ထိုင်းနိုင်ငံ ကချနပူရီပြည်နယ် အတွင်းမှာ အထောက်အထားမဲ့ မြန်မာရွှေ့ပြောင်းလုပ်သား ၅၀ကျော်အား တင်ဆောင်လာတဲ့ ပစ်ကပ်ကားကို ရဲတပ်ဖွဲ့က လိုက်လံဖမ်းဆီးသဖြင့် မောင်းပြေးရာကနေ အရှိန်လွန် ပြီး တိမ်းမှောက်မှု ဖြစ်ပွားခဲ့တယ်လို့ ထိုင်းဒေသတွင်း သတင်းတွေ အရသိရပါတယ်။
၂၀၂၆ခုနှစ် ဖေဖေါ်ဝါရီ ၂၆ရက် ဒီကနေ့မနက်ပိုင်းမှာ ဖြစ်ပွားခဲ့တာဖြစ်ပြီး ယာဉ်တိမ်းမှောက်မှုကြောင့် ယာဉ်ပေါ်ပါလာတဲ့ မြန်မာလုပ်သားတွေထဲမှ ၂၃ ဦးထိခိုက်ဒဏ်ရာတွေရရှိခဲ့တယ်လို့ သိရပါတယ်။
သတင်းဖေါ်ပြချက်အရ အဝေးပြေးရဲတပ်ဖွဲ့ဟာ နယ်စပ်ဖြတ်ကျော် တရားမဝင်ဝင်ရောက်မှုတွေကို စစ်ဆေးဖို့ ကင်းလှည့်နေစဉ် ဆိုင်းယော့ခ်ခရိုင်ဘက်ကနေ မြို့ထဲကို ဦးတည်မောင်းနှင်လာတဲ့ ပစ်ကပ်ကားတစ်စီးကို မသင်္ကာသဖြင့် စစ်ဆေးဖို့ ကြိုးစားခဲ့ပေမဲ့ ကားသမားက ရပ်မပေးဘဲ အရှိန်တင်ပြီး မောင်းပြေးသွားပြီးနောက် ဝမ်ဒုံမြို့နယ် အရောက်တွင် အရှိန်လွန်ပြီး တိမ်းမှောက်သွားခဲ့တယ်လို့ ဆိုပါတယ်။
၎င်းပစ်ကပ်ကားထဲမှာ မြန်မာရွှေ့ပြောင်းလုပ်သား အမျိုးသား၊အမျိုးသမီး ၅၀မှ၆၀ ခန့်အထိ ကျပ်ညပ်စွာ လိုက်ပါခဲ့ ပြီး ယာဉ်တိမ်းမှောက်ချိန်တွင် လမ်းပေါ်သို့ လွင့်စင်ကျခဲ့ကာ မြန်မာရွှေ့ပြောင်းလုပ်သား၂၃ဦး ထိခိုက်ဒဏ်ရာရခဲ့တယ်လို့ သတင်းမှာဖေါ်ပြထားပါတယ်။
အခင်းဖြစ်ပွားရာ ကို နယ်မြေခံ ကယ်ဆယ်ရေးအဖွဲ့တွေ အမြန်ရောက်ရှိလာကာ ဒဏ်ရာရရှိသူတွေကို ရှေးဦးနည်းဖြင့် ကုသပေးပြီးနောက် ဆေးရုံသို့ပို့ဆောင်ပေးကာ ဒဏ်ရာပြင်းထန်သူများလည်း ပါရှိတယ်လို့ သိရပါတယ်။
ဒဏ်ရာမရတဲ့ ကျန်ရှိသူတွေကိုတော့တရားမဝင် ဝင်ရောက်မှုနဲ့ ရဲတပ်ဖွဲ့က ဖမ်းဆီးထိန်းသိမ်းထားပြီး ဒီလူကုန်ကူးမှုကွန်ရက်ရဲ့ နောက်ကွယ်က ခေါင်းဆောင်တွေနဲ့ ပတ်သက်သူတွေကို ဖော်ထုတ်နိုင်ဖို့ ရဲတပ်ဖွဲ့က ဆက်လက် စစ်ဆေးနေတယ်လို့ သိရပါတယ်။
Ref-Kanchanaburi News
