ပြည်တွင်းမှာသတ်မှတ်ထားတဲ့အနည်းဆုံးအခကြေးငွေနှုန်းထားကိုပြန်လည်ပြင်ဆင်နိုင်ဖို့နိုင်ငံတကာအမှတ်တံဆိပ်တွေအနေနဲ့ပြည်တွင်းကအလုပ်သမားသမဂ္ဂတွေနဲ့အတူဆွေးနွေတာတွေလုပ်ဆောင်သင့်နေပြီလို့မြန်မာနိုင်ငံစက်မှု၊ လက်မှုနှင့်ဝန်ဆောင်မှုလုပ်ငန်းပေါင်းစုံအလုပ်သမားသမဂ္ဂများအဖွဲ့ချုပ်(MICS-TUsF)က ထုတ်ပြန်ထားပါတယ်။
ဒီထုတ်ပြန်ချက်ကိုတော့မေလ(၁၄)ရက်မှာထုတ်ပြန်တာဖြစ်ပြီးEU Cham က ထုတ်ပြန်တဲ့ အဆိုတစ်ရပ်မှာလည်း တရားဝင်အနည်းဆုံးလုပ်ခလစာကို ပြန်လည်သုံးသပ်ပြင်ဆင်ဖို့ လိုတယ်လို့ ဧပြီလမှာ ဖော်ပြထားတာ ဖြစ်ပါတယ်။
"ဈေးနှုန်းကြီးမြင့်တာနဲ့ကျပ်ငွေတန်ဖိုးကျဆင်းမှုကြောင့်လက်ရှိမှာ အနည်းဆုံးလုပ်ခလစာရဲ့တန်ဖိုးဟာ၂၀၁၈ ခုနှစ်အနည်းဆုံးလစာရဲ့တဝက်တန်ဖိုးလောက်ပဲကျန်တာကြောင့်အလုပ်သမားတွေစားဝတ်နေရေးခက်ခဲလာပါတယ်"လို့ MICS-TUsF က ဖော်ပြပါတယ်။
ပြည်တွင်းမှာအနည်းဆုံးအခကြေးငွေနှုန်းထားကို၂၀၁၈ ခုနှစ်မေလမှာတစ်ရက်(၈)နာရီအလုပ်ချိန်အတွက်(၄၈၀၀)ကျပ်ပြင်ဆင်သတ်မှတ်ခဲ့တာဖြစ်ပါတယ်။
နောက်ပိုင်းမှာတော့ခေတ်ကာလနဲ့ကိုက်ညီတဲ့နှုန်းထားပြန်လည်ပြင်ဆင်ရေးကိုလက်တွေ့လုပ်ဆောင်မှုမရှိဘဲ စစ်အာဏာရှင်က အပိုထောက်ပံ့ကြေးခေါင်းစဥ်နဲ့ကျပ်နှစ်ထောင်တိုးပေးဖို့သာထုတ်ပြန်ခဲ့ပါတယ်။
လက်ရှိမှာတော့စက်ရုံအများစုကအပိုထောက်ပံ့ကြေးကိုအပြည့်အဝပေးချေတာမရှိသလို အလုပ်သမားဝန်ကြီးဌာနကလည်းတာဝန်ယူဖြေရှင်းပေးတာမရှိတာကြောင့် အလုပ်သမားတွေအခက်အခဲတွေဖြစ်ပေါ်နေပါတယ်။
"အခုက အလုပ်လုပ်ရင်းကို အဆင်မပြေတာပါ။ အချိန်ပိုတွေကို မဖြစ်မနေလုပ်ရတယ်။ အရင်ထက်ပိုလုပ်ရတယ်။ အောလင်း၊ အောနိုက်တွေ မနားတမ်းလုပ်နေရတာတောင် စားရရုံပဲရှိပါတယ်။ပေါပေါများများမရပါဘူး။ ပြောရရင်တော့အချိန်ပိုတွေလုပ်မှစားလို့ရတဲ့အခြေအနေဖြစ်နေတာပါ"လို့ ရွှေပြည်သာက စက်ရုံအလုပ်သမားတစ်ဦးက ပြောပါတယ်။
လက်ရှိမှာအလုပ်သမားတွေ အနည်းဆုံးအခကြေးငွေနှုန်းထားနဲ့မလုံလောက်တဲ့အခြေအနေတွေကိုစစ်တမ်း တွေ့ရှိချက်ကို သွေးစည်းညီညွတ်သေ ာသမဂ္ဂများအဖွဲ့ချုပ်မြန်မာ(STUM)ကလည်းသတင်းထုတ်ပြန်ထားပါတယ်။ ထုတ်ပြန်ချက်အရတော့အလုပ်သမားတစ်ဦးဟာတစ်ရက်(၈)နာရီအလုပ်ချိန်အတွက်(၁၂၀၀၀)ကျပ်ကနေ
(၁၇၀၀၀) ကျပ်အထက်ထိလိုအပ်နေတာပဲဖြစ်ပါတယ်။
