မလေးရှား နိုင်ငံ ကို သွားရောက် အလုပ် လုပ် လုပ်ကိုင်ဖို့ အတွက် ထိုင်းနိုင်ငံ အတွင်း တရားမဝင် ဖြတ်ကျော် ဝင်ရောက် ခဲ့တဲ့ မြန်မာအလုပ်သမား ၈၀ကျော်ကို ဇူလိုင်၂၃ညနေပိုင်းမှာ ထိုင်းအာဏာပိုင်တွေက ဖမ်းဆီးခဲ့တယ်လို့ ထိုင်းသတင်းဌာနတွေရဲ့ ဖေါ်ပြချက်အရ သိရပါတယ်။
အဆိုပါ မြန်မာအလုပ်သမား ၈၀ကျော်ဟာ ထိုင်းနိုင်ငံ ဘက်ချ်ဘူရီခရိုင် ထောယမ်းမြို့နယ် နွန်တာချောင်ကျေးရွာရှိ နေအိမ် တစ်အိမ်၏ အနောက်ဘက် ရှိ တောထဲ တွင် အုပ်စုလိုက်နေထိုင်နေကျတယ်လို့ သတင်းပေးတိုင်ကြားလာတဲ့ အတွက်
ထိုင်းအာဏာပိုင်တွေက သွားရောက်စစ်ဆေးစဉ်မှာ အဖမ်းခံခဲ့ရတယ်လို့ဆိုပါတယ်။
အဖမ်းခံရတဲ့ မြန်မာအလုပ်သမား ၈၅ဦး မှာ အမျိုးသား၇၃ဦး၊ အမျိုးသမီး ၉ဦးနဲ့ အရွယ်မရောက်သေးတဲ့ ကလေးငယ် ၂ဦးတို့ ပါဝင်တယ်လို့ သိရပါတယ်။
၎င်း မြန်မာအလုပ်သမား တွေဟာ ထိုင်းနိုင်ငံ ကို မြဝတီ မဲဆောက်ကနေ တစ်ဆင့် ဝင်ရောက်လာတယ်လို့ဆိုပါတယ်။
ထိုင်းနိုင်ငံမှ တစ်ဆင့် မလေးရှားနိုင်ငံကို အလုပ် သွားရောက် လုပ်ကိုင် ဖို့ အတွက် ပွဲစားတွေ ကို အလုပ်သမားတစ်ဦးလျှင် ထိုင်းဘတ် ၅၀၀၀၀ မှ ၆၀၀၀၀ ကြား ပေးခဲ့ရတယ်လို့ သိရပါတယ်။
၎င်းတို့ကို ထိုင်းနိုင်ငံအတွင်းသို့တရားမဝင် ဝင်ရောက်ရန်ကြိုးပမ်းမှုဖြင့် အမှုဖွင့် စွဲချက်တင်မည်ဖြစ်ပြီး ကလေးငယ်များ ကို လူငယ်စောင့်ရှောက်ရေးစင်တာကိုပို့ဆောင်သွားမယ်လို့ သိရပါတယ်။
လက်ရှိမှာ မလေးရှား နိုင်ငံ အနေနဲ့ မြန်မာအပါအဝင် နိုင်ငံခြားသား လုပ်သား တွေ ကို တရားဝင် ခေါ်ယူမှုကို ပြီးခဲ့တဲ့ဇွန်လ၁ရက်က စပြီးယာယီ ပိတ်ထားတဲ့ အတွက် မြန်မာနိုင်ငံ မှ ပွဲစား တွေ အနေနဲ့ မလေးရှား နိုင်ငံ ကို အလည်ဗီဇာ နဲ့ လည်းကောင်း ထိိုင်းနိုင်ငံမှ တစ်ဆင့် လည်းကောင်း တရားမဝင်ပို့ဆောင်တာတွေ ရှိနေတဲ့ အတွက် အခုလို ဖမ်းဆီးခံရတာတွေ မကြာခဏ ဖြစ်နေတယ်လို့ သိရပါတယ်။
