မြန်မာ အလုပ်သမား ၃၀၀ နီးပါး MOU စာချုပ် ချိုးဖောက်ခံရပြီး အလုပ်အကိုင်အတွက် အခက်အခဲတွေ့ရတယ်လို့ အလုပ်သမား တဦးက Myanmar Labour News ကို ပြောပါတယ်။ မြန်မာနိုင်ငံက ZIN TUN WIN 999 CO.,LTD ကုမ္ပဏီမှာ MOU စာချုပ် ချုပ်ဆိုပြီး မြန်မာအလုပ်သမား ၂၇၃ ဦးက ထိုင်းနိုင်ငံကို ရောက်ရှိလာတာလို့ သိရပါတယ်။
“၉ လပိုင်း(စက်တင်ဘာ) ၁၃ ရက်မှာ ထိုင်းနိုင်ငံ၊လယောင်မြို့ကို ရောက်တယ်။ စာချုပ်ချုပ်ဆိုထားတဲ့ ထိုင်းကုမ္ပဏီက ဒေဝါလီခံသွားလို့ အေဂျင်စီဘက်က ပြောလာတယ်။ ၁၇ ရက်နေ့ရောက်တော့ စီရတ်ချာမြို့ကို ခေါ်သွားတယ်” လို့ အလုပ်သမားတဦးက ပြောပါတယ်။
စီရက်ချာမြို့မှာတော့ MOU စာချုပ်ပါ လုပ်ငန်းတွေမလုပ်ရဘဲ ဆောက်လုပ်ရေး လုပ်ငန်းတွေမှာ လုပ်ကိုင်ရ မယ်လို့ အေဂျင်စီဘက်က ပြောဆိုခဲ့တယ်လို့ အလုပ်သမားတချို့ အေဂျင်စီခေါ်နဲ့အတူ လိုက်သွားရတယ်လို့ သိရပါတယ်။
“ မြန်မာနိုင်ငံမှာ MOU ချုပ်တော့၊ ရေလိုင်း၊မီးလိုင်းလုပ်ရမယ်ဆိုပြီး ချုပ်လာတာ။ ဒီရောက်တော့ ဆောက်လုပ်ရေး ဆိုပြီး ပြောတယ်။ အများစုကတော့ စာချုပ်က သတ်မှတ်ထားတဲ့ လုပ်ငန်းပဲ လုပ်မယ်ဆိုပြီး ပြောထားတယ်။ အေဂျင်စီက ဆောက်လုပ်ရေး အလုပ် လုပ်မဲ့သူ တချို့ကို ခေါ်ဆောင်တယ်။ တချို့လည်း ခေါ်သွားတဲ့ နေရာမှာ မနေရဲလို့ ပြန်လာတယ်။ ခေါ်သွားတဲ့ တောထဲမှာ အယောက် ၄၀ လောက် ကျန်ခဲ့သေးတယ်။” လို့ အလုပ်သမား တဦးက ပြောပါတယ်။
လက်ရှိ MOU လုပ်သား ၂၃၃ ဦး စီရတ်ချာမြို့က PENRUND CONDO VIEW အောက်ဆုံးအထပ်မှာနေထိုင်နေပြီး စာချုပ်ပါ အလုပ်အကိုင်အတိုင်း လုပ်ကိုင်ရဖို့ မြန်မာအလုပ်သမား မဟာမိတ်အဖွဲ့ WAG ဆီ အကူအညီ တောင်းခံထားတယ်လို့ အလုပ်သမားတွေက ပြောကြားထားပါတယ်။
Photo -WAG
#MyanmarLabourNews
