တရုတ်နိုင်ငံမှာ အကြောင်းအမျိုးမျိုး နဲ့ ဖမ်းဆီးခံရတဲ့ မြန်မာနိုင်ငံသားတွေကိုနေရပ်သို့ ပြန်လည်ပို့ဆောင်နိုင်ရေးနဲ့ပက်သက်ပြီး မြန်မာ-တရုတ် နှစ်နိုင်ငံ လူဝင်မှုကြီးကြပ်ရေးဆိုင်ရာများ ပူးပေါင်း ဆောင်ရွက်ရေး နားလည်မှုစာချွန်လွှာ(MoU) လက်မှတ်ရေးထိုးခဲ့တယ်လို့ လူဝင်မှုကြီးကြပ်ရေးဦးစီးဌာနမှ သိရပါတယ်။

 

စစ်ကော်မရှင် လက်အောက်ခံ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီးနှင့် အဖွဲ့ဝင်တွေက ပြီးခဲ့တဲ့ နိုဝင်ဘာ ၁၄ ရက်မှ ၁၈ ရက်အထိ တရုတ်ပြည်သူ့သမ္မတနိုင်ငံသို့ အလုပ်သဘောလေ့လာရေးခရီးစဉ်အဖြစ် သွားရောက်ခဲ့စဉ် မှာ အခုလို နှစ်နိုင်ငံ လက်မှတ်ရေးထိုးခဲ့ခြင်း ဖြစ်တယ်လို့ ၄င်းဌာနက ထုတ်ပြန်ထားပါတယ်။

 

နှစ်နိုင်ငံ တွေ့ဆုံစဉ် မြန်မာ-တရုတ် နှစ်နိုင်ငံ နယ်စပ်ဂိတ်တွေ မှာ လူဝင်မှု စစ်ဆေးရေး စနစ်တွေ အဆင့်မြှင့်တင် ဖို့ လူဝင်မှုကြီးကြပ်ရေးဆိုင်ရာ လုပ်ငန်း တွေ ပိုမို တိုးမြှင့် ဖို့၊တရားမဝင် ဝင်ထွက်မှု မရှိစေဖို့ လုပ်ဆောင် ရန် နှစ်နိုင်ငံ လူဝင်မှုကြီးကြပ်ရေးဆိုင်ရာ သတင်းအချက်အလက်များ အပြန်အလှန်ဖလှယ်ရေး၊ လူကုန်ကူးမှုတိုက်ဖျက်ရေး၊ အွန်လိုင်းလောင်းကစားမှုလုပ်ငန်းများ ပူးပေါင်းတိုက်ဖျက်ရေးတို့ ဆွေးနွေးခဲ့တယ်လို့ ဆိုပါတယ်။

 

လက်ရှိတွင် မြန်မာနိုင်ငံ အတွင်း သို့ တရားမဝင် ဝင်ရောက်လာပြီး ကျားဖြန့် လုပ်ငန်း တွေ မှာ လာရောက် လုပ်ကိုင်နေတဲ့ တရုတ်နိုင်ငံသားတွေကို စစ်ကော်မရှင် လက်အောက်ခံ လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာနမှ စိစစ်ပြီး နေရပ် ကို လစဉ် ပြန်လည်ပို့ပေးလျက်ရှိတယ်လို့ဆိုပါတယ်။

 

တရုတ်နိုင်ငံ အတွင်း မှာ လည်း အကြောင်းအမျိုးမျိုးနဲ့ အဖမ်းခံ ထားရတဲ့ မြန်မာနိုင်ငံသားတွေ ရှိသလို မသမာသူတွေ လက်ချက်နဲ့ လူကုန်ကူးခံရတဲ့ မြန်မာနိုင်ငံသားတွေများစွာရှိကြောင်း သိရပါတယ်။