ထိုင်းနိုင်ငံရှိ နိုင်င်ခြားသား လုပ်သားများ အတွက် အလုပ်ရှင်ပြောင်းလဲခြင်း သက်တမ်းတိုးခြင်းဆိုင်ရာ ကိစ္စရပ်တွေကို အလုပ်သမားတွေ (အောပ့်ဆွတ်) ရုံးသို့ ကိုယ်တိုင်သွားစရာမလိုအပ်တော့ပဲ အွန်လိုင်းစနစ်နဲ့ မတ်လ၄ရက်ကစပြီး လုပ်ဆောင်နိုင်တယ်လို့ ထိုင်းနိုင်ငံ၊ အလုပ်သမားဝန်ကြီးဌာန၊ အလုပ်အကိုင်ဦးစီးဌာနရဲ့ ထုတ်ပြန်ချက်အရ သိရပါတယ်။

 

၎င်း စနစ်သစ်အရ နိုင်ငံခြားသားများ၊ အလုပ်ရှင်များနဲ့ ၎င်းတို့ရဲ့ကိုယ်စားလှယ်တွေဟာ အလုပ်လုပ်ခွင့်ပါမစ်ပေါ်ရှိ အချက်အလက်များကို ပြောင်းလဲရန်အတွက် အွန်လိုင်းမှတစ်ဆင့် အလုပ်ရှင်ပြောင်းလဲခြင်း (ပုံစံ BT.44) ဖြင့် လုပ်ဆောင်နိုင်ပြီ ဖြစ်တယ်လို့ သိရပါတယ်။

 

"မတ်လ ၃၁ရက် သက်တမ်းတိုးထဲ ပါတဲ့ သူတွေ အတွက် အဆင်ပြေတာပေါ့ သက်တမ်းတိုးမှာ အလုပ်ရှင်ပြောင်းချင်တဲ့သူတွေက အရင်လို အော့ပ်ဆွတ်ရုံးမှာ လူကိုယ်တိုင် လက်ဗွေနှိပ် ၊မျက်စိစကင်ဖတ်တာ၊ဓါတ်ပုံရိုက်တာ လုပ်စရာ မလိုတော့ ဘူး အွန်လိုင်းကနေ အချက်အလက် ဖြည့်ငွေသွင်းပြီးတာနဲ့ ပြီးပြီ အချိန်ကုန်သက်သာသွားတယ်"လို့ ပါမစ်သက်တမ်းတိုးအတွက်ဝန်ဆောင်မှုပေးသူတစ်ဦးကပြောပါတယ်။

 

ဒါကြောင့် အလုပ်လုပ်ခွင့်ပါမစ်တွေအတွက် အလုပ်ရှင်ပြောင်းလဲကာ သက်တမ်းတိုး မယ့်သူတွေ အနေနဲ့ အခကြေးငွေ ၁၀၀ ဘတ်နှင့် ၃၀၀ ဘတ်တို့ကို အွန်လိုင်းမှ ပေးဆောင်ပြီး အလုပ်ရှင်ပြောင်းလဲခြင်းဆိုင်ရာ စာရွက်စာတမ်းများ ရရှိပြီး လုပ်ငန်းစဉ်ပြီးဆုံးပါက နေထိုင်ခွင့်ဆိုင်ရာ အကြောင်းကြားစာများ / အလုပ်လုပ်ခွင့် သက်တမ်းတိုးခြင်းများကိုလည်း ဆက်လက်ဆောင်ရွက်နိုင်ပြီဖြစ်တယ်လို့ သိရပါတယ်။