မလေးရှားနိုင်ငံ ၊ ဆလန်ပြည်နယ်၊ ဆန်းဝေးမန်တရီကောမှာ အထောက်အထားမဲ့ မြန်မာအလုပ်သမား ၂၀၀ ကျော် ဖမ်းဆီးခံရတယ်လို့ မလေးရှားလူဝင်မှုကြီးကြပ်ရေးဌာနရဲ့ ထုတ်ပြန်ချက်အရ သိပါတယ်။
မေလ ၂၂ရက် ည ၁၁နာရီ ဝန်းကျင်မှာ မလေးရှား အာဏာပိုင်တွေက နိုင်ငံခြားသား လုပ်သားများနေထိုင်ရာနေရာတွေ ကို ဝင်ရောက်စစ်ဆေးရာအထောက်အထားမဲ့ နိုင်ငံခြားသားလုပ်သား ၅၉၇ ဦး ဖမ်းဆီးခဲ့တယ်လို့ ထုတ်ပြန်ထားပါတယ်။
အဖမ်းခံရသူတွေထဲမှာ မြန်မာနိုင်ငံသား ၂၂၆ဦး ပါဝင်ပြီး အများစုမှာ ချင်းတိုင်းရင်းသားတွေ ဖြစ်တယ်လို့သိရပါတယ်။
"အဲ့ရပ်ကွက် တွေက ချင်းတိုင်းရင်းသားတွေ အများစု နေတဲ့ နေရာ ၊ အဖမ်းခံရတဲ့ မြန်မာနိုင်ငံသားထဲ မှာ ချင်းလူမျိုးက ၁၀၀ကျော် လောက် ပါတယ် ကြားတယ်။ အခုကတော့ အထောက်အထားမပြည့်စုံရင် မလေးရှားမှာက နေလို့ အဆင်မပြေတော့ဘူး ။ ကိုယ့်ဒေသ ပြန်ဖို့ကလည်း မငြိမ်းချမ်းတော့ ဖမ်းချင်လည်း ဖမ်းတော့လို့ တွေးပြီး သတိနဲ့သွားလာနေရတာပဲ။ ပြန်လို့မှမရသေးတာ။" လို့ မလေးရှားရောက်မြန်မာလုပ်သားတစ်ဦးကပြောပါတယ်။
ဖမ်းဆီးခံရသူတွေထဲ မှာ မြန်မာနိုင်ငံသားတွေအပြင် အင်ဒိုနီးရှားနိုင်ငံသား (၂၀၁) ဦး၊ ဘင်္ဂလားဒေ့ရှ် နိုင်ငံသား(၇၁) ဦး၊ ပါကစ္စတန် နိုင်ငံသား (၄၆ ) ဦး၊ နီပေါ နိုင်ငံသား(၄၄) ဦး၊ အိန္ဒိယနိုင်ငံသား (၈) ဦးနဲ့ ထိုင်းလူမျိုး ၁ ဦးတို့ ပါဝင်တယ်လို့ သိရပါတယ်။
ဖမ်းခံရသူတွေ ကို အရေးယူဖို့ အတွက် မလေးရှား လူဝင်မှုကြီးကြပ်ရေး( စမုန်ညင်းကန့် ) မှာ ထိန်းသိမ်းထားတယ်လို့ သိရပါတယ်။
Photo-cj
