ထိုင်းနိုင်ငံ ကန်ချဘူရီမြို့တွင် တရားမဝင်မြန်မာလုပ်သား ၁၀၈ ဦးကိုတင်လာသော အလုံပိတ်ကုန်သေတ္တာကားအား အောက်တိုဘာ ၁၁ ရက်နံနက်ပိုင်းတွင်ဖမ်းဆီးရမိခဲ့ကြောင်းထိုင်းသတင်းဌာန တွေရဲ့ ဖော်ပြချက်အရသိရပါတယ်။

 

ကန်ချနဘူရီမြို့ Ban Khao Meng Road လမ်းပေါ် ခေါင်မင်ဘန်းကြီးကျောင်းရှေ့မှာ ခရိုင်အုပ်ချုပ်ရေးအဖွဲ့နှင့်အဝေးပြေးလမ်းရဲတပ်ဖွဲ့ဝင်များမှ အလုံပိတ်ကုန်ကားအားစစ်ဆေးခဲ့ခြင်းဖြစ်ပြီး ကားအတွင်း မြန်မာနိုင်ငံသားရွှေ့ပြောင်းအလုပ်သမား ကျား ၆၄ဦး ၊မ ၃၈ဦးနှင့်ကလေး၆ဦးတို့ကို ယာဥ်မောင်းတစ်ဦးနှင့်အတူဖမ်းဆီးရမိခဲ့ခြင်းဖြစ်ပါတယ်။

 

မြန်မာအလုပ်သမား တွေဟာ ထိုင်းမြန်မာနယ်စပ်ကိုလှေဖြင့် ဖြတ်ကျော်ခဲ့ကြခြင်းဖြစ်ပြီး ထိုင်းဘက် ထောင်းဖာဖူမ်ဒေသ သို့ရောက်ရှိခဲ့ကာ ထိုင်းနိုင်ငံရှိအခြားဒေသများသို့သွားရန် လိုက်ပါခဲ့ခြင်း​ဖြစ်ကြောင်းရဲတပ်ဖွဲ့ ထုတ်ပြန်ချက်အရသိရပါတယ်။

 

ဖမ်းဆီးခံရတဲ့ မြန်မာရွှေ့ပြောင်းအလုပ်သမားများအား ထိုင်းဥပဒေနှင့်အညီအရေးယူကာ မြန်မာနိုင်ငံသို့ပြန်ပို့သွားမည်ဖြစ်ကြောင်း သိရပါတယ်။