မလေးရှားနိုင်ငံ အတွင်း အကြောင်းအမျိုးမျိုးနဲ့ ဖမ်းဆီးထိန်းသိမ်းခံရတဲ့ ရွှေ့ပြောင်းမြန်မာလုပ်သား ၁၀၀ ကျော်ကို မလေးရှားအစိုးရက ကွာလာလမ်ပူအပြည်ပြည်ဆိုင်ရာလေဆိပ်က တဆင့် ပြည်နှင်ဒဏ်ပေးလိုက်တယ်လို့မလေးရှားအစိုးရရဲ့ လူဝင်မှုကြီးကြပ်ရေးဌာနက သြဂုတ် ၂၅ ရက်နေ့မှာ ထုတ်ပြန်ထားပါတယ်။
၄င်းမြန်မာလုပ်သားတွေဟာ မလေးရှားနိုင်ငံအတွင်းတရားမဝင်ဖြတ်သန်းခြင်း (သို့မဟုတ်) ပါမစ်မရှိဘဲ ဝင်ရောက်နေထိုင်ခြင်း၊ ခွင့်ပြုထားတဲ့ ကာလထက်ကျော်လွန်နေထိုင်ခြင်း တို့ကို ကျုးလွန်တဲ့ အတွက် သတ်မှတ်ထားတဲ့ ပြစ်ဒဏ်ကျခံပြီးနောက် ဂျိုဟိုးပြည်နယ် ပီကန်နာနာ့စ်လူဝင်မှုကြီးကြပ်ရေးထိမ်းသိမ်းရေးစခန်းကနေကွာလာလမ်ပူ အပြည်ပြည်ဆိုင်ရာ လေဆိပ်မှတဆင့် သက်ဆိုင်ရာ မြန်မာပြည် ရန်ကုန်သို့ လွှဲပြောင်းပေးတာဖြစ်တယ်လို့သိရပါတယ်။
အခုလိုပြစ်ဒဏ်ကျခံပြီးနေရပ်ကို ပြန်လာရန်အတွက် မိသားစုဝင်တွေက လေယာဉ်လက်မှတ် အတွက် မလေးရှားငွေ ရင်းဂစ် ၇၃၀ ကို မြန်မာသံရုံး လူဝင်မှု ထိန်းသိမ်းရေးစခန်း တာဝန်ရှိသူတွေထံ ပေးသွင်းရတယ်လို့ သိရပါတယ်။
ပြည်နှင်ဒဏ်ပေးခံရသူတွေဟာ မလေးရှားနိုင် ငံ အတွင်း နှစ်အတော်ကြာသည်အထိ ဝင်ရောက်ခွင့် မရဘူးလို့ သိရပါတယ်။
ပြည်နှင်ဒဏ်ပေးခံရသူ ထဲမှာ မြန်မာ ၁၁၁ ဦးအပြင် အင်ဒိုနီးရှား ၁၄၀ ဦး၊ ဘင်္ဂလားဒေ့ရှ် ၁၄ ဦး၊ တရုတ် ၇ ဦး၊ ပါကစ္စတန် ၆ဦး၊ ထိုင်း ၆ ဦး၊ ကမ္ဘောဒီးယား ၅ ဦး၊ နီပေါ ၂ ဦး နဲ့ သီရိလင်္ကာ နိုင်ငံသား ၁ ဦး တို့ကိုလည်း ပြည်နှင်ဒဏ်ပေးထားတယ်လို့ ဖော်ပြထားပါတယ်။
ပြီးခဲ့တဲ့ ဩဂုတ် လဆန်းပိုင်းကလည်း မြန်မာလုပ်သား ၁၀၁ ဦးကို ကွာလာလမ်ပူလေဆိပ်ကနေတစ်ဆင့် မြန်မာနိုင်ငံသို့ ပြန်ပို့ခဲ့ကာ ပြည်နှင်ဒဏ်ပေးခဲ့တယ်လို့ မလေးရှားလူဝင်မှုကြီးကြပ်ရေးဌာနက သိရပါတယ်။
