ပြည်ပ နိုင်ငံ တွေရှိ မြန်မာသံရုံး တွေ မှာ မြန်မာနိုင်ငံကူးလက်မှတ် နဲ့ စပ်လျဉ်း ပြီး သက်တမ်းတိုးခြင်း အတွက် စာအုပ်ဖိုးနှုန်း ထားကိုစက်တင်ဘာ ၁ရက် ကစပြီး တိုးမြှင့်ကောက်ယူမယ်လို့ သံရုံးတွေရဲ့ လူမှုကွန်ယက်စာမျက်နှာတွေမှာ အသိပေးကြေညာထားပါတယ်။
ကိုရီးယားနိုင်ငံမြန်မာသံရုံး ဆိုလ်းမြို့က တော့ ယခင်က နိုင်ငံကူးလက်မှတ်သက်တမ်းတိုးခြင်းနဲ့ စပ်လျဉ်းပြီး စာအုပ်တစ်အုပ် အတွက် ကိုရီးယားဝမ် ၄၈၀၀၀ သတ်မှတ်ထားရာကနေ စက်တင်ဘာ၁ရက်ကစပြီး စာအုပ်ဖိုး ကို ကိုရီးယားဝမ် ၅၅၀၀၀ အဖြစ်ပြောင်းလဲ သတ်မှတ် ကောက်ယူမယ်လို့ ကြေညာထားပါတယ်။
ပျောက်ဆုံးခြင်းဒဏ်ကြေးအတွက် အမေရိကန်ဒေါ်လာ ၁၀၅ ဒေါ်လာနဲ့ သက်တမ်းလွန်ဒဏ်ကြေးအတွက် တစ်နှစ်ကျော်လွန်ပါက အမေရိကန်ဒေါ်လာ ၁၅ ဒေါ်လာ စသည်ဖြင့်ယခင် နှုန်းထားအတိုင်းသာသတ်မှတ်ကောက်ခံမယ်လို့ သိရပါတယ်။
စင်္ကာပူရှိ မြန်မာသံရုံး ကလည်း ယခင်က နိုင်ငံကူးလက်မှတ်စာအုပ်သက်တမ်းတိုးခြင်း အတွက် စင်္ကာပူဒေါ်လာ ၆၀ သတ်မှတ်ထားရာမှ ယခု တွင် ၆၅ဒေါ်လာ ပြောင်းလဲ ကောက်ယူတော့မှာ ဖြစ်ကာ ပျောက်ဆုံးဒဏ်ကြေး အတွက် ယခင် အတိုင်း စင်္ကာပူဒေါ်လာ ၁၂၅ဒေါ်လာနဲ့သက်တမ်းလွန် /ပျက်စီး ဒဏ်ကြေးအတွက် ၃၅ဒေါ်လာ၊သက်တမ်းကျန် ဒဏ်ကြေး အတွက် တစ်နှစ်ကျော်လွန်ပါက စင်္ကာပူဒေါ်လာ ၄၅ဒေါ်လာ ကောက်ယူမယ်လို့ သိရပါတယ်။
ဂျပန်နိုင်ငံ တိုကျို ရှိ မြန်မာသံရုံး ကလည်း နိုင်ငံကူးလက်မှတ်သက်တမ်းတိုးခြင်း အတွက် စာအုပ်ဖိုးကို ယခင် ဂျပန်ယန်းငွေ ၅၀၀၀ ကောက်ယူရာ မှ ယခုမှာ ၆၀၀၀ ယန်း ပြောင်းလဲကောက်ယူမှာ ဖြစ်ပြီး သက်တမ်းလွန်ဒဏ်ကြေး၊ သက်တမ်းကျန်ဒဏ်ကြေး၊ နဲ့စာအုပ်ပျောက်ဆုံးဒဏ်ကြေးတို့ကို ယခင်အတိုင်း ဆက်လက်ကောက်ယူမယ်လို့ ကြေညာထားပါတယ်။
အမေရိကန် ဝါရှင်တန်မြို့ရှိ မြန်မာသံရုံး ကလည်း ယခင်က နိုငိငံကူးလက်မှတ်သက်တမ်းတိုးခြင်း အတွက် အမေရိကန်ဒေါ်လာ ၃၅ဒေါ်လာ ကောက်ယူရာမှ ယခု မှာ ဒေါ်လာ ၄၀ ဖြင့် ပြောင်းလဲကောက်ယူမယ်လို့ ဆိုပါတယ်။
ဆော်ဒီအာရေဗျနိုင်ငံ ရှိ မြန်မာသံရုံး ရိရတ်မြို့ မှ လည်း ဆော်ဒီအာရေဗျနိုင်ငံ၊ ကာတာနိုင်ငံ၊ ဘာရိန်းနိုင်ငံနဲ့အိုမန်နိုင်ငံ တို့မှာ အကြောင်း အမျိုးမျိုး ရောက်ရှိ အလုပ်လုပ်ကိုင်နေထိုင် နေတဲ့ မြန်မာနိုင်ငံသား တွေ အတွက် နိုင်ငံကူးလက်မှတ်သက်တမ်းတိုးပေးခြင်း၊ နိုင်ငံကူးလက်မှတ် မွေးတိုးထုတ်ပေးခြင်းတို့အတွက် နိုင်ငံကူးလက်မှတ်စာအုပ်အတွက် ဆော်ဒီရီရယ် ၁၃၅ ကောက်ခံခဲ့ရာ စက်တင်ဘာ၁ရက်ကစပြီး ဆော်ဒီရီရယ် ၁၅၅ သို့ တိုးမြှင့်ကောက်ယူမယ်လို့ သံရုံးက အသိပေးထားပါတယ်။
နိုင်ငံကူးလက်မှတ် ပျောက်ဆုံးခြင်း၊ ပျက်စီးခြင်း တို့အတွက် စာအုပ်ဖိုး ၁၅၅ဆော်ဒီရီရယ် နဲ့ဒဏ်ကြေး ဆော်ဒီရီရယ် ၄၀၀ စုစုပေါင်း ဆော်ဒီရီရယ် ၅၅၅ ကျသင့်မယ်လို့ သိရပါတယ်။
