အပြင် adidas ကလည်း စက်ရုံအနေနဲ့ တောင်းဆိုမှုပြုလုပ်နေစဉ် ခွင့်မဲ့သုံးရက်ပျက်ကွက်မှုနဲ့ အလုပ်ထုတ်ပယ်လိုက်တဲ့အလုပ်သမားတွေကို ပြန်လည်၀င်ရောက်ခွင့်ပြုပေးဖို့နို၀င်ဘာ၃ရက်နေ့ရက်စွဲနဲ့ထုတ်ပြန်ထားပေမဲ့ အဲ့ဒီ အမှတ်တံဆိပ်ကိုချုပ်လုပ်နေတဲ့ မြန်မာပေါင်ချိန်စက်ရုံဘက်က ယနေ့အထိ တုံ့ပြန်မှုမရှိသေးဘဲ လစ်လျူရှု့နေတယ်လို့ သိရပါတယ်။
အဆိုပါအလုပ်သမားတွေဟာ တစ်နေ့လုပ်ခကျပ် ၄၈၀၀ ကနေ ကျပ်၈၀၀၀ သို့ တိုးမြှင့်ပေးရန် တောင်းဆိုမှုအပေါ် ညှိနှိုင်းမှုမရှိတာကြောင့် လူစုလူဝေးဖြင့် စုပေါင်းတောင်းဆိုခဲ့ရာမှ အလုပ်သမား၂၉ဦး အလုပ်ထုတ်ခံခဲ့ရတာဖြစ်ပေမဲ့ အလုပ်သမား တစ်ဦးဟာ မိမိသဘောအရ လုပ်ငန်းခွင်မဝင်ဘဲ ထွက်သွားပြီး တစ်ဦးကလုပ်ငန်းခွင်ပြန်လည်ဝင်ရောက်နေတာကြောင့် စာရင်းအတိအကျအရ ၂၇ဦးသာကျန်ရှိနေပြိး အဆိုပါအလုပ်သမားများ လုပ်ငန်းခွင်မှာ ပြန်လည်ဝင်ရောက်ရန် ညှိနှိုင်းနေတာလို့ သိရပါတယ်။
မြန်မာပေါင်ချိန်ဖိနပ်စက်ရုံဟာ ရွှေပြည်သာမြို့နယ်၌ လုပ်သားဦးရေ ၇၀၀၀ ခန့်ဖြင့် adidas တံဆိပ်ဖိနပ် ချုပ်လုပ်နေတာဖြစ်ပြီး ထိုင်၀မ်နိုင်ငံရဲ့ကုမ္ပဏီကြီးတစ်ခုဖြစ်ပါတယ်။
ပြည်တွင်းမှာ ကုန်ဈေးနှုန်းမြင့် တက်မှုကြောင့် အခက်အခဲဖြစ်နေတဲ့ ၀န်ထမ်းများက သင့်တင့်မျှတတဲ့အနည်းဆုံးအခကြေးငွေတိုးမြှင့်ပေးရန် တောင်းဆိုခဲ့ကြတာဖြစ်ပါတယ်။
#MyanmarLabourNews
