ရန်ကုန် မြို့ မှာ ရှိ တဲ့ ထိုင်းနိုင်ငံဆိုင်ရာ သံရုံးမှာ ရွှေ့ပြောင်းလုပ်သားဗီဇာ ကိုလျှောက်ထားနိုင်ပြီ ဖြစ်တယ်လို့ ဇွန်လ ၅ရက် နေ့ မှာ ထိုင်းသံရုံး က ကြေညာထားပါတယ်။
ရွှေ့ပြောင်းလုပ်သား ဗီဇာ ( Non-LA Visa )များကို တစ်ရက်လျှင် အယောက် (၄၀၀) နှုန်းဖြင့် လျှောက်ထားနိုင်ပြီး ပြည်ပကိုတရားဝင်လုပ်သားပို့ဆောင်ပေးနေတဲ့ MOU ကုမ္ပဏီ တွေ အနေနဲ့ ဝက်ဆိုက် မှ တစ်ဆင့် ဘွတ်ကင် ယူပြီး မှသာလျှောက် ထားနိုင်တယ်လို့ ဆိုပါတယ်။
ဗီဇာလျှောက်ထားခြင်းလုပ်ငန်းစဉ်များက အစိုးရ ရုံးဖွင့်ရက် (၃) ရက်ခန့် ကြာမြင့်မှာ ဖြစ်ပြီး ဗီဇာ လျှောက်ထားမယ့်သူတွေအနေနဲ့ ချမှတ်ထားတဲ့ စည်းမျဉ်းများအတိုင်း လိုက်နာလျှောက်ထားစေလိုတယ်လို့ သံရုံးက အသိပေးထားပါတယ်။
လိုက်နာရမယ့်အချက် တွေအနေနဲ့ သံရုံး website မှတဆင့် ဘွတ်ကင်တင်ရန်လိုအပ်ခြင်း၊ မိမိရရှိတဲ့ ရက်ချိန်းအတိုင်း သံရုံးသို့ဗီဇာလာရောက်လျှောက်ထားရန်၊ လျှောက်ထားတဲ့ ဗီဇာရရှိပြီးပါက မိမိကိုယ်ရေးကိုယ်တာ အချက်အလက်များကို ဗီဇာစာမျက်နှာပေါ် မှာ မှန်မမှန်သေချာစစ်ဆေးရန် မှန်ကန်မှသာ လေကြောင်းလက် မှတ်ဝယ်ယူခြင်းပြုလုပ်ရန်တို့ အသိပေးထားပါတယ်။
ဗီဇာရရှိပြီး ချိန် ကစပြီး ရက်ပေါင်း (၉၀) အတွင်းအကျုံးဝင်တာကြောင့် MOU ကုမ္ပဏီတွေ အနေနဲ့ ထွက်ခွာရန်လိုအပ်တဲ့ အခြားပြင်ဆင်မှုတွေ ကို ၎င်းအချိန်တွင်း မှာ ပြင်ဆင်နိုင်တယ်လို့ ဆိုပါတယ်။
ထို့အပြင် ထိုင်းနိုင်ငံ လူဝင်မှုကြီးကြပ်ရေးဌာန မှ ရွှေ့ပြောင်းလုပ်သားဗီဇာများအားနေထိုင်ခွင့် (၂) နှစ်ကို အခကြေး ငွေထပ်မံကောက်ခံခြင်းမရှိဘဲ စတင်ဝင်ရောက်သည့်နေ့မှစ၍ ခွင့်ပြုပေးထားကာ မိမိ၏ လိုအပ်ချက်နှင့် ပေါ့လျော့မှုများကြောင့် ဖြစ်ပေါ်လာတဲ့ နောက်ဆက်တွဲပြသနာတွေ ကိုတော့ သံရုံးမှတာဝန်ယူဖြေရှင်းပေးမည်မဟုတ်ကြောင်း အ သိပေးထားပါတယ်။
ထိုင်းနိုင်ငံ သို့ MOU အလုပ်သမားများ စေလွှတ်ရာ မှာ မြဝတီ မှ မဲဆောက်သို့ လည်းကောင်း၊ ကော့သောင်း မှရနောင်း သို့ လည်းကောင်း ကားဖြင့်စေလွှတ်ခဲ့ ပြီး ၂၀၂၄ ခုနှစ် ဧပြီ ၂၉ရက်မှ စကာ ရန်ကုန်လေဆိပ်မှ ဒွန်မောင်းလေဆိပ် သို့ လေကြောင်းဖြင့်စတင် စေလွှတ်ခဲ့ကြောင်း သိရပါတယ်။
