ထိုင်းနိုင်ငံအတွင်းရောက်ရှိ၀င်ရောက်လုပ်ကိုင်နေကြတဲ့ တရားမဝင်မြန်မာအလုပ်သမားများအပါအ၀င် နိုင်ငံခြားသားအလုပ်သမားများကို တရား၀င်အလုပ်သမားများအဖြစ် နေထိုင်အလုပ်လုပ်ကိုင်နိုင်ဖို့ နေထိုင်ခွင့်အထောက်အထားလက်မှတ် ပန်းရောင်ကတ်ပြုလုပ်ပေးဖို့ ထိုင်းအစိုးရအတည်ပြုလိုက်တယ်လို့ စုံစမ်းသိရှိရပါတယ်။
"ဟုတ်တယ်။ အတည်ပြုပေးလိုက်ပြီလေ။ ထိုင်းအလုပ်သမား၀န်ကြီးဌာနကနေ ထိုင်းအစိုးရထံကိုတင်ပြလိုက်လို့ ထိုင်းအစိုးရကအတည်ပြုပေးလိုက်တာ။ ခွင့်ပြုချက်တော့ကျလာပြီ။ ဘယ်တော့စပြီးလုပ်ရမယ်ဆိုတဲ့ရက်အတိအကျတော့ မပါသေးဘူး။ ဘယ်တော့စလုပ်မယ် ကုန်ကျစရိတ်ဘယ်လောက်ဆိုတာက နောက်ပိုင်းသတ်သတ်ထုတ်ပြန်လာလိမ့်မယ်"လို့ ထိုင်းနိုင်ငံအခြေစိုက် ထိုင်းရောက်မြန်မာအလုပ်သမားများကို ကူညီဆောင်ရွက်ပေးနေသူတစ်ဦးက ဆိုပါတယ်။
ထိုင်းနိုင်ငံအတွင်းမှာ ၀င်ရောက်နေထိုင်လုပ်ကိုင်နေတဲ့ မြန်မာ၊ ဗီယက်နမ်၊ လာအိုနဲ့၊ ကမ္ဘောဒီးယားနိုင်ငံစတဲ့နိုင်ငံခြားသားအလုပ်သမားတွေကို တရားဝင် အလုပ်သမားဖြစ်အောင် နေထိုင်လုပ်ကိုင်နိုင်ဖို့ နေထိုင်ခွင့်အထောက်အထားလက်မှတ် ဘတ်ပန်းရောင်ကတ်ပြုလုပ်ပေးဖို့ ထိုင်းအလုပ်သမား၀န်ကြီးဌာနက ထိုင်းအစိုးရကိုတင်ပြခဲ့တာကြောင့် ထိုင်းအလုပ်သမားဝန်ကြီးနဲ့ သက်ဆိုင်ရာဌာနအသီးသီးမှ တာဝန်ရှိသူတွေတွေ့ ဆုံဆွေးနွေးခဲ့ကြပြီး ထိုင်းနိုင်ငံအတွင်း တရားမဝင် နေထိုင်လုပ်ကိုင်နေတဲ့ နိုင်ငံခြားသားအလုပ်သမားတွေကို တရားဝင် အလုပ်သမားဖြစ်အောင် နေထိုင်ခွင့်အထောက်အထား ဘတ်ပန်းရောင်ကတ်ပြုလုပ်ပေးဖို့ ဆုံးဖြတ်ခဲ့တာဖြစ်တယ်လို့သိရပါတယ်။
အခုလိုဆုံးဖြတ်ခဲ့ခြင်းဟာ မြန်မာနိုင်ငံမှာ ဖြစ်ပေါ်နေတဲ့နိုင်ငံရေးအခြေအနေများကြောင့် ထိုင်းနိုင်ငံဘက်ကို တရားမဝင် ဝင်ရောက်လာကြတဲ့ မြန်မာနိုင်ငံသားများနဲ့ အကြောင်းအမျိုးမျိုးကြောင့် နေရပ်ပြန်ဖို့အခက်အခဲရှိနေကြတဲ့ သက်တမ်းပြည့် MoU အလုပ်သမားများအတွက်အဆင်ပြေစေဖို့ အတွက်ဆုံးဖြတ်ခဲ့တာဖြစ်တယ်လို့ ထိုင်းအလုပ်သမားဝန်ကြီးကဆိုထားတယ်လို့ သိရပါတယ်။
ဒါ့အပြင် ၂၀၂၅ ခုနှစ်၊ ဖေဖော်ဝါရီလ ၁၃ ရက်နေ့မှာ (Work Permit) သက်တမ်းကုန်ဆုံးမဲ့ မြန်မာ အပါအဝင် နိုင်ငံခြားသားအလုပ်သမားတွေကို (၂) နှစ် သက်တမ်းတိုးခွင့်ပြုမှာဖြစ်ပြီး သက်တမ်းကုန်ဆုံးပါကလည်း MoU အလုပ်သမားများကဲ့သို့ (၂) နှစ်သက်တမ်း ထပ်မံတိုးပေးသွားမယ်လို့လည်း ထုတ်ပြန်ချက်မှာ ဖော်ပြထားတယ်လို့ သိရပါတယ်။
ဒါ့အပြင်ထိုင်း-မြန်မာ နယ်စပ်ဒေသတွေမှာ Border Pass စာအုပ်အပြာများနဲ့ အလုပ်လုပ်ကိုင်နေတဲ့ အလုပ်သမားများကိုလည်း အရင်က ၃ လ နေထိုင်လုပ်ကိုင်ခွင့်ပြုထားရာမှ အခုအခါမှာ ၆ လအထိ နေထိုင်လုပ်ကိုင်ခွင့်ပြုသွားမယ်လို့လည်း သိရပါတယ်။
