ယခု၂၀၂၄ ခုနှစ် အတွက် နဲ့ လာမယ့်၂၀၂၅ ခုနှစ် အတွက်ထုတ်ဝေထားတဲ့ပြက္ခဒိန်များအနက် အများပြည်သူရုံးပိတ်ရက်များ မှားယွင်းဖော်ပြထားတဲ့ပြက္ခဒိန်ထုတ်ဝေသူများအား စစ်ကောင်စီရဲ့ပြန်ကြားရေးဝန်ကြီးဌာန ကဝန်ခံကတိလက်မှတ် ရေးထိုးခိုင်းကာခေါ်ယူသတိပေးထားတယ်လို့သိရပါတယ်။
ဒါကြောင့်အများပြည်သူရုံးပိတ်ရက်ကို မှားယွင်းဖော်ပြထားသော ထုတ်ဝေသူများဖြစ်တဲ့ (ရွှေနိုင်ငံပိုစတာနှင့် စာပေဖြန့်ချိရေး)၊ (ရွှေဝါဝင်းစာပေ)၊ (အောင်မျိုးစာပေ)၊ (အစ္စလာမ့်မီးအိမ်စာပေတိုက်)၊ (မြတ်သဇင်စာပေ)၊ (ဆွေမ ဟာစာပေ) တို့ကိုပြန်ကြားရေးဌာနက အများပြည်သူ ရုံးပိတ်ရက်များကို မှန်ကန်စွာ ဖော်ပြထုတ်ဝေရန် ခေါ်ယူသတိပေးမှတ်တမ်းတင်ကာဝန်ခံကတိပြုလက်မှတ်ရေးထိုးစေခဲ့တာလို့ဆိုပါတယ်။
ပြက္ခဒိန် မှာ မှားယွင်းတဲ့အများပြည်သူရုံးပိတ်ရက် တွေအနေနဲ့၂၀၂၄ ခုနှစ်၊ နိုဝင်ဘာလ (၁၄) ရက်၊ ၂၀၂၅ ခုနှစ် ဇွန်လ (၁၀)ရက်၊ စက်တင်ဘာလ (၂၉) ရက်၊ ဒီဇင်ဘာလ (၄)ရက်နဲ့ ဒီဇင်ဘာလ (၂၉) ရက်များဖြစ်နေပြီး ယင်းရက်တွေဟာ အများပြည်သူ ရုံးပိတ်ရက် မဟုတ်ကြောင်းစစ်ကောင်စီရဲ့ ပြန်ကြားရေးဝန်ကြီးဌာန ကနေပြန်လည်အသိပေးထုတ်ပြန်ထားပါတယ်။
ပြက္ခဒိန်ထုတ်ဝေသူတွေအနေနဲ့ မြန်မာနိုင်ငံပြက္ခဒိန်အကြံပေးအဖွဲ့ပညာရှင်များက ရေးဆွဲထားတဲ့ မြန်မာ - ရခိုင် - အင်္ဂလိပ် မူမှန်ပြက္ခဒိန်ပါ ရုံးပိတ်ရက်များနဲ့စစ်ကောင်စီက အမိန့်ကြော်ငြာစာနဲ့ထုတ်ပြန်တဲ့ အများပြည်သူတို့ရဲ့ ရုံးပိတ်ရက်များအတိုင်း ဖော်ပြထုတ်ဝေရမယ်လို့အသိပေးထားပါတယ်။
တန်ဆောင်တိုင်ရုံးပိတ်ရက်များထဲတွင်လည်း အများပြည်သူတွေအနေနဲ့ နိုဝင်ဘာ ၁၄ ရက်ကို အစိုရရုံးပိတ်ရက်ဖြစ်ကြောင်း ပြီးခဲ့တဲ့ရက်ပိုင်းများအတွင်းက လူမှုကွန်ယက်များအပေါ်မှာဖော်ပြပါရှိနေခဲ့ရာယင်းပိတ်ရက်များအတွင်း အားလပ်ရက်ခရီးများကိုကြိုတင်စီစဉ်မှုတွေလည်းရှိနေတယ်လို့သိရပါတယ်။
