ထိုင်းနိုင်ငံ၊ စမွတ်ဆာခွန်ရှိ သံစက်ရုံတွင် နေထိုင်ခွင့် သက်တမ်းတိုးခ ကို စက်ရုံ ဘက်က ဘတ် တစ်သောင်း တောင်းတဲ့ အတွက် ဈေးလျော့ပေးဖို့ ကို မြန်မာအလုပ်သမားတွေက ငြိမ်းချမ်းစွာဆန္ဒထုတ်ဖော်တောင်းဆိုတာကို ထိုင်းရဲ တွေ နဲ့ လုံခြုံရေး အဖွဲ့ တွေက ဖမ်းဆီး ဖြိုခွင်းတာတွေ ပြုလုပ်ခဲ့တယ်လို့ ထိုင်းရောက်မြန်မာအလုပ်သမားတွေကို ကူညီပေးနေတဲ့ အဖွဲ့စည်းတွေ ထံ က သိရပါတယ်။

""သက်တမ်းတိုးခဈေးလျှော့ပေးဖို့ တောင်းဆိုတာ တဲ့ မြန်မာအလုပ်သမားတွေကို ထိုင်းရဲနဲ့လုံခြုံရေး တွေခေါ်ပြီး နံပတ် တုတ်ကိုင် ဖမ်းဆီး ခိုင်းတာက မြန်မာအလုပ်သမားတွေ အပေါ် အနိုင်ကျင့်တာ ဖြစ်တယ်။တကယ်က ဈေးနှုန်းအဆမတန် ကောက်ခံ ထားသူတွေ ကို အရေးယူရမယ့် အစား အလုပ်သမားတွေ အပေါ် ဒီလို ကိုင်တွယ်တာ ကန့်ကွက်ပါတယ်""လို့ ထိုင်းရောက်မြန်မာအလုပ်သမား အရေးလှုပ်ရှားသူ အေအေစီ ကိုရဲမင်း က ပြောပါတယ်။

အဆိုပါ စက်ရုံ မှာ မြန်မာအလုပ်သမား ၃၀၀ ခန့်ရှိပြီး ဒီဇင်ဘာလ ၁၉ ရက်နေ့ နံနက်ပိုင်း က   စက်ရုံရှိ  မြန်မာအလုပ်သမားတွေက အလုပ်လုပ်နေထိုင်ခွင့် သက်တမ်းတိုးရန်အတွက် အလုပ်သမား ၁ ဦးကို ထိုင်းဘတ် ငွေ တစ်သောင်း ကောက်ခံ တာ ကို  သင့်တင့် တဲ့  စျေးနှုန်းဆောင်ရွက်ပေးဖို့  အလုပ်မဝင်ခင် ငြိမ်းချမ်းစွာ ဆန္ဒပြ ရာကနေ  စက်ရုံပိုင်ရှင်က ထိုင်းရဲနှင့် နယ်မြေလုံခြုံရေးအဖွဲ့များကို ခေါ်ယူကာ  မြန်မာအလုပ်သမားတွေကို ဖြိုခွင်း ဖမ်းဆီးတာတွေ  လုပ်ဆောင်ခဲ့တယ်လို့ သိရပါတယ်။

၎င်းဆန္ဒထုတ်ဖော်တာမှာ မြန်မာအလုပ်သမား လေးဦး ကို ထိုင်းရဲတွေက လက်ထိပ်ခတ် ဖမ်းစီးကာ ရဲကားပေါ် ကို တင်ထားခဲ့တယ်လို့ ဆိုပါတယ်။

"မြန်မာအလုပ်သမားလေးဦး ကို လက်ထိပ်ခတ် ဖမ်းပြီး တော့ ကားပေါ် တင်ထားတာ ကျန်တဲ့အလုပ်သမားတွေက ဆက်ပြီးတောင်းဆိုတော့ အခုတော့ ဖမ်းထားတဲ့ လေးဦး ကို ပြန်လွှတ်ပေးလိုက်တယ်လို့ သိရတယ်။သက်တမ်းတိုးခ ဘတ်တစ်သောင်း ကိုတော့ ညှိနေတယ်လို့ တော့ ကြားပါတယ်""လို့ ထိုင်းရောက်မြန်မာအလုပ်သမားတစ်ဦးကပြောပါတယ်။

ထိုင်းနိုင်ငံ အတွင်း နေထိုင်ခွင့် သက်တမ်းတိုးခ ကို စက်ရုံ တွေက ပိုမိုကောက်ယူတာနဲ့ ပတ်သက်ပြီး ယခုရက်ပိုင်း မှာ စက်ရုံ အချို့ ရှိ  မြန်မာအလုပ်သမားတွေက သင့်တင့်တဲ့ဈေးနူန်း ကောက်ယူပေးဖို့ ငြိမ်းချမ်းစွာဆန္ဒထုတ်ဖော်တောင်းဆိုတာတွေ ပြုလုပ်လျက်ရှိပြီး အလုပ်သမားတွေတောင်းဆိုညှိနှိုင်းမှုတွေ အဆင်ပြေတာတွေ များတယ်လို့ထိုင်းရောက် မြန်မာအလုပ်သမားရေးကူညီပေးသူတွေထံကသိရပါတယ်။ 

 #MyanmarLabourNews