ထိုင်းနိုင်ငံ စမူပကန်ခရိုင် ဘန်ပိုဒေသတွင် နေထိုင်လုပ်ကိုင်နေတဲ့ မြန်မာအလုပ်သမားတွေ ရဲ့ အခန်း အတွင်းသို့ ဥပဒေမဲ့ ဝင်ရောက် စစ်ဆေးပြီး ငွေညှစ်တဲ့ ထိုင်းရဲ ကို ဘန်ပိုရဲစခန်း တွင် သွားရောက် တိုင်ကြားခဲ့တယ်လို့ UFFအလုပ်သမား ကူညီရေးအဖွဲ့ထံမှ သိရပါတယ်။
ဖြစ်စဉ်မှာ ထိုင်းရဲအချို့က မြန်မာအလုပ်သမားတွေရဲ့ အခန်းထဲသို့ ဝင်ရောက် စစ်ဆေးပြီး အလုပ်သမားတွေကို ရဲစခန်းသို့ ခေါ်ဆောင်ကာ အကြောင်းပြချက်အမျိုးမျိုးနဲ့ငွေကြေးတောင်းယူတယ်လို့ သိရပါတယ်။
"ပုလိပ်တွေက ဖမ်းမိန့်မရှိ စစ်ဆေးပိုင်ခွင့်မရှိဘဲနဲ့ လုပ်သားတွေရဲ့အခန်းထဲကိုဝင်တယ် ပြီးတော့ ရဲစခန်းကိုခေါ်ခဲ့ ပြီး ဖုန်းတွေစစ်တယ် စာရွက်စာတမ်းတွေစစ်တယ် ပြီးရင် ဘာဖြစ်တယ်ညာဖြစ်တယ် အကြောင်းပြချက်ပေးပြီး ငွေညှစ်တယ်"လို့ UFFမှ တာဝန်ရှိသူတစ်ဦးက ပြောပါတယ်။
မြန်မာအလုပ်သမားတွေထံမှ တစ်ဦး ကို ထိုင်းဘတ် ၆၀၀၀မှ၁၀၀၀၀ ကျော်အထိ တောင်းယူ ပြီး ယခု ဖြစ်ရပ်များကြောင့် မြန်မာအလုပ်သ မားစုစုပေါင်း (၈)ဦးခန့် ထိခိုက်နစ်နာခဲ့ရကာ တချို့မှာ လွန်ခဲ့တဲ့ (၄၊၅၊၆) လခန့်ကတည်းက အုပ်စုလိုက် ငွေညှစ်ခံရမှုများကို ကြုံတွေ့ခဲ့ရတယ်လို့ အလုပ်သမားများက ပြောကြားခဲ့ ကြောင်းသိရပါတယ်။
အခုလို ထိုင်းရဲမှ ငွေညှစ်တောင်းယူတာကြောင့် ၂၀၂၅ ခုနှစ် ဒီဇင်ဘာလ ၂၉ ရက် မှာ Union Friendship Family (UFF) အလုပ်သမားကူညီရေးအဖွဲ့မှ ဘန်ပိုဒေသရှိ ပလိပ်ရုံးသို့ သွားရောက်တိုင်ကြား၍ ဝင်ရောက်ဖြေရှင်းပေးခဲ့ရာ ညှိနှိုင်းဆွေးနွေးမှုအပြီးတွင် ပလိပ်အရာရှိဘက်မှ ဖြစ်ရပ်အတွက် ပြန်လည်တောင်းပန်ခဲ့ပြီး နောက်ထပ် ယင်းကဲ့သို့ ဖြစ်ရပ်များ ထပ်မံမဖြစ်ပွားစေရန် ကတိပြုခဲ့တယ်လို့ဆိုပါတယ်။
ဒါ့အပြင် နစ်နာခဲ့တဲ့ မြန်မာအလုပ်သမားတွေရဲ့ ငွေကြေးများကိုပါ ပြန်လည်ရယူပေးနိုင်ခဲ့တယ်လို့ UFF အလုပ်သမားကူညီရေးအဖွဲ့က ထုတ်ပြန်ထားပါတယ်။
ထိုင်းနိုင်ငံအတွင်း ထိုင်းရဲ တွေက ရွှေ့ပြောင်းလုပ်သား ရဲ့ လက်ကိုင်ဖုန်းများထဲ လောင်းကစားဂိမ်း တွေ ညစ်ညမ်းဗီဒီယို တွေ ကို စစ်ဆေးဖမ်းဆီးနေတာကြောင့် ထိုင်းရောက် မြန်မာနိုင်ငံသားတွေအနေနဲ့ အသွားအလာဆင်ချင်ကျရန် နဲ့ အပြင်သွားပါက ဖုန်းထဲမှ တရားမဝင်တဲ့ အရာတွေကို ဖျက်သွားကျဖို့ UFFမှ အသိပေးထားပါတယ်။
