ရန်ကုန်တိုင်းဒေသကြီး၊ ရွှေပြည်သာမြို့နယ်ရှိ ၁၉/ ၄၇ ရပ်ကွက် သန်းတွဲစက်မှု လမ်းမကြီးပေါ်ရှိ ထန်းခြောက်ပင်ဂိတ်တွင် ကယ်ရီဆွဲသူအဖြစ် လုပ်ကိုင်သူတွေကို စစ်မှုထမ်း သင်တန်း ၂ ပတ်တက်ရောက်ရန် ဖိအားပေးနေတယ်လို့ ကယ်ရီဆွဲသူတွေရဲ့ နီးစပ်သူတွေထံကသိရပါတယ်။
အဆိုပါ ကယ်ရီဂိတ် ၂ ခုတွင် ကယ်ရီဆွဲသူ ၅၀၀ ဝန်းကျင်ရှိပြီး ထန်းခြောက်ပင် ဂိတ်တခြမ်းတွင် ဂိတ်မှူးအဖြစ် တာဝန်ယူထားသည့် အသက် ၃၀ ကျော် ရှိ မောင်မောင်သိန်းဆိုသူက ဂိတ်ဝင်ထားတဲ့ ကယ်ရီသမားတွေကို စစ်မှုထမ်း ၂ ပတ်တက်ရောက်ရန် နှင့် ထောက်ပံ့မှုပေးမည်ဖြစ်ကြောင်း စက်တင်ဘာ ၁၀ ရက်က လက်မှတ်ထိုးခိုင်းနေတယ်လို့ နီးစပ်သူတွေကပြောပါတယ်။
ကယ်ရီဆွဲသူတွေမှ တရားဝင်စာထုတ်ထားလားမေးရာ မပြနိုင်ဘဲ မဖြစ်မနေ တက်ရမယ်လို့သာပြောကြောင်း ကယ်ရီ အလုပ်သမားတွေနဲ့ နီးစပ်သူက ပြောပါတယ်။
"ကျွန်တော်တို့အနေနဲ့ လက်ရှိအချိန်မှာ စားဝတ်နေရေးအတွက် မနည်းရုန်းကန်နေရတယ်။ ဆီးစျေးတက်လို့ ဆိုင်ကယ်ကယ်ရီကို မဖြစ်သာလို့သာ ဆွဲနေရတာဖြစ်ပါတယ်။ မိသားစုတွေ စားဝတ်နေရေးကို ကယ်ရီဆွဲခနဲ့ အဆင်ပြေအောင် နေနေရတာ ကယ်ရီဆွဲရတာကလည်း လစဥ်ကြေးဆိုပြီး ၂၀၀၀ ကျပ်၊ ကတ်ပြားကြေးဆိုပြီး ၇၀၀၀ ကျပ်လစဥ်ပေးရပါတယ်။ ဒါ့အပြင် လစဥ်တိုင်း ဥက္ကဌ ပိုက်ဆံကောက်ခိုင်းလို့ ဟိုအလှူ ဒီအလှူဆို ကောက်ခံမှုတွေလည်း ရှိပါတယ်။ ကျွန်တော်တို့မှာ ပေးရသည်များရှိသောလည်း စားဝတ်နေရေးအတွက် အဆင်ပြေအောင်နေပြီး တောင်းသမျှပေးပြီး လုပ်နေရတာဖြစ်ပါတယ်"လို့ အမည်မဖော်လိုတဲ့ ကယ်ရီဆွဲသူတစ်ဦးက ပြောထားပါတယ်။
အခုလို အဓမ္မစစ်မှုထမ်းသင်တန်း မတက်လိုဘဲ ရှောင်ရှားနေပါကလည်း လူစာရင်းနှင့်လိပ်စာ ကောက်ယူထားတဲ့အတွက် အငြိုးအတေးထားပြီး အန္တရာယ်ပြုမှာ စိုးရိမ်နေရတယ်လို့ ဆိုပါတယ်။
"စားဝတ်နေရေးအရ ကယ်ရီမဆွဲလို့လည်း အဆင်မပြေဘူး။ ကျွန်တော်တို့ ပြည်သူတွေအနေနဲ့ ဒုက္ခတော်တော်ရောက် နေပါတယ်။ ထန်းခြောက်ပင်ဂိတ်မှူး မောင်သိန်း ဆိုသူက ဂိတ်ကယ်ရီသမားများကို မတရား ခြိမ်းခြောက်ပြီး စစ်သင်တန်းတက်ရန် ပြောနေတာပါ ကျွန်တော်တို့ ကြားထားတာကတော့ လူတစ်ဦး စစ်မှုထမ်းဝင်လျှင် ပိုက်ဆံပေးမယ်ဆိုပြီး ပြောထားပါတယ်။ ပြည်သူတွေအနေနဲ့ ဒုက္ခရောက်နေတဲ့ အခြေအနေတွင် လူလူချင်းဖိနှိပ် ခြိမ်းခြောက် လုပ်စားနေတဲ့ မောင်သိန်းဆိုသူလုပ်ရပ်တွေကို တာဆီးပေးကြပါ"လို့ ကယ်ရီလုပ်သားတစ်ဦးက အကူအညီတောင်းခံထားပါတယ်။
