ထိုင်းနိုင်ငံ၊ စလာဘူလီမြို့က စားသောက်ဆိုင်မှာ လုပ်ကိုင်နေတဲ့ မြန်မာအလုပ်သမားတဦး လုပ်ငန်းခွင် ထိခိုက် ဒဏ်ရာရရှိတာကြောင့် နစ်နာကြေး လျှောက်ဖို့ ပိုင်ရှင်ဖြစ်သူက ဆောင်ရွက် မပေးတဲ့ အပြင် ဆေးကုစရိတ်တွေပါ ပြန်တောင်းနေတယ်လို့ WAG မြန်မာအလုပ်သမား ကူညီစောင် ရှောက်ရေးအဖွဲဆီက သိရပါတယ်။

 

မြန်မာအလုပ်သမား ကိုမောင်သက် အလုပ်လုပ်နေချိန် ပိုင်ရှင်ဖြစ်က စားသောက်ဆိုင်ခွဲဆီ ယာဉ်မောင်း တဦးနဲ့ ပစ္စည်းပို့ခိုင်းတာကြောင့် သွားရောက်ပို့ဆောင်စဉ် ယာဉ်တိုက်မှု ဖြစ်ပွားခဲ့တာ ဖြစ်ပါတယ်။ အဲဒီ ယာဉ်တိုက်မှုအတွင်း မြန်မာအလုပ်သမား ရဲ့ ညာဘက် လက်ကောက်ဝတ်နဲ့ လက်ချောင်းတွေ ကျိုးခဲ့တာကြောင့် စတီးရိုး ထည့် ကုသခဲ့ရတယ်လို့ သိရပါတယ်။

 

မြန်မာအလုပ်သမားက ဆေးကုသမှု ခံယူပြီးနောက် ထိုင်းအလုပ်သမားရုံးမှာ နစ်နာကြေး လျှောက်ထား ဖို့ ဆေးစာရွက် တောင်းချိန်မှာ နစ်နာကြေးလိုချင်ပါက ဆေးဖိုး ဘတ် ၁၃၀၀၀၀ အရင် ပြန်ပေးဖို့ ပိုင်ရှင် ဖြစ်သူက ပြောဆိုခဲ့တာ ဖြစ်ပါတယ်။

 

''ကွေ့တီယို သွား ပို့ချိန်မှာ ဖြစ်တာ။ ပိုင်ရှင်က ဆေးကုပေးပြီး ၊ အခု ဆေးဖိုး တွေပြန်တောင်းတယ်။ ဆက်သွယ်တာက မနေ့ကမှ ဆိုတော့ အမှုကို ပြန်တည်ဆောက်ရမယ် ။ အခုပထမဆုံး ရဲစခန်းမှာ အမှု ဖွင့်ထားတဲ့ စာရွက်ကို လာယူတာ။ အမှုကို ဘယ်လို တည်ဆောက်ထားလဲ ဆိုတာ ကြည့်ပြီး ဆက်လုပ် ဖို့ပါ။ ပြောချင်တာက ပိုင်ရှင်က ခိုင်းလို့၊ ၀ဏ(အလုပ်သမားခေါင်းဆောင်) က ခိုင်းလို့ ယာဉ်တိုက်မှု ဖြစ်တယ် ၊ မတော်တဆမှု ဖြစ်တယ်ဆိုရင် ပိုင်ရှင်နဲ့ အပြည့်အ၀ သက်ဆိုင်တယ် ။ အပြင်မှာ ဖြစ်တာပဲ လုပ်ငန်းခွင်ထဲ မှာ မဟုတ်လို့ ပိုင်ရှင်က တာဝန်မယူဘူး ဆိုတာ မဟုတ်ပါဘူး။ ဒါကို မြန်မာ လုပ်သား တွေ သိထားရမယ်။''လို့ WAG မြန်မာအလုပ်သမား ကူညီစောင့်ရှောက်ရေးအဖွဲ့ တာဝန်ရှိသူက ပြောပါတယ်။

 

အခုအမှုအတွက် မေလ ၁၃ရက်က မြိုနယ် ရဲစခန်းမှာ မြန်မာအလုပ်သမား နဲ့ အတူ တိုင်ကြားထားပြီး ရရှိသင့်တဲ့ နစ်နာကြေး ရရှိဖို့ ဆက်လက် ဆောင်ရွက်သွားမယ်လို့ WAG မြန်မာအလုပ်သမား ကူညီစောင့်ရှောက်ရေး အဖွဲ့ဆီက သိရပါတယ်။