စစ်ကောင်စီရဲ့ အလုပ်သမားဝန်ကြီးဌာနက မလေးရှားအတွက် မြန်မာလုပ်သား ခေါ်စာတင်ပြမှု အတွက် ပြည်ပအလုပ်အကိုင်အကျိုးဆောင်လိုင်စင်ရအေဂျင်စီတစ်ခုလျင် တစ်လကို လုပ်သားဦးရေ ၂၀ အထိသာ တင်ပြခွင့်ပြုတယ်လို့ မတ်လ ၂၆ရက်မှာ ထုတ်ပြန်ကြေညာပါတယ်။
မြန်မာနိုင်ငံကနေ အလုပ်သမားစေလွှတ်နေတဲ့ နိုင်ငံအလိုက် အလုပ်ခေါ်စာ လူဦးရေကန့်သက်ချက်တွေကို နေ့စဉ် နိုင်ငံပိုင်သတင်းစာကနေ ထုတ်ပြန်ကြေညာနေတာမှာ ထိုင်းနိုင်ငံအတွက် ၅၀ဦး၊ ဂျပန်နိုင်ငံအတွက် ၁၅နဲ့ ကိုရီးယားနိုင်ငံအတွက် ၁၀ဦး စင်ကာပူ အတွက် လုပ်သား ၅ဦး နဲ့ ယခုတွင် မလေးရှားနိုင်ငံအတွက် လုပ်သား၂၀ဦးသာခွင့်ပြုတော့မယ်လို့ ထုတ်ပြန်ကြေညာခဲ့ပါတယ်။
လက်တလောမှာလည်း မလေးရှားနိုင်ငံဘက်မှလုပ်ငန်းအများစု အတွက် မြန်မာအပါအဝင် နိုင်ငံခြားသား လုပ်သားခေါ်ယူတာကိုရပ်တန့်ထားလျက်ရှိပါတယ်။
"မလေးရှားကို လုပ်သား၂၀ပဲ ခွင့်ပြုတယ်။ မလေးရှားဘက်ကလည်း နိုင်ငံခြားသား လုပ်သားခေါ်ယူတာ ရပ်ထားတယ်။ အရှေ့မလေးရှား အတွက်ပဲ ခေါ်ခွင့်ပြုထားတော့ Demand letter တင်ပြဖို့အတွက် ပြင်ဆင်ဖို့ အချိန်တော့ရတာပေါ့။ ဒါပေမယ့် အသက်ကန့်သက်ချက်တွေနဲ့ အခုလို လူဦးရေကန့်သက်ချက်တွေနဲ့ ဆိုတော့ မလေးကိုလုပ်သား ပို့တဲ့ အေဂျင်စီတွေလည်းမလေး ဘက်က ပြန်ဖွင့်ရင်တောင်မလွယ်သေးဘူး” ဟုလိုင်စင်ရအေဂျင်စီမှတာဝန်ရှိသူတစ်ဦးကပြောပါတယ်။
မလေးရှားနိုင်ငံအနေဖြင့် မြန်မာအပါအဝင် နိုင်ငံခြားသား ခေါ်ယူမှုကို ပြီးခဲ့တဲ့ ၂၀၂၄ ခုနှစ် ဇွန်လ ၁ရက် ကစပြီး ရပ်နားလိုက်တာဖြစ်ပြီး အရှေ့မလေးရှားအတွက်ကိုတော့ နိုင်ငံခြားသား လုပ်သားခေါ်ယူခွင့်ပေးထားတယ်လို့ သိရပါတယ်။
စစ်ကောင်စီရဲ့အလုပ်သမားဝန်ကြီးဌာန ကြေညာချက်မှာတော့ ၂၀၂၅ခုနှစ် ဇန်နဝါရီ ၃၀ ရက်မတိုင်မီက တင်ပြထားတဲ့ အလုပ်ခေါ်စာတွေမှာ လုပ်သားဦးရေ ၂၀ ထက်ပိုပါက ပြန်လည်ပြင်ဆင်ပြီး တင်ပြရမှာ ဖြစ်ကာ တစ်လကို တစ်ကြိမ်သာ ခွင့်ပြုမယ်လို့ ဆိုပါတယ်။
အလုပ်ခေါ်စာအသစ် တင်ပြမှု ကိုတော့ မေလ ၂ရက်က စပြီး လက်ခံဆောင်ရွက်ပေးသွားမယ်လို့ ထုတ်ပြန်ထားပါတယ်။
