ထိုင်းနိုင်ငံ ကန်ချနဘူရီခရိုင်မှာ တရားမဝင် ဝင်ရောက်မှုနဲ့ မြန်မာ ရွှေ့ပြောင်း လုပ်သား ၁၇ ဦး အဖမ်းခံရတယ်လို့ ထိုင်းသတင်းဌာနတွေရဲ့ ဖေါ်ပြချက်အရ သိရပါတယ်။

 

မတ်လ၂၁ ရက် နံနက် ၂နာရီ ခန့်က ကန်ချနဘူရီ ခရိုင် အတွင်း လမ်းမပေါ်မှာ ပစ်ကပ်ကားတစ်စီးကို ထိုင်းအာဏာပိုင်တွေက စစ်ဆေးဖို့ ရပ်တန့်ခိုင်းရာ မှ မရပ်တန့်ဘဲ မောင်းပြေးသွားတာ ကြောင့် ကားကို လိုက်လံ ဖမ်းဆီးခဲ့ရာ ၎င်း ကားမှာ ဆန်ခလဘူရီ အတွင်းရှိ တောအုပ်အတွင်းသို့ ဝင်ရောက်သွားပြီး ယာဉ်မောင်းက ကားကို စွန့်ပစ်ခဲ့တယ်လို့ ဆိုပါတယ်။

 

ကားပေါ်မှာ လိုက်ပါလာတဲ့မြန်မာနိုင်ငံသား ၁၇ဦး ကိုတွေ့ရပြီး ၁ နှစ်အရွယ် ကလေးငယ်အပါအဝင် ကလေး ၆ ဦး ပါဝင်တယ်လို့ သတင်းမှာဖေါ်ပြထားပါတယ်။

 

ဖမ်းမိခံရတဲ့ မြန်မာရွှေ့ပြောင်း လုပ်သားတို့မှာ ထိုင်းနိုင်ငံ အတွင်းပိုင်း ပြည်နယ်တစ်ခုခု မှာ အလုပ်လုပ်ကိုင်ဖို့ အတွက် နယ်စပ်လမ်းကြောင်းကနေ တရားမဝင် ဝင်ရောက်လာတာ ဖြစ်သလို အခုလို ဝင်ရောက်ဖို့ အတွက် ပွဲစား ကို တစ်ဦးလျှင် ဘတ်ငွေ ၁၀၀၀၀ ပေးဆောင်ရတယ်လို့ စစ်ဆေးထွက်ဆိုထားပါတယ်။

 

ယခုဖမ်းဆီးရရှိသူတွေ ကို ဆန်ခလာဘူရီ ရဲစခန်းတွင် အမှုဖွင့် ဖမ်းဆီးထားကြောင်း သိရပါတယိ။ မတ်လ၂၀ရက်ကလည်း ကန်ချနပူရီခရိုင် အတွင်း ယာဉ်တစ်စီးပေါ် လိုက်ပါလာတဲ့ မြန်မာအလုပ်သမား ၆ဦးတရားမဝင်နယ်စပ်ဖြတ်ကျော်ဝင်ရောက်မှုနဲ့ အဖမ်းခံရသေးတယ်လို့သိရပါတယ်။

Ref-Kanchanaburi News