ထိုင်းနိုင်ငံ၊ ချွန်ပူလီခရိုင်၊ စီလချာမြို့တွင်ရှိသော(ရေပူရေအေးခွက်စက်ရုံ)တွင်အလုပ်လုပ်နေသော မြန်မာ (MOU/ CIဘတ်သစ်) ကိုင်ဆောင်ထားသောအလုပ်သမား၆၂ဦးသည် အေဂျင်စီမှ လစာမရှင်းပေး သဖြင့်အလုပ်မဆင်းဘဲဆန္ဒပြရာမှအလုပ်ထုတ်ခံခဲ့ရခြင်းဖြစ်ပါတယ်။
အဆိုပါအလုပ်သမားများ၏ စက်တင်ဘာလ လစာနှင့်အောက်တိုဘာလ လစာများမထုတ်ပေးသဖြင့် အလုပ်သမားများမှ တောင်းရာ အောက်တိုဘာ ၁၀ ရက်နေ့တွင်ပေးမည်ဟု စက်ရုံမှရက်ချိန်းခဲ့သော်လည်းမပေးခဲ့သည့်အတွက် အောက်တိုဘာ ၁၅ ရက်မှစကာ အလုပ်မဆင်းဘဲနေခဲ့ရာ အောက်တိုဘာ ၁၆ ရက်တွင် စက်ရုံသူဌေးမှအလုပ်ဖြုတ်လိုက်ခြင်းဖြစ်ကြောင်းသိရပါတယ်။
"စက်ရုံသူဌေးကတရုတ်ဆိုတော့ သူဌေးကိုယ်တိုင်အမည်ခံပေးလို့မရဘူး။ငါးသန်း ကအမည်ခံပေးတာပေါ့။လစာကိုစက်ရုံကရှင်းပေးပေမဲ့ ငါးသန်းကမရှင်းတာပေါ့။စက်ရုံဘက်ကဖြုတ်ပေမဲ့ငါးသန်းကအလုပ်မဖြုတ်သေးလို့လျော်ကြေးတော့တောင်းလို့မရသေးဘူး။ညှိနှိုင်းရဦးမှာပေါ့။ဒါပေမဲ့ကျန့်မခေါက်ရသေးတဲ့လူတွေကျန့်ခေါက်တာပေါ့ဒီအပတ်တွင်းရအောင်ပြန်ဆယ်ပေးမယ်ပြောတယ်"လို့ WAG အလုပ်သမားမဟာမိတ်အဖွဲ့ခေါင်းဆောင်ကိုမုန်တိုင်းကပြောပါတယ်။
အလုပ်သမားများမှအကူအညီတောင်းသဖြင့် WAG အလုပ်သမားမဟာမိတ်အဖွဲ့မှဝင်ရောက်ဖြေရှင်းပြီးနောက် အေဂျင်စီဘက်မှ အလုပ်သမားများ၏စက်တင်ဘာလ လစာကိုရှင်းပေးခဲ့ပြီး ကျန်ရှိနေသော လုပ်အားခ (၁)လစာကို လုပ်အားခ ထုတ်ပေးသည့်ရက် မပြည့်သေးသောကြောင့် ထုတ်မပေးသေးကြောင်းသိရပါတယ်။
အဆိုပါအလုပ်သမားများသည် ထိုစက်ရုံမှာအလုပ်လုပ်နေသည်မှာ သုံးလမှခြောက်လအထိရှိကြပြီဖြစ်ပြီး ချွန်ပူလီဘောဝင်းတွင်ရှိသော ဘတ်ငါးသန်းပွဲစားကို စမတ်ကြေးဘတ် ၈၀၀၀ နှင့် ကျန့်ခေါက်ခ ဘတ် ၄၅၀၀ ပေးကာ စက်ရုံသို့အလုပ်ဝင်ထားခဲ့ကြခြင်းဖြစ်ပါတယ်။
