မြန်မာနိုင်ငံ ၊ ကရင်ပြည်နယ်၊ မြဝတီဒေသက လူကုန်ကူးခံရပြီး ပြန်ရောက်လာတဲ့ အင်ဒိုနီးရှား နိုင်ငံသား ၄၆ ဦးကို အင်ဒိုနီးရှား အမျိုးသားရဲတပ်ဖွဲ့ ရာဇဝတ်မှုစုံစမ်းစစ်ဆေးရေးအဖွဲ့က စစ်ဆေးမှုတွေ ပြုလုပ်နေတယ်လို့ TEMPO.CO သတင်းဌာနက ဒီကနေ့မှာ ဖော်ပြပါတယ်။
ဖေဖော်ဝါရီ ၂၀ မှာ အဲဒီ အင်ဒိုနီးရှားနိုင်ငံသားတွေ အင်ဒိုနီးရှားနိုင်ငံကို ပြန်ရောက်ခဲ့ပြီး စုံစမ်းစစ်ဆေးမှုတွေကို ဖေဖော်ဝါရီ ၂၄ ရက်မှာ ဆောင်ရွက်သွားမယ်လို့ အကြီးတန်းအရာရှိတဦးက ပြောဆိုပါတယ်။ လူကုန်ကူးခံရသူ တွေကို အနားယူခွင့် ပေးထားပြီး မေးမြန်းမှုတွေအတွက် ဖိအား မရှိစေချင်ဘူးလို့ အေဂျင်စီ အကြီးတန်း တာဝန်ရှိသူက ပြောဆိုပါတယ်။
နိုင်ငံခြားရေးဝန်ကြီးဌာန၊ အင်ဒိုနီးရှားနိုင်ငံသားများ (WNI) ကာကွယ်ရေးဌာနက မြန်မာနိုင်ငံက လူကုန်ကူးခံရသူ အင်ဒိုနီးရှား နိုင်ငံသားအားလုံးက (TPPO) လူကုန်ကူးမှုရဲ့ သားကောင်တွေ သက်သက် မဟုတ်ကြောင်း ပြောကြားထားပြီး တချို့ကတော့ ကျူးလွန်မှုပါဝင်သူတွေလို့ ဆိုပါတယ်။
မြန်မာနိုင်ငံဆီ သွားရောက်ခဲ့သူ တချို့က အွန်လိုင်းလောင်းကစားလို တရားမဝင်ကဏ္ဍတွေမှာ လုပ်ကိုင်တယ်လို့ သံသယရှိနေပြီး အဲဒီထဲက အများစုက ဖိလစ်ပိုင်မှာ အွန်လိုင်းလောင်းကစား အုပ်ချုပ်သူတွေ ဖြစ်ခဲ့တယ်လို့ လည်း ဖော်ပြထားပါတယ်။ အဲဒီမှာ တရားမဝင်လုပ်ငန်းတွေ ပိတ်သိမ်း ပြီးနောက် လာအိုနှင့် မြန်မာနိုင်ငံဆီ ပြောင်းရွှေ့သွားတယ်လို့လည်း ဖော်ပြထားပါတယ်။
မြန်မာနိုင်ငံမှာ ပိတ်မိနေတဲ့ အင်ဒိုနီးရှားအလုပ်သမား ၂၇၀ လောက် ကျန်ရှိနေတယ်လို့လည်း ရဲတပ်ဖွဲ့ အကြီးတန်းအရာရှိက ပြောဆိုထားပါတယ်။
မြန်မာနိုင်ငံမှာ ကျားဖျန့်လို့ လူသိများတဲ့ အွန်လိုင်း လိမ်လည်လုပ်ငန်းတွေမှာ အာဖရိကနိုင်ငံတွေ ဖြစ်တဲ့ နိုင်ဂျီးရီးယား၊ ယူဂန်ဒါ၊ ကင်ညာ စတဲ့ နိုင်ငံသားတွေ၊ အရှေ့အာရှဒေသက ကိုရီးယား၊ ဂျပန်နိုင်ငံသား တွေ၊ အရှေ့တောင်အာရှနိုင်ငံတွေဖြစ် ထိုင်း၊ ဗီယက်နမ်၊ လာအို၊ ကမ္ဘောဒီးယား၊ ဖိလစ်ပိုင်နိုင်ငံသားတွေ နဲ့ တောင်အာရှဒေသက အိန္ဒိယ၊ ပါကစ္စတန်၊ ဘင်္ဂလားဒေ့ရှ်၊ နီပေါလ်၊ သီရိလင်္ကာနိုင်ငံသားတွေ လူကုန်ကူး ခံရတာကို သတင်းတွေမှာ ဖော်ပြထားပါတယ်။
Ref / Photo ; TEMPO.CO
