ရုရှားဖက်ဒရေးရှင်း နိုင်ငံ ကို မြန်မာလုပ်သား စေလွှတ် တာ မှာ တတိယအကြိမ်အဖြစ် လုပ်သား၂၇ဦးစေလွှတ်ခဲ့တယ်လို့ အလုပ်သမားဝန်ကြီးဌာနမှ သိရပါတယ်။
ဧပြီ ၈ရက်နေ့က စေလွှတ်ခဲ့တာ ဖြစ်ပြီး ၎င်း အလုပ်သမား တွေကို အလုပ်ရှင် ၊ အလုပ်သမား ၊ အလုပ်ခန့်ထားမှုဆိုင်ရာ သဘောတူစာချုပ်ချုပ်ဆိုတာ ၊ ပြည်ပအလုပ်အကိုင် လမ်းညွှန်သင်တန်းသင်ကြားပို့ချတာနဲ့ ပြည်ပအလုပ်အကိုင်အလုပ်သမားသက်သေခံကတ် ( OWIC ) ကတ်ပြုလုပ်ပေးတာတွေကို လုပ်ထုံး၊ လုပ်နည်းနဲ့အညီဆောင်ရွက်ပြီးစေလွှတ်ခဲ့တာဖြစ်တယ်လို့ဆိုပါတယ်။
ပြီးခဲ့တဲ့ မတ်လ၅ရက်နေ့ က မြန်မာအလုပ်သမား ၂၄ဦး ကို Pilot Project အနေနဲ့ စစ်ကောင်က ပထမဆုံးအကြိမ် စေလွှတ်ခဲ့တာ ဖြစ်ပြီး
မတ်လ ၂၂ရက်မှာတော့ အလုပ်သမားတွေ အတွက် စကားပြန် တစ်ဦး ကို စေလွှတ်ခဲ့တယ်လို့ သိရပါတယ်။
ရုရှားနိုင်ငံ ကို လုပ်သားစေလွှတ်တာမှာ ပြည်ပအလုပ်အကိုင်အကျိုးဆောင် လိုင်စင်ရအေဂျင်စီဖြစ်တဲ့ Vista International Co.,Ltd ရဲ့ အစီအစဉ်ဖြင့် ရုရှားဖက်ဒရေးရှင်းနိုင်ငံ Joint-Stock Company ‘Inturd’ Co., Ltd သို့ စေလွှတ်တာဖြစ်တယ်လို့သိရပါတယ်။
Pilot Project အနေဖြင့် ကျွမ်းကျင်မြန်မာလုပ်သား ၅၄ ဦး ကို စေလွှတ်ဖို့ စီစဉ်ထားကြောင်း ထုတ်ပြန်ထားရာ လက်ရှိမှာ မြန်မာလုပိသား ၅၂ဦး အထိ စေလွှတ်ထားပါတယ်။
ရုရှားနိုင်ငံ ကို မြန်မာလုပ်သားစေလွှတ်မှာ စစ်ကောင်စီက ပြည်ပထွက်ခွင့်အသက်ကန့်သက်ထားတဲ့ အသက် ၁၈မှ ၃၅နှစ် အတွင်း အမျိုးသားတွေ ပါဝင်နေတာ ကိုတွေ့ရတယ်။
"စစ်ကောင်စီက အခြားပြည်ပနိုင်ငံတွေကျတော့ အသက်၁၈ကနေ၃၅နှစ် အထိ ပြည်ပထွက်ခွင့်မပေးဘူး ခွင့်ပြန်လာတာတောင် ပြန်ထွက်မရဘူး အခုရုရှား ကျတော့ အသက်ကန့်သတ်ထားတဲ့ အရွယ်တွေ သွားခွင့်ပြုထားတယ် အခြားနိုင်ငံတွေ မသွားနဲ့ရုရှားကိုပဲသွားဆိုတဲ့သဘော သွားအောင် လုပ်ထားတဲ့သဘော ဖြစ်နေတယ်""လို့ ပြည်ပသို့ ထွက်ခွာ ရန် ပြင်ဆင်နေတဲ့ လုပ်သားတစ်ဦးကပြောပါတယ်။
စစ်ကောင်စီရဲ့ အလုပ်သမားဝန်ကြီးဌာနနဲ့ ရုရှားဖက်ဒရေး ရှင်းနိုင်ငံအလုပ်သမားနှင့် လူမှုကာကွယ်စောင့်ရှောက်ရေးဝန်ကြီးဌာနတို့အကြား အလုပ်သမားရေးရာ ပူးပေါင်းဆောင်ရွက်ခြင်း ဆိုင်ရာ နားလည်မှုစာချွန်လွှာ (MoU) လက်မှတ်ရေးထိုးနိုင်ရေး ညှိနှိုင်းဆောင်ရွက်လျက်ရှိပေမယ့် လက်ရှိမှာတော့ MoU လက်မှတ်ရေးထိုးရခြင်း မရှိသေးဘူးလို့ သိရပါတယ်။
သို့ပေမယ့် မြန်မာ-ရုရှား နှစ်နိုင်ငံချစ်ကြည်ရေး ရေရှည်ခိုင်မြဲ စေဖို့ ဆက်လက်ပြီးလည်းမြန်မာလုပ်သားတွေ စေလွှတ် နိုင်ရေး ဆက်လက် လုပ်ဆောင်သွားမယ်လို့ အလုပ်သမားဝန်ကြီးဌာန မှသိရှိရပါတယ်။
