ရွှေပြည်သာမြို့နယ် ဝါးတရာလမ်း၊ ဝါးတရာစက်မှုဇုန် အမှတ်(---) ရှိ GYSEN (Myanmar) Apparel Co ,Ltd မှာ အလုပ်သမားလျှော့ချမယ်အကြောင်းပြပြီး အလုပ်သမား သမဂ္ဂအဖွဲ့ဝင် အလုပ်သမား ၅၀ ကိုအလုပ်ကနေထုတ်ပယ်လိုက်လို့ တိုင်ကြားထားမှုကို အချိန်ဆွဲထားကာ ယနေ့အချိန်ထိဖြေရှင်းအရေးယူ ခြင်းမရှိသေးဘူးလို့ သိရပါတယ်။
အဆိုပါအလုပ်ထုတ်ခံလိုက်ရတဲ့အလုပ်သမားတွေအနက် အချို့သောအလုပ်သမားတွေကတော့အလုပ်ထုတ်နစ်နာကြေးလက်ခံယူကာနယ်ပြန်သွားကြပြီး အလုပ်သမား ၂၉ ဦးကတော့ မိမိတို့လုပ်ငန်းခွင်ပြန်လည်ဝင်ရောက်နိုင်ရေးကိုသာ တောင်းဆိုနေကြတာပါ။
အဆိုပါတိုင်ကြားထားမှုကို သက်ဆိုင် ရာအလုပ်သမားဝန်ကြီးဌာနက မြို့နယ်အလုပ်သမားရုံးမှာ ၃ ကြိမ်ညှိနှိုင်းပြီး တိုင်းရုံးမှာတော့ပေါင်းစပ်ညှိနှိုင်းဟု ဆိုကာ ရုံးချိန်း ၄ ကြိမ်ခေါ်ယူခဲ့ပြီး တိတိကျကျအကြောင်းပြန်တာမရှိသေးဘဲ (၈)လခန့်ကြာသည်တိုင် ဖြေရှင်း ပေးခြင်းမရှိလို့ အလုပ်သမားတွေကမစောင့် နိုင်ကြတော့ဘဲ မိသားစုစား၀တ်နေရေးအခက်အခဲများနဲ့ရင်ဆိုင် ရကာ နောက်ပြန်ဆုတ်ရပြီး သမဂ္ဂအဖွဲ့ ဥက္ကဌအပါ အလုပ်အမှုဆောင် ၃ ဦးသာ လက်ရှိအချိန်ထိ ဆက်လက်ရင်ဆိုင်နေကြရဆဲဖြစ်တယ်လို့သိရပါတယ်။
"ထုတ်လိုက်တော့ အလုပ်ထုတ်နစ်နာကြေးမယူဘဲ လုပ်ငန်းခွင်ပြန်ဝင်ဖို့တောင်းဆိုတာက အလုပ်သမား ၂၉ဦးရှိတယ်။ ကျန်တဲ့ အလုပ်သမားတွေကတော့ စက်ရုံအလိုက်လုပ်သက်နစ်နာကြေးတွေ နို့တစ်ကြေးတွေယူသွားကြတယ်။ အဲ့ဒီ ၂၉ ဦးအမှုဆိုရင် ခုထိအလုပ်သမားတွေကစောင့်နေရတုန်း။ မြို့နယ်ရုံး မှာရုံးချိန်း ၃ ချိန်းခေါ်တယ်။ တိုင်းရုံးကိုစာတင်မယ်ဆိုပြီးပြောတော့ တိုင်းရုံးကညှိနှိုင်းတယ်။ ၄ကြိမ်အထိ။ ညှိနှိုင်းတယ်ဆိုတာကလည်. လုပ်ငန်းရှင်လာအလုပ်သမားလာဆိုပြီးညှိတာမဟုတ်ဘူး။ လုပ်ငန်းခွင်ပြန်ဝင်ရမယ်ဆိုတာမရှိဘူး။ သမဂ္ဂအဖွဲ့ဥက္ကဌအပါ အီးစီတွေပါအကုန် အဖွဲ့ဝင် ၅၀ လုံးကိုအလုပ်ထုတ်လိုက်တာ။ အဲ့တာကိုခုချိန်ထိပြန်မဝင်ရသေးဘဲရင်ဆိုင်နေရတာဖြစ်တယ်" လို့ အလုပ်သမားကို ကူညီဆောင်ရွက်ပေးနေသူက ဆိုပါတယ်။
အဆိုပါ GYSEN Myanmar အထည်ချုပ် စက်ရုံကို လုပ်သားအင်အား ၇၀၀ ကျော် ဖြင့် လွန်ခဲ့သော ၄ နှစ်ခန့်မှစတင်ဖွင့်လှစ်ခဲ့တာဖြစ်ပြီး လုပ်ငန်းရှင်ကစက်ရုံရှိ တရားဝင်ဖွဲ့စည်းထားသော အလုပ်သမားသမဂ္ဂကို ဖြိုခွဲရန် အကြံဖြင့် အလုပ်သမားအခွင့်အရေးများ ချိုးဖောက်ကာ ဧပြီလ ၁၀ ရက်နေ့တွင် button ဌာနနှင့် Iron ဌာနရှိဝန်ထမ်းများအား လုပ်သားလျော့ချသည်ဟု အ ကြောင်းပြ၍ သမဂ္ဂဥက္ကဌ နဲ့ အပါအဝင် အလုပ်သမား ၅၀ ကို အလုပ်မှထုတ်ခဲ့တာဖြစ်ပါတယ်။
ဒါ့အပြင် ပြီးခဲ့တဲ့ ၁.၈.၂၀၂၄ ရက်နေကလည်း တနင်္လာနေ့မှ သောကြာနေ့ အထိ တစ်ပတ်လုံး ည(၉း၀၀)အထိ အချိန်ပို အတင်းအကြပ်ခေါ်ယူခဲ့ပြီး စနေနေ့တွေ မှာလည်း ည(၁၂:၀၀) အထိအချိန်ပိုခေါ်ယူတာရှိသလို တနင်္ဂနွေနေ့ ပိတ်ရက်များကိုပါမချန် အချိန်ပိုအတင်းအကြပ် ခေါ်ယူလို့ အလုပ်သမားတွေ ပင်ပန်းပြီး အချိန်ပိုဆက်လက်မဆင်းနိုင်တော့တာကြောင့် ၂၀၂၄ ခုနှစ်၊ စက်တင်ဘာ လ ၂ ရက်နေ့မှာ ရွှေပြည်သာမြို့နယ် အလုပ်ရုံနှင့် အလုပ်သမားဥပဒေစစ်ဆေးရေး ဦးစီးဌာန ရုံးသို့ တိုင်ကြားစာ ပေးပို့ တိုင်ကြားခဲ့ပါသေးတယ်။
အဆိုပါတိုင်ကြားခဲ့မှုကိုလည်း ဦးစီးဌာန အနေဖြင့် တစ်စုံတစ်ရာ အေရးယူ ဆောင်ရွက်ပေးခြင်း မရှိသဖြင့် စက်တင်ဘာ ၁၇ ရက်နေ့တွင် ဆက်လက်တိုင်ကြားကာမှ စက်ရုံ အနေဖြင့် နောက်ထပ် အချိန်ပိုအတင်းအကြပ် ခေါ်ယူခြင်းပြုလုပ်ပါက ဦးစီးမှူးထံသို့ အကြောင်းကြားပေးမှသာ ဦးစီးဌာနအနေဖြင့် စစ်ဆေးမှု ပြုလုပ်ပေးနိုင်မည်ဆိုကာ တိုင်ကြားထားသော တိုင်ကြားမှုကို အရေးယူဆောင်ရွက်ပေးခြင်းမရှိခဲ့ဘူးလို့ သိရပါတယ်။
GYSEN ပိုင်ရှင်အား အလုပ်သမားအဖွဲ့အစည်း ဖြိုခွဲမှူနဲ့ပတ်သက်ပြီး အရေးယူပေးရန်တိုင်ကြားထားမှုအပါ အချိန်ပိုခေါ်ယူမှုတွေကိုပါ တိုင်ကြားခဲ့ပေမဲ့ ဝန်ကြီးဌာန အနေဖြင့် ဥပေဒအရ အရေးယူရမည့် ကိစ္စ အား အရေးမယူဘဲ စေ့စပ်ညှိနှိုင်းဟုဆိုကာ အချိန်ဆွဲထားတာဟာ ဥပေဒ ကို ချိုးဖောက်ခြင်းသာဖြစ်တယ်လို့ အလုပ်သမားရေးကူညီဆောင်ရွက်သူတစ်ဦးက မှတ်ချက်ပြုထားပါတယ်။
#MyanmarLabourNews
