လိုင်စင်ရအေဂျင်စီ တွေ မှ စစ်ကောင်စီ လက်အောက်ခံ အလုပ်သမားဝန်ကြီးဌာနကို ပြည်ပရောက် အလုပ်သမားတွေရဲ့ မိသားစုလွှဲငွေ အထောက်အထားတင်ပြရာမှာ အနည်းငယ်သာတင်ပြနိုင်တယ်လို့ သိရပါတယ်။
ပြည်ပမှာ သွားရောက်အလုပ်လုပ်နေတဲ့ အလုပ်သမားတွေက ပြည်တွင်းရှိ မိသားစုထံ ငွေလွှဲရာမှာ လစာရဲ့ ၂၅ရာခိုင်နှုန်း ကို စစ်ကောင်စီက သတ်မှတ်ထားတဲ့ ဘဏ်တွေကနေ ငွေလွှဲပို့ဖို့ အလုပ်သမားဝန်ကြီးဌာနက ထုတ်ပြန်ထားတာပါ။
အခုလို ငွေလွှဲ ပေးပို့ထားတဲ့ အထောက်အထား တွေ ကို စေလွှတ်လိုက်တဲ့ လိုင်စင်ရ အေဂျင်စီ တွေ မှ အလုပ်သမားတွေဆီက နေ တောင်းယူကာ အလုပ်သမားဝန်ကြီးဌာနကို တင်ပြခိုင်းထားပြီး မတင်ပြနိုင်တဲ့အေဂျင်စီ တွေကို အရေးယူမယ်လို့လည်း အသိပေးထုတ်ပြန်ထားပါတယ်။
ပြီးခဲ့တဲ့ ဩဂုတ်လ ၁၂ ရက် ကစပြီး လိုင်စင်ရအေဂျင်စီ တွေ ကို အလုပ်သမားဝန်ကြီးဌာနက မိသားစုလွှဲငွေ အထောက်အထား နဲ့ အတူ ခေါ်ယူစစ်ဆေး ဖို့ တစ်ရက်ကိုအေဂျင်စီ ၂၀ ခု ခေါ်ယူခဲ့ရာ မှာ အထောက်အထားအနည်းငယ်သာ တင်ပြနိုင်တဲ့ အတွက် လာမယ့်ဩဂုတ်လ ၂၂ရက် ကစပြီး တစ်ရက် ကို အေဂျင်စီ ၅၀ နှုန်းနဲ့ စစ်ဆေးသွားမယ်လို့ သိရပါတယ်။
"" မိသားစုလွှဲငွေ ပို့ထားတဲ့အထောက်အထားက အေဂျင်စီ ကနေ အလုပ်သမား ၁၀ ယောက်စေလွှတ်လိုက်လို့ ၃ ယောက်လောက် တောင် အထောက်အထားမပေးနိုင်ဘူး အေဂျင်စီတွေ အနေနဲ့ ပြည်ပရောက်နေတဲ့ အလုပ်သမားတွေ ကို ငွေလွှဲပို့ထားတဲ့ အထောက်အထားတွေ ပြန်ပို့ပေးဖို့ ပြောပေမယ့် တချို့ကလည်း စကစ ကိုတော်လှန်တဲ့အနေနဲ့မလွှဲကြဘူး တစ်ချို့က မလွှဲတတ်တာ တွေ ငွေလွှဲနှုန်း ဈေး ကွာဟ နေတဲ့ အတွက် စစ်ကောင်စီသတ်မှတ်ထားသလို မလွှဲတဲ့သူကများတယ် ဒါကိုဝန်ကြီးဌာနက အေဂျင်စီတွေ က မြှောက်ပေးလို့ မလွှဲတာလို့ထင်ပြီး စစ်ဆေးတာတွေ လုပ်နေတာ ကျွန်တော်တို့ကနေ အလုပ်သမားကို အတင်းအကျပ်ကြီး လွှဲပါဆိုပြီး ပြောလို့လဲမရဘူး လွှဲခိုင်းလို့မရဘူး အဲ့တော့ ရသလောက်ပဲ တင်ပြပေးရတယ် အလုပ်သမားဝန်ကြီးဌာနကလည်း အတင်းတောင်းတယ် မပေးနိုင်ရင် လိုင်စင်သိမ်းမယ် ဒဏ်ကြေးဆောင်ရမယ်ဆိုတော့ လဲ ခံရမှာပဲပေါ့""လို့ အေဂျင်စီမှ တာဝန်ရှိသူတစ်ဦးကပြောပါတယ်။
မိသားစုထံလွှဲငွေ စတင်သတ်မှတ် မှု နဲ့ အကျုံးဝင်တဲ့ အေဂျင်စီတွေအနေနဲ့ ၂၀၂၃ ခုနှစ် စက်တင်ဘာမှ ဒီဇင်ဘာအထိ ၂၄၉ခု ရှိပြီး ယင်းအေဂျင်စီ တို့ ကို အလှည့်ကျခေါ်ယူစစ်ဆေးလျက်ရှိတယိလို့သိရပါတယ်။
လာမယ့်ဩဂုတ်လ ၂၂ ရက်စပြီး တစ်ရက်ကို အေဂျင်စီ ၅၀နှုန်းနဲ့ ထိုင်းနှငိ့မလေးရှား နိုင်ငံတို့ ကို လုပ်သားစေလွှတ်တဲ့အေဂျင်စီ တွေကို ခေါ်ယူစစ်ဆေးကာငွေလွှဲ အထောက်အထားတွေ တင်ပြခိုင်းထားတယ်လို့ သိရပါတယ်။
