ရှမ်းပြည်မြောက်ပိုင်း မူဆယ်ရှိတရုတ်လုပ်ငန်းရှင်တွေဟာ အလုပ်သမားများအပေါ်လုပ်ခလစာရှင်းပေးရာမှာ ယခင်တရုတ်ယွမ်ငွေအစား မြန်မာကျပ်ငွေနဲ့သာ လုပ်ခလစာရှင်းတာတွေပြုလုပ်လာလို့ အလုပ်သမားတွေနစ်နာနေရတယ်လို့ သိရပါတယ်။
"ဟုတ်တယ်။ အရင်ကဆိုရင်သူတို့ပေးတာ ၁၅၀၀။ ၁၅၀၀ ဆိုရင်ငွေပေါက်ဈေးအရတွက်ပေးတာမျိုးလုပ်ရမှာ။ မဟုတ်ဘူးလစာပေးရင် ၈သိန်း ၉သိန်းဆိုပြီးပေးလာတယ်။ တစ်ကယ်ဆိုရင်ငွေပေါက်ဈေးအရ ၁၀သိန်း အထက်ရှိရမယ်။ အရင်ကတရုတ်ငွေဆိုရင် သိပ်ဟုတ်တယ်ထင်တာမဟုတ်ဘူး ခုကျတရုတ်ငွေဈေး ကမြင့်လာတယ်။ ကုန်သည်ရောလုပ်ငန်းရှင်ရောက ခုဆိုဒေါ်လာအခက်အခဲဖြစ်တော့ ဒေါ်လာထိုင်းဘတ်ငွေအစား တရုတ်ငွေကိုလည်းပြောင်းလဲအသုံးပြုလာတော့ တရုတ်ငွေဈေးကမြင့်လာတယ်။ မြန်မာကျပ်ငွေကကြာလေကျလေဆိုတော့ ကျပ်ငွေကိုထုတ်ရှင်းလာတယ်။ ပေါက်ဈေးအတိုင်းဆိုရင်တော်သေးတယ်"လို့ မူဆယ်ဒေသခံတစ်ဦးကဆိုပါတယ်။
လက်တစ်လောကာလတွေမှာ မြန်မာကျပ်ငွေတန်ဖိုးကျနေပြီး နိုင်ငံခြားငွေဈေးတွေဆက်တိုက်မြင့်တက်လျှက်ရှိရာမှာ တရုတ်ငွေဈေးလည်းပါ၀င်လာခဲ့ပါတယ်။
ဩဂုတ် (၁)နေ့ရဲ့ တရုတ်ငွေ ယွမ် (၁၀၀) လျှင် မြန်မာကျပ်ငွေ( ၆၉,၅၀၀)ရှိနေရာမှ ဩဂုတ်(၂)ရက်ကနေ သြဂုတ်၅ရက်နေ့အထိ အဆိုပါဈေးတန်းနဲ့ရှိနေခဲ့တာဖြစ်ပြီး သြဂုတ်၆ရက်နေ့မှာတော့ တရုတ်ငွေယွမ် (၁၀၀)လျှင် မြန်မာငွေ ၇၁၉၀၀ ကျပ် ကနေ ၇၅၂၀၀ကျပ် အထိ သြဂုတ် ၇ရက်နေ့မှာ ယွမ် (၁၀၀)လျှင် ကျပ် (၇၂,၅၀၀)ကေန ၇၆၀၀၀ ကျပ် အထိဖြစ်လာတာဖြစ်ပါတယ်။
ပြီးခဲ့တဲ့ ဇူလိုင်လရဲ့ တရုတ်ငွေပေါက်ဈေးအရ ယွမ် (၁၀၀)လျှင် ကျပ်ငွေ (၆၅,၀၀၀)သာရှိနေရာမှ ယခုအခါ ၇၂၀၀၀ ကနေ ၇၆၀၀၀ အထိဖြစ်လာတာကြောင့် နေ့စဉ် ကျပ်(၅၀၀)မှ (၁၀၀၀) အကြား မြင့်တက်လာကာ ကျပ်တစ်သောင်းကျော်ကွာဟလာတာဖြစ်တာကြောင့် တရုတ်ငွေဟာ ငွေဈေးအပြောင်းအလဲများ အချိန်နှင့်အမျှထိုးတက်နေခြင်းဖြစ်ကြောင်းတွေ့ရသလို တရုတ်လုပ်ငန်းရှင်တွေကလည်း လုပ်ခလစာရှင်းရာမှာ မြန်မာကျပ်ငွေနဲ့ရှင်းပေးလာတာဖြစ်တာကြောင့် အလုပ်သမားတွေအနေနဲ့စ်နာမှုတွေရှိလာရတယ်လို့ သိရပါတယ်။
တရုတ်ငွေကို စီးပွားရေးလုပ်ငန်းရှင်တွေပြောင်းလဲအသုံးပြုလာတာဟာ ဒေါ်လာဈေးမြင့်တက်မှုနဲ့ ဒေါ်လာရှားပါးမှုကြောင့် တရုတ်ငွေကိုထည့်သွင်းအသုံးပြုလာတာလည်းဖြစ်သလို ယခုလဩဂုတ် ၁ရက်နေ့က စစ်ကောင်စီရဲ့မြန်မာနိုင်ငံတော်ဗဟိုဘဏ်ကလည်း လုပ်ငန်းရှင်တွေကိုနိုင်ငံခြားငွေထုတ်ရောင်းချရာမှာ အမေရိကန်ဒေါ်လာ၊ ထိုင်းဘတ်ငွေနဲ့ တရုတ်ငွေကိုပါထည့်သွင်းရောင်းပေးနေတာရှ်ိသလို ယခုရက်ပိုင်းမှာလည်းထပ်မံရောင်းချပေးဖို့ ကြိုတင်ကြေငြာထားတာတွေ ရှိနေတာကြောင့် တရုတ်ငွေကို တွင်တွင်ကျယ်ကျယ်အသုံးများလာလို့ တရုတ်ငွေဈေးမြင့်လာကာ မြန်မာအလုပ်သမားတွေအပေါ် တရုတ်ငွေယွမ်အစား ကျပ်ငွေကိုသာရှင်းပေးတာတွေပြုလုပ်လာတာလို့ ရွှေလီမှာရှိတဲ့စက်ရုံအလုပ်သမားတစ်ဦးကဆိုပါတယ်။
လက်ရှိ မူဆယ်မြို့တွင် ယွမ်ဈေးနှုန်းများ တစ်ရိပ်ရိပ်မြင့်တက်နေပြီး၊ တစ်ဖက်တွင်လည်း ဒေသတွင်း လမ်းပန်းဆက်သွယ်ရေးအခက်အခဲများနဲ့ တိုက်ပွဲပြင်းထန်မှုများကြောင့် အခြေခံစားသောက်ကုန်များနဲ့ လူသုံးကုန်ပစ္စည်းများဟာ ယခင်ထက်နှစ်ဆမြင့်တက်လာနေသလို မနောသုခဆန်တစ်အိတ်လျှင် ၂သိန်းခွဲခန့်အထိပေး၀ယ်နေရတယ်လို့လည်း သိရပါတယ်။
