မလေးရှားနိုင်ငံ မှာ အကြောင်းအမျိုးမျိုးကြောင့် ပြစ်ဒဏ်ကျခံ ရပြီး လွတ်ရက်စေ့ မြန်မာအလုပ်သမား ၅၃ ဦးကို အောက်တိုဘာလ ၃၁ ရက်က ကွာလာလမ်ပူလေဆိပ်ကနေ တစ်ဆင့်မြန်မာနိုင်ငံ ပြန်ပို့လိုက်တယ်လို့ မလေးရှားလူဝင်မူကြီးကြပ်ရေးကထုတ်ပြန်ထားပါတယ်။
၎င်းမြန်မာလုပ်သားတွေဟာ ကွာလာလမ်ပူမြို့ ဘူကစ်ဂျာလီ ကန့်မှာ ထိမ်းသိမ်းခံထားရသူတွေ ဖြစ်ပြီး အများစုမှာ အထောက်အထားမပြည့်စုံဘဲ နေထိုင် အလုပ်လုပ်ကိုင်လို့ အဖမ်းခံရသူတွေ ဖြစ်ပါတယ်။
ပြစ်ဒဏ်က လွတ်မြောက်လာပြီးနေရပ်ပြန်ပို့ခံရသူတွေထဲမှာ မြန်မာ အမျိုးသားတွေသာမက အမျိုးသမီး တွေလည်းပါဝင်တာ တွေ့ရပါတယ်။
ပြီးခဲ့တဲ့ အောက်တိုဘာ၂၁ရက်က လည်း မလေးရှားနိုင်ငံ၊ ဂျိုဟိုးဘာရူး ပီကန်နာနာ့စ်လူဝင်မူကြီးကြပ်ရေးကန့်မှ ပြစ်ဒဏ်ကျခံပြီးတဲ့ မြန်မာလုပ်သား၆၂ဦး ကို မြန်မာနိုင်ငံသို့ ပြန်ပို့ခဲ့ပါတယ်။
နေရပ်ပြန်လည်ပို့ဆောင်ခံရသူတွေကို မလေးရှား လူဝင်မူကြီးကြပ်ရေးဌာနမှာ အမည်ပျက်စာရင်းသွင်းထားပြီး ၅ နှစ်အတွင်း မလေးရှားနိုင်ငံသို့ဝင်ရောက်ခွင့်ရရှိမှာ မဟုတ်ဘူးလို့ သိရပါတယ်။
မလေးရှား အစိုးရအနေနဲ့ နိုင်ငံအတွင်း အထောက်အထားမပြည့်စုံဘဲ ဝင်ရောက်နေထိုင် အလုပ်လုပ်ကိုင်တဲ့ မြန်မာအပါအဝင်နိုင်ငံခြားသားလုပ်သားတွေ ကိုစီမံချက်ဖြင့် ဖမ်းဆီးနေတာကြောင့် အထောက်အထားမရှိတဲ့ မြန်မာလုပ်သားတွေအနေနဲ့ အထူးသတိထား သွားလာ အလုပ်လုပ်ကိုင်နေရတယ်လို့ သိရပါတယ်။
