တောင်ကိုရီးယားနိုင်ငံမှာ အလုပ်လုပ်ကိုင်တဲ့ မြန်မာနိုင်ငံသားတွေ အနေနဲ့ ထမ်းဆောင်ရမယ့် ဝင်ငွေခွန် ကို သံရုံးရဲ့ ဘဏ်စာရင်း ထဲသို့ ပေးသွင်းပြီးပါက အခွန်ပေးသွင်းမှုအထောက်အထားကိုပါ လာရောက်ထုတ်ယူကြဖို့ ဆိုးလ်မြို့ မြန်မာသံရုံးက ကြေညာထားပါတယ်။
သတ်မှတ်ရက်အတွင်း မထုတ်ယူပါက အခွန်ပေးသွင်းမှု အထောက်အထားကို ထုတ်မပေးတေ့ာဘူး လို့ ဇူလိုင်၅ရက်က မြန်မာသံရုံးက အသိပေးကြေညာထားပါတယ်။
ထမ်းဆောင်ရမယ့် ဝင်ငွေခွန်ကို သံရုံးရဲ့ဘဏ်စာရင်းသို့ တိုက်ရိုက်ပေးသွင်းပြီး အခွန်ပေးသွင်းမှုအထောက်အထားကို သံရုံးမှာ ထုတ်ယူရတဲ့ စနစ်ကို ပြီးခဲ့တဲ့ ၂၀၂၅ခုနှစ် မေလ ၁၂ရက် က စတင်ခဲ့တာ ဖြစ်ပါတယ်။
ဝင်ငွေခွန်ကို သံရုံးရဲ့ ဘဏ်အကောင့်ထဲကို အခွန်ငွေ သွင်းပေမယ့် အခွန်ပေးသွင်းမှုအထောက်အထားကို လာရောက်ထုတ်ယူခြင်းမရှိဘူးလို့ သိရပါတယ်။ အခုလို အခွန်ပေးသွင်းမှုအထောက်အထား မထုတ်သူ ဦးရေက မေလ မှာ ၄ဦးနဲ့ ဇွန်လ မှာ ၁၃ဦး စုစုပေါင်း ၁၇ဦး ရှိတယ်လို့ မြန်မာသံရုံးက ကြေညာထားပါတယ်။ ဒါ့အပြင်ထမ်းဆောင်ရမယ့် ဝင်ငွေခွန်ပမာဏထက် ကျော်လွန်ပြီး / လျော့နည်းပြီး ငွေလွှဲထားကြလို့ အခုလို့ အသိပေးခြင်းဖြစ်တယ်လို့ ဆိုပါတယ်။ ဒါကြောင့် အခွန်ပေးသွင်းမှုအထောက်အထား ကို ဇူလိုင် ၁၈ရက် နောက်ဆုံးထားပြီး သံရုံးကို လာရောက် ထုတ်ယူဖို့နဲ့ ပျက်ကွက်ပါက အခွန်ပေးသွင်းမှုအထောက်အထား ထုတ်ပေးခြင်း ဆောင်ရွက်ပေးတော့မှာမဟုတ်ဘူးလို့ အသိပေးကြေညာထားပါတယ်။
