ထိုင်းနိုင်ငံ ချွန်ဘော်ရီခရိုင် တွင် အွန်လိုင်းကနေ Live လွှင့် ပြီး အလုပ်ရှာပေးမယ် လို့ ပြောတဲ့ ပွဲစား ကို ယုံကြည် ပြီး စမတ်ကြေး တွေ ပေးသွင်းခဲ့ရာ မှ မြန်မာအလုပ်သမား ၁၂ဦး အလိမ်ခံလိုက်ရတယ်လို့ ၎င်းအမှု ကို ကူညီပေးနေတဲ့ UFF အလုပ်သမားကူညီစောင့်ရှောက်ရေးအဖွဲ့ ရဲ့ သတင်းထုတ်ပြန်ချက်အရသိရပါတယ်။

 

ဖြစ်စဉ်မှာ မြန်မာအလုပ်သမား၁၂ဦး ဟာ ကားအပိုပစ္စည်းရုံတွင် အလုပ်လုပ်ရမယ် လို့ လိုင်းပေါ် တွင်ပွဲစားက Live လွှင့် ပြောထားတာတွေ့တဲ့ အတွက် ၎င်းပွဲစားကို ချိတ်ဆက် ပြီး အလုပ်သွင်းပေး ဖို့ ၂၀၂၆ခုနှစ် ဇန်နဝါရီလ ၂၈ ရက် တွင် စမတ်ခ တစ်ဦး ကို ဘတ်၇၅၀၀ စီပေးသွင်းခဲ့ရာ ဖေဖေါ်ဝါရီ ၂ ရက် တွင် အလုပ်ဆင်းရမယ်လို့ပွဲစားက ပြောခဲ့တယ်လို့ သိရပါတယ်။

 

ဒါကြောင့် မြန်မာအလုပ်သမား ၁၂ဦးဟာ ၎င်းပြောကြားတဲ့ ဖေဖေါ်ဝါရီ၂ရက် မှာ စက်ရုံ သို့ သွားခဲ့ပေမယ့် ဖေဖေါ်ဝါရီ ၅ရက် မှသာ အလုပ်ဆင်းရမယ်လို့ ပြန်လည် ချိန်းဆိုခဲ့ ပြီး တဖန် ဖေဖေါ်ဝါရီ ၉ရက် မှသာ အလုပ်ဆင်းရမယ်လို့ ထပ်မံချိန်းဆိုခဲ့တယ်လို့ အလုပ်သမားတွေထံမှသိရပါတယ်။

 

၎င်းချိန်းဆိုတဲ့ ဖေဖေါ်ဝါရီ ၉ရက် ရောက်ရှိ ချိန် တွင် မြန်မာအလုပ်သမားတွေမှ အလုပ်သွားရန် ဖယ်ရီကားစောင့်ပေမယ့် ကားမှ လာမကြိုတဲ့ အတွက် ပွဲစား ကို ဖုန်းဆက်ရာ ဖုန်းမကိုင်တော့ ဘဲ အဆက်သွယ် ဖြတ်တောက်ခဲ့တယ်လို့ ဆိုပါတယ်။

 

ဒါကြောင့် စမတ်ကြေးတွေ ပေးသွင်းရပြီး အလုပ်မရရှိတဲ့ အတွက် မြန်မာအလုပ်သမား၁၂ဦးဟာ UFF အလုပ်သမားကူညီစောင့်ရှောက်ရေးအဖွဲ့ထံဖေဖေါ်ဝါရီ ၁၃ရက်မှာ လာရောက် အကူညီတောင်းခံလာသဖြင့် UFF အနေဖြင့် ပလိပ်ရုံး တွင် အမှုဖွင့် တိုင်ကြားပေးခဲ့တယ်လို့ သတင်းထုတ်ပြန်ထားပါတယ်။

 

ထိုင်းနိုင်ငံ အတွင်း အလုပ်ရှာဖွေနေတဲ့ မြန်မာအလုပ်သမား တွေကို မြန်မာပွဲစား တွေက အလုပ်ရှာပေးမယ်ဆိုကာ စမတ်ကြေးတွေ လိမ်ယူတာ တွေ မကြာခဏ ဖြစ်နေပြီး မကြာခင်ကလည်း ချွှန်ဘူလီခရိုင် အတွင်းမှာ မြန်မာပွဲစားက အီလက်ထရောနစ် စက်ရုံမှာ အလုပ်သွင်းပေးမယ်ဆိုပြီး မြန်မာလုပ်သား ၆၃ဦး ထံမှ စမတ်ကြေး ဘတ်၅သိန်းကျော် လိမ်ယူသွားမှု ဖြစ်ပွားခဲ့ကြောင်းသိရပါတယ်။