ထိုင်းနိုင်ငံ၊ ချင်းမိုင်မြို့က ဆောက်လုပ်ရေးဆိုက်တစ်ခုမှာ အလုပ်လုပ်နေတဲ့ MOU/CI ကိုင်ဆောင်ထားတဲ့ မြန်မာအလုပ်သမား ၂၁ ဦးရဲ့ လုပ်အားခ တစ်နှစ်စာ ကို သူဌေးက မပေးတဲ့ အတွက် ထိုင်းရောက်မြန်မာအလုပ်သမားအရေးကူညီပေးနေတယ် WAG မဟာမိတ်အဖွဲ့မှ ကူညီဖြေရှင်းပေးခဲ့ရာလုပ်ခလစာရရှိရန် ညှိနှိုင်းမှုအဆင်ပြေခဲ့တယ်လို့ သိရပါတယ်။

 

၎င်းဆောက်လုပ်ရေးမှ မြန်မာလုပ်သား ၂၁ဦးဟာ ဖိုးလက်မောင်းသူဌေးနဲ့လုပ်ကိုင်ခဲ့တာ မှာ သူဌေးဖြစ်သူက လုပ်သားတွေရဲ့ လုပ်အားခ တစ်နှစ်စာ စုစုပေါင်း ကျန်ငွေ ဘတ် ၁၄၀၀၀၀၀ ကို မပေးဘူးလို့ ဆိုပါတယ်။

 

လုပ်ခလစာ မရတဲ့ အတွက် မြန်မာအလုပ်သမားတွေဟာ အခက်ခဲ ဖြစ်ပေါ်တာကြောင့် WAG အလုပ်သမားမဟာမိတ်အဖွဲ့ကို အကူညီတောင်းခံခဲ့ တဲ့ အတွက် အောက်တိုဘာ ၂ရက်နေ့မှာ မြို့နယ်ဆဝါဒီကန်ရုံးကို အလုပ်သမားတွေနဲ့အတူ တိုင်ကြားပေးခဲ့တယ်လို့ သိရပါတယ်။

 

အခုလို တိုင်ကြားတဲ့အတွက် ဆဝါဒီကန်ရုံးမှ သူဌေး ဖြစ်သူကို ဆက်သွယ်ခေါ်ယူပြီး အလုပ်သမားတွေရှေ့မှာ ညှိနှိုင်းပေးခဲ့ရာ ကျန်ရှိလုပ်ခလစာ စုစုပေါင်း ဘတ် ၁၄၀၀၀၀၀ ကို ၅လ အတွင်း အကြေပေးမယ်လို့ သဘောတူခဲ့ပြီး ယနေ့အောက်တိုဘာ ၁၄ရက်မှာ လုပ်ခလစာ တဖြတ်ကို ပေးခဲ့တယ်လို့ သိရပါတယ်။

 

ထိုင်းနိုင်ငံရောက် မြန်မာလုပ်သားတွေ ကို လုပ်ငန်းရှင် အချို့က လုပ်ခလစာ ပုံမှန်မပေးတာတွေ ကြိုတင်အကြောင်းမကြားဘဲ အလုပ်ထုတ်တာတွေ မကြာခဏ ဖြစ်ပေါ်နေပြီး ထိုင်းနိုင်ငံရှိ မြန်မာအလုပ်သမားအဖွဲ့စည်းတွေက ကူညီ တိုင်ကြားကာ ဖြေရှင်းပေးနေရပါတယ်။