အများပြည်သူဆိုင်ရာ ရုံးပိတ်ရက်တွေမှာ အလုပ်သမားတွေအနေနဲ့ အလုပ်ဆင်းလိုတဲ့ ဆန္ဒမရှိရင် ငြင်းဆန်ခွင့်ရှိတယ်လို့ အလုပ်သမားအရေးကူညီဆောင်ရွက်နေသူတွေက ဆိုပါတယ်။
သင်္ကြန်ကာလလို ရက်ရှည်ရုံးပိတ်ရက်တွေဖြစ်တဲ့ အများပြည်သူဆိုင်ရာ ရုံးပိတ်ရက်တွေ၊ ရက်သတ္တပတ် ပိတ်ရက်တွေဟာ လုပ်ခလစာအပြည့်နဲ့ ခံစားခွင့် ပေးရမယ့်ရက်တွေဖြစ်တယ်လို့လည်း သိရပါတယ်။
လက်ရှိမှာတော့ စက်ရုံလုပ်သားအချို့ကို နှစ်သစ်ကူးပိတ်ရက်တွေမှာ အစားထိုးခိုင်းစေဖို့ စက်ရုံဘက်က ပြောလာတာတွေရှိတယ်လို့ အလုပ်သမားအချို့က ဆိုပါတယ်။
အလုပ်သမားအင်အားစုအဖွဲ့ရဲ့ တာဝန်ရှိသူတစ်ဦးက"ဆန္ဒမရှိရင် ငြင်းခွင့်ရှိပါတယ်၊ ဒီလိုရက်မျိုးက၊ ဒါ အလုပ်သမားဆန္ဒနဲ့အညီ ခေါ်ရတာလေ၊ ဒီ အများပြည်သူ အလုပ်ပိတ်ရက်တို့ ၊ ရက်သတ္တပတ်ပိတ်ရက်တို့ဆိုတာက အလုပ်သမားသဘောတူမှ ခေါ်ခွင့်ရှိတဲ့ရက်မျိုးတွေပေါ့နော်၊ အလုပ်သမားဘက်က ဆန္ဒမရှိရင်တော့ ငြင်းခွင့်ရှိပါတယ်"လို့ Myanmar Labour News ကိုပြောပါတယ်။
အများပြည်သူဆိုင်ရာ ရုံးပိတ်ရက်တွေမှာ စက်ရုံလည်ပတ်ပြီး အလုပ်သမားတွေကို ခိုင်းစေလိုပါက သက်ဆိုင်ရာဌာနတစ်ခုဖြစ်တဲ့ အလုပ်ရုံနဲ့ အလုပ်သမားဥပဒေ စစ်ဆေးရေးဦးစီးဌာန ထံ သွားရောက်ပြီး အလုပ်ရှင်၊ အလုပ်သမား သဘောတူညှိနှိုင်းကာ အလုပ်သမားရဲ့ ဆန္ဒပေါ် မူတည်ပြီး ခွင့်ပြုချက်ရမှ အလုပ်ခိုင်းစေခွင့်ရှိတယ်လို့ သိရပါတယ်။
အလုပ်သမားအင်အားစုအဖွဲ့ရဲ့ တာဝန်ရှိသူတစ်ဦးက"အဲ့လို အခြေအနေမျိုးတော့ရှိတယ်၊ ဆိုတော့ အရင်နှစ်တွေတုန်းကတော့ ကျွန်တော်တို့ သိရသလောက်က နှစ်သစ်ကူးရုံးပိတ်မယ်ဆိုလို့ရှိရင် မပေးဘူးပေါ့နော်၊ ခွင့်ပြုချက်ကိုလုံးဝပေးလေ့မရှိဘူး၊ ဒီ အလုပ်ရုံနဲ့ အလုပ်သမား စစ်ဆေးရေးဦးစီးဌာနက ပေးလေ့မရှိဘူး၊ တခါတလေကျတော့ အလုပ်ရှင်နဲ့ အလုပ်သမားညှိနှိုင်းပြီးတော့ပဲ နားလည်မှုယူပြီးတော့ တချို့စက်ရုံလေးတွေ ခိုးလည်တယ်ပြောရမှာပေါ့နော်၊ ခိုးပြီးတော့ လည်ပတ်ကြတာမျိုးတွေလည်းရှိတယ်၊ အဲ့ဒါက သူတို့အချင်းချင်း ကျေနပ်ရင်လုပ်ကြတဲ့ပုံစံမျိုးပေါ့" လို့ပြောပါတယ်။
အများပြည်သူဆိုင်ရာ အလုပ်ပိတ်ရက်ဖြစ်တာကြောင့် အဆိုပါရက်တွေမှာ လုပ်ငန်းလည်ပတ်ပြီး ခိုင်းစေပါက အချိန်ပိုကြေး အနေနဲ့ သာမန်လုပ်အားခ၏ နှစ်ဆ ပေးရမှာဖြစ်သလို အလုပ်မဆင်းလိုတဲ့ အလုပ်သမားတွေအနေနဲ့ ငြင်းဆန်ခွင့်ရှိတယ်လို့ သိရပါတယ်။
အလုပ်သမားတွေအနေနဲ့ အလုပ်နားရက်မှာ ငြင်းဆန်ခွင့်ရှိပေမယ့် အလုပ်ရှင်တွေဘက်က ခြိမ်းခြောက်တာ၊ အလုပ်နေရာ ရွှေ့ပြောင်းပစ်တာ၊ အချိန်ပို မခေါ်တော့တာတွေ ရှိတယ်လို့လည်း သိရပါတယ်။
တရားဥပဒေစိုးမိုးမှု မရှိတဲ့ ယခုလို အခြေအနေမျိုးမှာ အလုပ်သမားတွေအတွက် အခြေအနေတွေ ပိုမိုဆိုးဝါးလာနိုင်တယ်လို့ အလုပ်သမားအရေး ကူညီနေသူတွေက ဝေဖန် ထောက်ပြထားပါတယ်။
လတ်တလော အခြေအနေအရ အလုပ်သမား သမဂ္ဂတွေ အလုပ်သမားအရေး ကူညီနေသူတွေအနေနဲ့လည်း ပွင့်လင်းမြင်သာစွာ ကူညီဖြေရှင်းပေးနိုင်တဲ့ အခြေအနေ မရှိဘူးလို့ ဆက်လက်သိရပါတယ်။
