ထိုင်းနိုင်ငံ ဘန်ကောက် ရှိ ဆောက်လုပ်နေဆဲ ရာမ ၂ မိုးပျံအမြန်လမ်းတံတား ပြိုကျမှုကြောင့် သေဆုံးသူစာရင်းထဲ မြန်မာရွှေ့ပြောင်း အလုပ်သမားနှစ်ဦးပါဝင်နေတယ်လို့ ထိုင်းသတင်းတွေရဲ့ဖေါ်ပြချက်အရသိရပါတယ်။
မတ်လ ၁၅ ရက် မနက် ၁ နာရီ ၄၈မိနစ် ခန့်က ဘန်ကောက် ရာမ ၂ရှိ ဆောက်လုပ်ဆဲ မိုးပျံအမြန်လမ်းမ စီမံကိန်း မှာ ပြိုကျမှု ဖြစ်ပွား ခဲ့တာကြောင့် ၅ဦးသေဆုံးခဲ့ကာ ၃၀ ဦးကျော် ထိခိုက်ဒဏ်ရာ ရရှိခဲ့တယ်လို့ သိရပါတယ်။
ကနဦး သတင်းထုတ်ပြန်ချက်တွေ မှာ တော့ သေဆုံးသူ ၅ ဦး တွင် ထိုင်းလူမျိုး အလုပ်သမား ၃ ဦးနဲ့ အတည်ပြုလို့ မရသေးသူ နှစ်ဦး လို့ ထိုင်းရဲ က ထုတ်ပြန်ခဲ့ ပြီး နေ့ခင်းပိုင်းမှာတော့ ကျန်သေဆုံးသူနှစ်ဦးဟာ မြန်မာ အလုပ်သမားတွေဖြစ်တယ်လို့ ထပ်မံထုတ်ပြန်ခဲ့တယ်လို့ ထိုင်းသတင်းတွေ ကဖော်ပြပါတယ်။
ထိခိုက်ဒဏ်ရာ ရရှိသူတွေ ထဲမှာ လည်း မြန်မာအလုပ်သမားတွေ ပါဝင်နေပြီး ထိခိုက်မှုပြင်းထန်သူတွေလည်း ပါရှိကာ လက်ရှိမှာ ဆေးကုသမှု ခံယူနေရတယ်လို့ သိရပါတယ်။
သေဆုံးသွားခဲ့တဲ့ မြန်မာရွှေ့ပြောင်းလုပ်သား နှစ်ဦး မှာ ကိုဇင်ကိုအောင် နဲ့ ကိုနိုင်လင်း အောင်တို့ဖြစ်တယ်လို့ ထိုင်းသတင်းတွေမှာ ဖော်ပြထားပြီး အသေးစိတ်အချက်လက်တွေကိုတော့ ထုတ်ပြန်ထားတာမတွေ့ရသေးပါဘူး။
ပြီးခဲ့တဲ့ ၂၀၂၄ခုနှစ် နိုဝင်ဘာ၂၉ရက်ကလည်း စမတ်စခွန်ပြည်နယ် မြောင်ခရိုင်က ရာမ၂လမ်း ပေါ်က ဆောက်လုပ်ဆဲ မိုးပျံတံတား ပြိုကျတာကြောင့် မြန်မာအလုပ်သမား၄ဦး အပါအဝင် ၆ဦးသေဆုံးပြီး ၁၁ဦး ထိခိုက်ဒဏ်ရာ ရရှိခဲ့သေးတယ်လို့ သိရပါတယ်။
Photo- The Nation Thailand
